སྐབས་༡༧ པའི་གྲོས་ཚོགས་ཚོགས་དུས་༨ པ་ཡོངས་སུ་གྲོལ་སོང་།

ཟླ་འདིའི་ཚེས་༡༩ ་ཉིན་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་དཔལ་ལྡན་ཚོགས་གཙོ་དབུ་བཞུགས་ཐོག་དབུ་འཛུགས་གནང་སོང་། ཚོགས་དུས་བརྒྱད་པའི་ཐོག་སྤྱི་ཟུར་བློ་བཟང་ཡེ་ཤེས་དབུས་འོས་བསྡུ་ལས་ཁང་གི་ཚོགས་གཙོ་དང་ཚུལ་ཁྲིམས་རྡོ་རྗེ་ལས་བྱེད་འདེམས་སྐོར་ལྷན་ཁང་གི་ཚོགས་མིར་བདམས་ཐོན་བྱུང་སོང་ལ།

དེ་བཞིན་གཞུང་འབྲེལ་གྲོས་ཆོད་གྲོས་འཆར་གྱི་ལས་རིམ་ཐོག སྤྱི་འཐུས་ཙ་ནེ་ཚང་དོན་འགྲུབ་བཀྲ་ཤིས་ཀྱིས་ཡིག་ཆ་ཨང་། ༤༠ པ། ཨོ་སི་ཁྲུ་ལི་ཡའི་གྲོས་ཚོགས་གོང་མའི་འཐུས་མི་ཟུར་པ་ལྕམ་སྐུ་ཇ་ནི་ཊ་ རཡེ་སེ་ (Former Senator Janet Rice) མཆོག་ལ་ཐུགས་རྗེ་ཆེ་ཞུའི་གྲོས་ཆོད་གྲོས་འཆར་སྙན་སྒྲོན་གནང་བར། སྤྱི་འཐུས་དགེ་བཤེས་རྔ་བ་གངས་རིས་རྒྱབ་སྐྱོར་གནང་རྗེས། གྲོས་ཚོགས་ནས་སྤྱི་མོས་ཐོག་གཏན་འབེབས་གནང་སོང་།

གཞན་ཡང་གཞུང་འབྲེལ་གྲོས་ཆོད་གྲོས་འཆར་གྱི་ལས་རིམ་ཐོག དཔལ་ལྡན་སྲིད་སྐྱོང་སྤེན་པ་ཚེ་རིང་གིས་ཡིག་ཆ་ཨང་། ༣༩ པ། ཨ་རིའི་གྲོས་ཚོགས་གོང་འོག་གཉིས་ཀྱི་ནང་བོད་རྒྱའི་རྩོད་རྙོག་སེལ་བར་སྐུལ་འདེད་ཀྱི་ཁྲིམས་ཡིག་གི་ཁྲིམས་འཆར་འདོན་མཁན་དང་། རྒྱབ་སྐྱོར་གནང་མཁན་ཚོགས་ཆུང་། གཏན་འབེབས་གནང་མཁན་གྲོས་ཚོགས་འཐུས་མི་རྣམ་པ། ཆོག་མཆན་གནང་མཁན་སྲིད་འཛིན་ཇཱའོ་བྷའེ་ཌན་མཆོག་བཅས་ལ་ཐུགས་རྗེ་ཆེ་ཞུ་དང་། དེ་བཞིན་ཁྲིམས་ཡིག་གཏན་འབེབས་ཀྱི་བརྒྱུད་རིམ་ནང་མཉམ་རུབ་བྱེད་མཁན་ཡོངས་ལའང་ཐུགས་རྗེ་ཆེ་ཞུའི་གྲོས་ཆོད་གྲོས་འཆར་ཞིག་བཏོན་གནང་བར། དཔལ་ལྡན་ཕྱི་དྲིལ་བཀའ་བློན་ནོར་འཛིན་སྒྲོལ་མས་རྒྱབ་སྐྱོར་གནང་རྗེས། གྲོས་ཚོགས་ནས་སྤྱི་མོས་ཐོག་གཏན་འབེབས་གནང་སོང་།

