སྐབས་བཅུ་དྲུག་པའི་མདོ་སྟོད་སྤྱི་འཐུས་ཀྱི་འོས་མི།

མིང། དཀོན་མཆོག་ཡར་འཕེལ།
སྐྱེས་ཡུལ། སྨར་ཁམས།
ད་ལྟའི་སྡོད་གནས། ལྡི་ལི།
ལས་གནས། རྒྱལ་སྤྱི་བྱམས་བརྩེའི་བདེ་རྩའི་དྲུང་ཆེ།

སློབ་གཉེར་ཇི་བྱས།
སྤྱི་ལོ་ ༡༩༩༣ ལོར་བོད་ནས་བལ་ཡུལ་བརྒྱུད་རྒྱ་གར་དུ་འབྱོར་བ་དང་། སུ་ཇ་བོད་ཁྱིམ་ནང་སློབ་ཞུགས་གནང་ནས་སྤྱི་ལོ་ ༢༠༠༠ ལོར་འཛིན་རིམ་བཅུ་པའི་བསླབ་པ་མཐར་སོན་བྱུང། གཞི་རིམ་སློབ་ཡུན་རིང་སློབ་གཉེར་དང་སྤྱི་དོན་འགན་ཁུར་ཐུད་ཤོར་མེད་པ་གནང་བས་སྐབས་དེའི་བོད་གཞུང་ཤེས་རིག་ལས་ཁུངས་ནས་བུམ་སྐྱོན་གསུམ་བྲལ་གྱི་སློབ་མ་རྩེ་ཕུད་ (best boy award)ཀྱི་གཟེངས་རྟགས་བསྩལ། དེ་རྗེས་རྡ་སྟེང་བོད་ཁྱིམ་དུ་སློབ་བཞུགས་ ཀྱིས་སྤྱི་ལོ་ ༢༠༠༢ ལོར་འཛིན་རིམ་བཅུ་གཉིས་སློབ་གཉེར་ལེགས་པར་གྲུབ། དེ་རྗེས་མཐོ་རིམ་སློབ་གཉེར་ཆེད་ལྡི་ལིར་ཕེབས་པ་དང། དེ་གའི་མཐོ་རིམ་སློབ་གཉེར་ཁང་དུ་ལོ་གསུམ་རིང་ཆབ་སྲིད་ཚན་རིག་ཐོག་སློབ་གཉེར་གྱིས་སྤྱི་ལོ་ ༢༠༠༥ ལོར་གཙུག་ལག་སློབ་ཐོན་ (B.A Political Science) གྱི་ལག་འཁྱེར་ཐོབ། སྤྱི་ལོ་ ༢༠༠༥་ནས་བདུན་བར་སླར་ཡང་ལྡི་ལི་མཐོ་སློབ་རང་དུ་ལོ་གཉིས་རིང་སློབ་གཉེར་གྱིས་ཆབ་སྲིད་རིག་པའི་སློབ་དཔོན་ (M.A Political Science) གྱི་བསླབ་པ་མཐར་སོན་བྱུང་ཡོད།

ལས་ཀའི་ཉམས་མྱོང།
སློབ་གྲྭར་སྡོད་རིང་སློབ་གྲྭའི་སྤྱི་ཁྱབ་རྒན་བདག་དང་བུའི་སྡོད་ཁང་གི་རྒན་བདག་སོགས་འདེམས་ཐོན་རྒྱུན་པར་བྱུང་ནས་སློབ་གཉེར་གྱི་ཞོར་དུ་སྤྱི་ཚོགས་ཞབས་ཞུ་དང་ཚོགས་པའི་འགན་ཁུར་ཐོག་ཁུར་བབ་ཀྱི་ལས་སྣེ་ཚང་མ་སླ་བཅོས་ཙམ་མ་ཡིན་པར་གྲུབ་འབྲས་རྩེ་ཐོན་སོན་པ་བྱུང་ཡོད། དེ་རྗེས་མཐོ་སློབ་སྐབས་སླར་ཡང་ལྡི་ལི་བོད་ཁྱིམ་གྱི་རྒན་བདག་གམ་སློབ་ཕྲུག་ཚོགས་པའི་ཚོགས་གཙོར་འདེམས་ཐོན་བྱུང་བ་མ་ཟད་ལྡི་ལི་ས་གནས་གཞོན་ནུའི་ཚོགས་གཙོར་འདེམས་ཐོན་བྱུང་བ་བཅས་ཡིན།

