སྟག་སྦྲང་ལ་བརྟེན་ནས་ཡུ་རོབ་ནང་དུག་སྦྲང་ན་ཚ་ཌེང་འགེ་ཁྱབ་འཕེལ་འགྲོ་གི་ཡོད་འདུག
ཡུ་རོབ་ཀྱི་རྒྱལ་ཁབ་མང་པོ་ཞིག་གི་ནང་ལ་དུག་སྦྲང་གི་ན་ཚ་ཌེང་འགེ་ཟེར་བ་ཁྱབ་ཡོད་པ་དང་། དེ་ཁྱབ་སྤེལ་བྱེད་མཁན་གྱི་དུག་སྦྲང་དེ་ཨེ་ཤེ་ཡའི་སྟག་སྦྲང་asian tiger mosquitoཟེར་བ་དེ་ཡིན་འདུག
ཟླ་འདིའི་ཚེས་༡༢ ཉིན་བྷི་བྷི་སི་ཡི་གནས་ཚུལ་སྤེལ་གསལ་ལྟར་ན། ཆེད་ལས་པ་ཚོས་ཌེང་འགེ་ན་ཚ་དེ་སྟག་སྦྲང་གི་རྐྱེན་གྱིས་ཁྱབ་ཀྱི་ཡོད་པ་ཤེས་རྟོགས་བྱུང་བ་དང་། དུག་སྦྲང་གི་རིགས་དེ་ཡུ་རོབ་ཀྱི་ཡུལ་གྲུ་༡༣ ཙམ་ལ་ཡོད་པ་ཤེས་ཡོད་འདུག གནམ་གཤིས་འགྱུར་ལྡོག་གི་རྐྱེན་པས་སྟག་སྦྲང་ཁྱབ་འཕེལ་འགྲོ་རྒྱུ་ལས་སླ་རུ་ཕྱིན་ཡོད་འདུག་པ་དང་། ད་ལོའི་ཕྱི་ཟླ་༧ པའི་ནང་པེ་རི་སིའི་བྱང་ཕྱོགས་སུ་ཨོ་ལེམ་པིཀ་རྩེད་འགྲན་རྩེ་གི་ཡོད་པས་རྩེད་འགྲན་འགན་འཛིན་པས་ན་ཚ་དེ་འགོག་བྱེད་དུ་དུག་སྦྲང་ཡོད་མེད་དཔྱད་ཞིབ་དང་བཀག་འགོག་བྱེད་ཀྱི་ཡོད་འདུག ཡོ་རོབ་ཀྱི་ནད་འགོག་དང་གཅུན་སྡོམ་ཁང་གིས་European Centre for Disease Prevention and Control (ECDC) འགྲིམ་འགྲུལ་བྱས་ན་ཁྱབ་འཕེལ་ཆེ་རུ་འགྲོ་གི་རེད་ཅེས་ཉེན་བརྡ་བཏང་ཡོད་འདུག རང་གི་ལྡུམ་རྭ་དང་། མདའ་གཡབ་ཕྱོགས་སུ་འཁྱིལ་ཆུ་ཡོད་ཚེ་མེད་པ་བཟོ་དགོས་པ་དང་། མཚན་མོར་ཉལ་གུར་དང་སྒོ་སོགས་ལ་དུག་སྦྲང་འགོག་བྱེད་བེད་སྤྱོད་བྱེད་རོགས་ཞེས་ECDC ཡིས་བསླབ་བྱ་རྒྱག་གི་ཡོད་འདུག
ལོ་བཅུ་ཕྲག་གཉིས་ཀྱི་རིང་དུག་སྦྲང་གིས་ཡུ་རོབ་ལ་ཉེན་ཁ་ཆེན་པོ་བཟོས་ཡོད་འདུག་པ་དང་། ཨེ་ཤེ་ཡའི་སྟག་གཟིག་དུག་སྦྲང་ནི་འཛམ་གླིང་གི་དུག་སྦྲང་ནང་ནས་ཁྱབ་འཕེལ་འགྲོ་བར་ལས་སླ་ཤོས་དེ་ཡིན་པ་དང་། ད་ཆ་ཡུ་རོབ་ཀྱི་ལྷོ་ཕྱོགས་ནས་ཁྱབ་འཕེལ་འགྲོ་ཡི་ཡོད་འདུག་ལ། ཡུ་རོབ་ཀྱི་རྒྱལ་ཁབ་ཨོ་སི་ཋོ་རི་ཡ་དང་། བྷུལ་གྷེ་རི་ཡ། ཁུ་རེ་ཤེ་ཡ། ཧྥ་རན་སི། འཇར་མན། གྷི་རི་སི། ཧང་གྷ་རི། ཨི་ཊ་ལི། མོལ་ཋ། ཕོར་ཇུ་གྷལ། རོ་མ་ནི་ཡ། སི་ལོ་ཝེ་ནི་ཡ། སི་པན་ཕྱོགས་ལ་ནད་ཡམས་ཁྱབ་འཕེལ་ཆེན་པོ་འགྲོ་བཞིན་ཡོད་འདུག རྒྱལ་ཁབ་གཞན་བྷེལ་ཇམ་དང་། སའི་ཕར་སི། ཅེག་སྤྱི་མཐུན་རྒྱལ་ཁབ། ནེ་ཐར་ལན་ཌི། སི་ལོ་ཝ་ཁི་ཡ་ལ་ཡང་ནད་ཡམས་དེ་ཁྱབ་ཡོད་འདུག