གཞན་ཡང་སྲིད་སྐྱོང་ནས་ཁྲིམས་འཆར་བཏོན་པའི་ཡིག་ཆ་ཨང་༣༡ ། དོན་ཚན་རེ་གསུམ་པ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཞེས་པའི་ནང་གསེས་ག་པ། ཁྲིམས་ཁང་ཞིག་ནང་ལོ་ལྔའི་རིང་མུ་མཐུད་ཁྲིམས་དཔོན་གྱི་ལས་འཁུར་བྱས་མྱོང་བའམ། ཡང་ན་ཉུང་མཐར་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་པ་མ་ཡིན། འོན་ཀྱང་བཅའ་ཁྲིམས་འདི་ཉིད་ལག་ལེན་འགོ་འཛུགས་བྱས་པ་ནས་བཟུང་ལོ་སུམ་ཅུའི་རིང་ཞེས་ཚིག་བརྗོད་རྙིང་པའི་ཐོག་(ལོ་བཞི་བཅུའི་) ་ཞེས་ཚིག་བརྗོད་གསར་པ་བསྣན་ནས་བཅའ་ཁྲིམས་བསྐྱར་བཅོས་ཁྲིམས་འཆར་དང་། དེ་བཞིན་སྤྱི་འཐུས་རྒྱུན་ལས་ཀྱི་བསྐྱར་ཞིབ་ཚོགས་ཆུང་ནས་ཁྱེར་བའི་ཡིག་ཆ་ཨང་༤༡། དོན་ཚན་རེ་གསུམ་པ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཞེས་པའི་ནང་གསེས་༤ པ།

སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གྱི་གསུམ་ཆ་གཉིས་ཡན་གྱིས་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་སུ་རུང་འཕོ་འགྱུར་དགོས་པའི་གྲོས་ཆོད་བཞག་སྟེ་འཕོ་འགྱུར་བྱེད་དགོས་བྱུང་ན་ལས་དེ་མིན་ཁྲིམས་ཞིབ་པ་ཆེ་བའི་ལས་རྒྱུན་ལོ་ལྔའམ། རང་ལོ་དྲུག་ཅུ་རེ་ལྔ་ཧྲིལ་པོ་ལོན་པ་གང་སྔའི་བར་ཡིན། ཁྲིམས་ཞིབ་པ་གཞན་གཉིས་རང་ལོ་དྲུག་ཅུ་རེ་ལྔ་ཧྲིལ་པོ་མ་ལོན་བར་ལས་འཁུར་རྒྱུན་འཛིན་བྱ་རྒྱུ་ཞེས་པའི་ཚིག་བརྗོད་རྙིང་པའི་ཐོག་(རང་ལོ་དྲུག་ཅུ་རེ་ལྔ་ཧྲིལ་པོར་ལོན་པ་གང་སྔའི་བར་ལས་འཁུར་རྒྱུན་འཛིན་བྱ་རྒྱུ། འོན་ཀྱང་རང་ལོ་དྲུག་ཅུ་རེ་ལྔ་ཧྲིལ་པོ་མ་བརྒལ་བར་ཁྲིམས་ཞིབ་པ་ཆེ་བར་འོས་འདེམས་བྱུང་ན་དགག་བྱ་མེད་) ཅེས་ཚིག་བརྗོད་གསར་པ་བསྣན་པའི་བཅའ་ཁྲིམས་བསྐྱར་བཅོས་བཅས་ཁྲིམས་འཆར་གཉིས་ལ་བགྲོ་གླེང་མང་པོ་བྱས་མཐར་སྤྱི་འཐུས་༣༥ རྒྱབ་སྐྱོར་གྱིས་མང་མོས་གཏན་འབེབས་གནང་སོང་།