མདོར་ན། སློབ་གཉེར་གྱི་དུས་ཡུན་རིང་སྤྱི་ཚོགས་ཞབས་ཞུ་དང་ཉམས་མྱོང་གསོག་པའི་གོ་སྐབས་རྒྱུན་མར་བྱུང་ཡོད། ལྷག་པར་དུ་སྤྱི་ལོ་ ༢༠༠༧ ནས་ ༢༠༠༡༣ བར་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ལས་དུས་ཡུན་གཉིས་རིང་འོས་འདེམས་བྱུང་བ་མ་ཟད་རྒྱུན་ལས་སྡོད་ཡུན་རིང་རྒྱལ་ས་ལྡི་ལིར་དུས་བཀག་མེད་པའི་ཟས་བཅད་ངོ་རྒོལ་གནང་བ་དང་། དེ་བཞིན་ཨ་རི་དང་ཁེ་ན་ཌ། ཡོ་རོབ། ཨོ་སི་ཊོ་ལི་ཡ་སོགས་ཕྱི་རྒྱལ་ཡུལ་གྲུ་གང་སར་ཕེབས་ནས་རྒྱ་གཞུང་གི་བོད་མིའི་ཐད་འཛིན་པའི་གདུག་རྩུབ་ཅན་གྱི་སྲིད་ཇུས་ཐེར་འདོན་དང་། བོད་མིའི་དཀའ་སྡུག་གི་འཚོ་བ་རྒྱལ་སྤྱིའི་ཐོག་ཁྱབ་བསྒྲགས་བྱེད་པའི་ལས་གཞི་མང་དག་ཅིག་སྤེལ་ཡོད་པ་མཁྱེན་གསལ་དང་། གཞོན་ནུའི་རྒྱུན་ལས་ནས་གནས་འཕོས་བྱུང་ནས་ད་བར་སྨར་ཁམས་གྲགས་པ་རིན་པོ་ཆེ་མཆོག་གི་གསར་འཛུགས་གནང་བའི་རྒྱལ་སྤྱི་བྱམས་བརྩེའི་བདེ་རྩ་ཞེས་པ་བོད་དང་ཧི་མ་ལ་ཡི་རི་བརྒྱུད་ཀྱི་དྭ་ཕྲུག་དང་ཆེས་དྭ་ཕྲུག་དེ་བཞིན་ཉམས་ཐག་སོགས་ཀྱི་ཆེད་ལས་དོན་བྱེད་བཞིན་པའི་ཚོགས་པ་དེར་དྲུང་ཆེའི་ལས་ཁུར་ཞུ་མུས་རེད།

དོན་ཤིན་ཏུ་བསྡུས་ན། བོད་མི་རིགས་འདི་ཆབ་སྲིད་ཀྱི་བཙན་བྱོལ་བ་ཡིན་པས་མི་རིགས་ཀྱི་སྣེ་ཁྲིད་ཆབ་སྲིད་ཤེས་མཁན་ཞིག་དང་། བོད་མིའི་དཀའ་སྡུག་གི་གནས་སྟངས་རྒྱལ་སྤྱིའི་སྟེང་སྐྱེལ་དགོས་པས་དེང་དུས་ཀྱི་ཤེས་ཡོན་དང་མཐོང་རྒྱ་ཡོད་མཁན་ཞིག་དགོས་པས་ཁོང་ལྟ་བུ་ནི་འོས་ཤིང་འཚམས་པའི་བོད་མིའི་མགྲིན་ཚབ་པ་ཞིག་ཆགས་ཡོད། དེར་བརྟེན་རྒྱ་ཆེའི་མི་མང་ཚོས་ཐུགས་བསམ་ཆེ་བཞེས་ཀྱིས་ཁོང་ལ་འོས་འདེམས་ཡོང་བའི་འབོད་སྐུལ་ཞུ་བཞིན་ཡོད་པ་དང་།
འདིར་འཁོད་གནས་ཚུལ་གང་ཡང་དག་ཐེར་ཆེད་ཉམས་ཞིབ་གནང་མཁན་ཡོད་ཚེ་དགའ་བསུ་ཞུ་རྒྱུ་ཡིན།

འབྲེལ་བ་གནང་ཡུལ།
ཁ་པར་ཨང། 7042573484, 9882416105
གློག་འཕྲིན་ཁ་བྱང་། gapwayne007@gmail.com, diedecent@gmail.com