སྐད་འཕྲིན་ཚོགས་པ་གསར་འཛུགས་བྱས་རྐྱེན་བོད་མི་ཞིག་འཛིན་བཟུང་བྱས་ཡོད་འདུག 

བཙན་བྱོལ་བོད་མིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཉེ་ཆར་བོད་སེར་ཤུལ་རྫོང་ཁོངས་ཀྱི་བོད་མི་བློ་ཚེ་ཞེས་པ་ཞིག་གིས་༨༠ འཁྲུངས་སྐར་བསུ་ཞེས་པའི་སྐད་འཕྲིན་ཚོགས་པ་ཞིག་གསར་འཛུགས་བྱས་པར་བརྟེན་ས་གནས་ཉེན་རྟོག་པས་འཛིན་བཟུང་བཙན་འཁྲིད་བྱས་ཡོད་འདུག

དེ་ཡང་བོད་དཀར་མཛེས་ཁུལ་སེར་ཤུལ་རྫོང་འབུམ་རྙིང་དགོན་རུ་མ་ནས་བོད་མི་བློ་ཚེ་ཞེས་པ་ཞིག་འཛིན་བཟུང་བྱས་ཏེ། སེར་ཤུལ་རྫོང་ཐོག་ཏུ་བཙན་འཁྲིད་བྱས་ཡོད་པ་དང་། ཁོང་འཛིན་བཟུང་བྱེད་སྐབས་ཉེ་འགྲམ་གྱི་མི་མང་པོ་ཞིག་ལའང་འདྲི་རྩད་སོགས་བྱས་ཡོད་འདུག

བློ་ཚེ་ཡིས་༨༠ འཁྲུངས་སྐར་བསུ་ཞེས་པའི་སྐད་འཕྲིན་ཚོགས་པ་ཞིག་གསར་འཛུགས་བྱས་ཏེ། ས་གནས་རང་དང་བོད་ཁུལ་གྱི་བླ་ཆེན་རྣམ་པའི་འཁྲུངས་སྐར་སྲུང་བརྩི་ཞུ་ས་ཞིག་བཟོས་པར་བརྟེན། ས་གནས་ཉེན་རྟོག་ལས་ཁུངས་ཀྱི་ལས་བྱེད་འགའ་བློ་ཚེ་ཡི་ཁྱིམ་དུ་ཡོང་སྟེ། ཁྱེད་རང་གིས་ཚོགས་པ་དེ་འདྲ་གསར་འཛུགས་བྱས་པ་རྒྱལ་ཁབ་ཀྱི་ཁྲིམས་དང་འགལ་བ་ཡིན་པ་དང་། ཚོགས་པ་དེ་འདྲ་འཛུགས་པར་ཐོག་མར་ས་གནས་ཉེན་རྟོག་ལས་ཁུངས་སུ་ཐོ་འགོད་བྱེད་དགོས་ཀྱང་ཁྲིམས་ལ་སྣང་མེད་བཏང་ནས་ཚོགས་པ་བཙུགས་ཡོད་སྐོར་ཉེས་འཛུགས་བྱས་ཡོད་འདུག

བོད་མི་བློ་ཚེ་ནི་ད་ལྟ་རང་ལོ་ ༥༧ ཙམ་ཡིན་ཞིང་། ཁོང་གི་བཟའ་ཟླ་སྔོན་མ་ནས་འདས་གྲོངས་སུ་ཕྱིན་ཡོད་པ་དང་། ཁོང་གཉིས་ལ་བུ་གཉིས་ཡོད་འདུག  ཁོང་གིས་བཙུགས་པའི་༨༠ འཁྲུངས་སྐར་བསུ་ཞེས་པའི་སྐད་འཕྲིན་ཚོགས་པ་དེའི་ནང་བོད་ཡུལ་གང་ས་ནས་བོད་མི་གྲངས་ ༡༠༠ ལྷག་ནང་འཇུག་བྱས་ཡོད་སྐོར་འདུག །

གསར་འགོད་པ་སྐལ་བཟང་དོན་གྲུབ།