འཛིན་སྐྱོང་བཀའ་ཤག་གིས་ཁྱེར་བའི། ཡིག་ཆ་ཨང་༣༡། དོན་ཚན་སོ་བདུན་པ་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་ཞེས་པའི་ནང་གསེས་༡ པོའི་ཁ་པ། རྙིང་མ་དང་བཀའ་བརྒྱུད། ས་སྐྱ། དགེ་ལུགས། གཡུང་དྲུང་བོན་བཅས་ལྔ་ཞེས་པའི་ཚིག་བརྗོད་རྙིང་པའི་ཐོག་(ཇོ་ནང་) ་ཞེས་ཚིག་བརྗོད་གསར་པ་བསྣན་པའི་བཅའ་ཁྲིམས་བསྐྱར་བཅོས་ཁྲིམས་འཆར་ལ་རྒྱབ་སྐྱོར་གནང་མཁན་སྤྱི་འཐུས་༢༡ མ་གཏོགས་མ་བྱུང་བར་བརྟེན་ཟགས་སོང་།

དེ་བཞིན་ལས་ཉིན་༨ པའི་ཚོགས་ཐུན་༣ པའི་ཐོག་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་སོང་། སྐབས་དེར་སྤྱི་འཐུས་རྣམ་པས།བོད་ནང་གི་ཛ་དྲག་གི་གནས་སྟངས་ཀྱི་འགན་ཚ་ཚང་རྒྱ་གཞུང་གིས་འཁྱེར་དགོས་པ་ད་ང། སྤྱི་ཚོགས་ནང་རང་བཙན་འཐབ་རྩོད་པ་ནག་པོ་བཟོ་ཐབས་བྱེད་ཀྱི་ཡོད་པ། རང་བཙན་འཐབ་རྩོད་ལ་རིན་ཐང་སྤྲད་པ་ཡིན་ན་བོད་སྤྱི་ལ་ཕན་ཐོགས་ཀྱི་ཡོད་པ། རང་བཙན་འཐབ་རྩོད་དེ་མ་རྩ་ལ་བཞག་ནས་མདུན་བསྐྱོད་བྱེད་དགོས་པ་མ་གཏོགས་འགྲོ་ས་མེད་པ། གཞིས་ལུས་བོད་མི་ཚོ་ནི་ཆོས་དང་ཆབ་སྲིད་གང་གི་ཆ་ནས་མ་རྩ་ཡིན་པས་ཁོང་ཚོའི་རེ་བ་དང་ཡིད་ཆེས་མ་བརླགས་པ་བྱེད་རྒྱུ་ནི་ང་ཚོའི་འགན་འཁྲི་ཡིན་པ། བོད་ཀྱི་སྐད་ཡིག་ཐོག་ཤུགས་སྣོན་རྒྱག་དགོས་པ་སོགས་ཀྱི་དགོངས་ཚུལ་གསུངས་ནས་སྤྱི་མོས་ཀྱིས་གཏན་འབེབས་གནང་སོང་།

དེའི་རྗེས་བཀའ་ཤག་གི་གསལ་བཤད་སྒྲོག་སྦྱངས་ཞུས་རྗེས་སྤྱི་འཐུས་རྣམ་པ་ཚོས་བཀའ་ཤག་གི་གསལ་བཤད་ནང་བོད་དོན་འཐབ་རྩོད་དང་འབྲེལ་བའི་སྲིད་བྱུས་སྐོར་གང་ཡང་བཤད་མེད་པ། བོད་དོན་འཐབ་རྩོད་ནི་བཙན་བྱོལ་བོད་མིའི་སྒྲིག་འཛུགས་ཀྱི་ཕུགས་དམིགས་གཙོ་བོ་དེ་ཡིན་དུས་ངེས་པར་དུ་སྲིད་བྱུས་སྐོར་གླེང་སློང་དང་གསལ་བཤད་བྱེད་དགོས་རྒྱུ་གལ་ཆེན་པོ་ཡིན་པ། དེའི་རྒྱུ་མཚན་ཡང་བོད་པའི་སྤྱི་ཚོགས་ཁྲོད་དབུ་མའི་ལམ་གྱི་སྐོར་འགྲེལ་ལོག་རྒྱག་མཁན་མང་པོ་ཡོང་གི་ཡོད་པའི་རྐྱེན་གྱིས་དབུ་མའི་ལམ་གྱི་སྐོར་འགྲེལ་བཤད་བྱེད་རྒྱུ་གལ་ཆེན་པོ་ཡིན་སྐོར་དང་། ༧གོང་ས་མཆོག་ལོ་མང་རིང་ནས་རྒྱ་ནག་རི་བོ་རྩེ་ལྔ་ལ་ཐེངས་ཤིག་གནས་སྐོར་ལ་ཕེབས་རྒྱུའི་ཐུགས་འདོད་ཆེན་པོ་ཡོད་པ་ཀུན་གྱིས་ཤེས་ཀྱི་ཡོད་དུས། རིན་པོ་ཆེའི་དགོངས་གཞི་དེའི་ཐོག་ལ་བཀའ་ཤག་ངོས་ནས་ཤུགས་གནོན་འཕར་མ་བརྒྱབས་ནས་ལས་དོན་ཞིག་སྒྲུབ་ཐུབ་ན་ཕན་ཐོགས་ཆེན་པོ་ཡོང་རྒྱུ་ཡིན་པ་སོགས་དོགས་འདྲི་དང་བསམ་ཚུལ་མང་པོ་གསུངས་གནང་སོང་ལ། 

དེ་བཞིན་བཀའ་ཤག་ནས་ཐེངས་འདིའི་བཀའ་ཤག་གི་གསལ་བཤད་དེ་བོད་རྒྱ་གཉིས་ཀྱི་ཆབ་སྲིད་རྙོག་གླེང་སྐོར་མེད་པ་དང་། གསལ་བཤད་འདི་ཆབ་སྲིད་དང་འབྲེལ་བའི་སྒྲིག་འཛུགས་སྲ་བརྟན་སྐོར་ཡིན་པར་བརྗོད་གནང་སོང་ལ། ང་ཚོ་ད་ལྟའི་གནས་ཡུལ་ནི་རྒྱ་གར་ནང་ཡིན་པར་བརྟེན། རྒྱ་གར་ནང་དུས་དང་མཐུན་པའི་ཐོག་ནས་ཁྲིམས་སྒྲིག་མང་པོ་ཞིག་འགྱུར་བ་འགྲོ་བཞིན་ཡོད་པ་དང་། ཁྲིམས་སྒྲིག་དེ་དག་དང་མཐུན་པའི་ཐོག་ནས་ང་ཚོའི་སྒྲིག་འཛུགས་རྣམས་ཀྱང་ཁྲིམས་ཐོག་ནས་སྲ་བརྟན་བཟོ་རྒྱུ་གལ་ཆེན་པོ་ཡིན་པའི་རྐྱེན་གྱིས། ཐེངས་འདིའི་གསལ་བཤད་དེ་སྤྱི་འཐུས་རྣམ་པས་གཅིག་པ་ཤེས་རྟོགས་ཡོང་ཆེད་ཡིན་པ་དང་། ལག་ལེན་བསྟར་མཁན་ང་ཚོ་ཡིན་དུས་ལས་བྱེད་རྣམས་ཀྱིས་ཀྱང་ཤེས་རྟོགས་ཡོང་ཆེད་དུ་ཞུས་པ་ཡིན་སྐོར་སོགས་གསུངས་གནང་སོང་།

གཞན་ཡང་བསྐྱར་བཅོས་ཁག་གི་བརྗོད་པ་གཏན་འབེབས་གནང་གྲུབ་རྗེས། སྤྱི་འཐུས་ཚོགས་གཙོའི་མཇུག་སྡོམ་གསུང་བཤད་སྐབས་སུ། མྱ་ངན་གུས་འདུད་ཀྱི་གྲོས་ཆོད་གཉིས་བཞག་ཐུབ་པ་བྱུང་བ། ལྷན་ཁང་བདུན་གྱི་ལས་བསྡོམས་སྙན་སྒྲོན་དང་ལན་འདེབས་ཡག་པོ་བྱུང་བ། དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང་ལས་བྱེད་འདེམས་བསྐོ་ལྷན་ཁང་གི་ཚོགས་མི་གཅིག་འདེམས་ཐོན་བྱུང་ཡོད་པ། ཨོ་སི་ཀྲོ་ལི་ཡའི་གྲོས་ཚོགས་གོང་མའི་འཐུས་མི་ཟུར་པ་ལྕམ་སྐུ་ཇ་ནི་ཊ་ རཡེ་སེ་ (Former Senator Janet Rice) མཆོག་ལ་ཐུགས་རྗེ་ཆེ་ཞུའི་གྲོས་ཆོད་གྲོས་འཆར་གཏན་འབེབས་གནང་བ། ཨ་རིའི་གྲོས་ཚོགས་གོང་འོག་གཉིས་ཀྱི་ནང་བོད་རྒྱའི་རྩོད་རྙོག་སེལ་བར་སྐུལ་འདེད་ཀྱི་ཁྲིམས་ཡིག་གཏན་འབེབས་བྱུང་བར་ཐུགས་རྗེ་ཞུ་རྒྱུའི་གྲོས་ཆོད་སྤྱི་མོས་ཐོག་གཏན་འབེབས་བྱུང་བ།

བཀའ་ཤག་དང་སྤྱི་འཐུས་རྒྱུན་ལས་བཅས་ནས་ཁྱེར་བའི་བཅའ་ཁྲིམས་བསྐྱར་བཅོས་གཉིས་བརྒྱུད་བར་སྐབས་སྤྱི་ཚོགས་ཁྱོན་གྱི་དཀའ་ངལ་དེ་སེལ་ཡོད་པ། ཕྱི་ལོ་༢༠༠༨་ནས་འགོ་བཙུགས་པའི་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་བཞག་ཐུབ་ཡོད་པ། གྲོས་ཆོད་ནང་བོད་ནང་གི་ཆབ་སྲིད་དཀའ་ངལ་གྱི་གནས་སྟངས།རྒྱ་ནག་གི་ཆབ་སྲིད་ཀྱི་འགྱུར་འགྲོས། རྒྱལ་སྤྱིའི་ང་ཚོ་ལ་རྒྱབ་སྐྱོར་སོགས་གྲོས་ཆོད་དོན་ཚན་བདུན་ཅན་ཞིག་བཞག་ཐུབ་པར་བཀུར་འོས་སྤྱི་འཐུས་ཚོས་ཐུགས་སྣང་དགོས་གལ་ཆེ་བ། གྲོས་ཚོགས་ནང་བཀུར་འོས་སྤྱི་འཐུས་ཚོས་བསྔགས་བརྗོད་གནང་བ་དང་། ལེགས་བཅོས་དང་གཟབ་ནན་བྱེད་དགོས་པའི་བཀའ་མོལ་དག་ལྷན་ཁང་ཁག་གི་ཕྱག་ལས་གནང་མཁན་ཚོས་དགོངས་པ་བཞག་ནས་ལས་དོན་བསྒྲུབ་དགོས་རྒྱུ་གལ་ཆེན་ཡིན་པ་སོགས་ཀྱི་མཇུག་བསྡོམས་གསུང་བཤད་གནང་ནས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་མཇུག་ལེགས་པར་གྲུབ་སོང་།

གསར་འགོད་པ། བློ་བཟང་རྒྱ་མཚོ། བསོད་ནམས་ཕུན་ཚོགས།