སྟག་སྦྲང་གི་བརྒྱུད་ནས་ན་ཚ་ཁྱབ་འཕེལ་འགྲོ་ཡི་ཡོད་པ་རྣམས་ནི་ཌེང་འགེ་ཚ་ནད་དང་། ཅི་ཀན་གུ་ནིཡ། ཛི་ཀ་གཉན་སྲིན་བཅས་ཡིན་པ་དང་། ནམ་རྒྱུན་ནས་ན་ཚ་དེ་རྣམས་ཨ་ཧྥི་རི་ཀ་དང་། ཨེ་ཤེ་ཡ། ཨ་རི་ལ་མ་གཏོགས་མེད་པ་ཡིན་འདུག ཚ་ནད་སེར་པོ་ལ་སོགས་པའི་ན་ཚ་གཞན་མང་པོ་ཞིག་སྤེལ་ཀྱི་ཡོད་པའི་དུག་སྦྲང་དེ་སའི་ཕར་སི་ལ་ནང་ཆགས་ཡོད་འདུག ཆེད་ལས་པ་ཚོས་ཡུ་རོབ་ཀྱི་རྒྱལ་ཁབ་གཞན་ལ་ཁྱབ་སྲིད་པའི་ཉེན་ཁ་ཡོད་པར་བརྗོད་འདུག
ཌེང་འགེ་ན་ཚ་དེ་དང་པོ་ཆམ་ནད་ཀྱི་རྟགས་སྟོན་པ་དང་། རྗེས་སུ་ན་ཚ་སྡུག་ཏུ་འགྲོ་ཡི་ཡོད་འདུག ལོ་ཤས་ནང་ཁྱབ་འཕེལ་ཆེན་པོ་ཕྱིན་ཡོད་འདུག་ཅིང་། ལོ་སྔོན་མ་ཕ་རན་སི་ཡི་ནང་ནད་ཡམས་འདྲ་མིན་ཐེངས་བརྒྱད་ལ་ཁྱབ་ཡོད་འདུག་པ་དང་། ཨི་ཊ་ལི་ཡི་ནང་ཐེངས་བཞི། སི་པན་ནང་ཐེངས་གཉིས་ཡིན་འདུག ཡུ་རོབ་ལ་ནད་ཡམས་མང་ཆེ་བ་རྒྱལ་ཁབ་གཞན་ནས་ཡོང་གི་ཡོད་འདུག་པ་དང་། ལོ་སྔོན་མ་མི་༥༠༠༠ ཙམ་རྒྱལ་ཁབ་གཞན་ནས་ན་ཚ་འགོས་ཡོད་འདུག སྤྱི་ལོ་༢༠༢༣ ནང་ས་གནས་ནང་ཁུལ་ལ་མི་༡༣༠ ན་ཡོད་འདུག West Mile virus ཞེས་པའི་ནད་ཡམས་དེ་ཡང་ད་བར་ཡུ་རོབ་ཀྱི་རྒྱལ་ཁབ་མང་པོ་ཞིག་ལ་ཡོད་འདུག་ལ། ད་ལོའི་ཕྱི་ཟླ་༣ པའི་ནང་མི་གཅིག་ལ་ན་ཚ་འགོས་ཡོད་པར་བཤད་འདུག ECDC ཡི་འགན་འཛིན་ཨེ་མོན་Andrea Ammon གྱིས་བཤད་པ་ལྟར་ན། ཕྱི་ཟླ་༣་པའི་ནང་ནད་ཡམས་སླེབས་པ་དེས་གནམ་གཤིས་འགྱུར་ལྡོག་རྐྱེན་པས་དབྱར་ཁ་མ་སླེབས་གོང་དུ་ཡང་དུག་སྦྲང་འཚར་ལོངས་བྱེད་སའི་འཁོར་ཡུག་སྐྲུན་གྱི་ཡོད་པ་སྟོན་གྱི་ཡོད་འདུག་པ་དང་། ཌེང་འགེ་ནད་ཡམས་ཡོད་པའི་རྒྱལ་ཁབ་གཞན་ལ་འགྲིམ་འགྲུལ་མང་པོ་བྱས་པའི་རྐྱེན་གྱིས་སོ་སོའི་ལུང་པའི་ནང་ན་ཚ་དེ་སླེབ་རྒྱུའི་ཉེན་ཚབས་ཆེ་རུ་འགྲོ་ཡི་ཡོད་འདུག ཌེང་འགེ་ཚ་ནད་ནི་རྒྱལ་ཁབ་༡༠༠ ཙམ་གྱི་ནང་དུ་ཡོད་པ་དང་། འཛམ་གླིང་འཕྲོད་བསྟེན་ལྷན་ཚོགས་ཀྱིས་བཤད་པ་ལྟར་ན། ལོ་སྔོན་མར་མི་ས་ཡ་༦ ལ་ནད་དེ་ཕོག་ཡོད་པ་དང་མི་༧༠༠༠ ཙམ་གྲོངས་ཡོད་འདུག རྒྱལ་ཁབ་ཡོངས་ནས་ཌེང་འགེ་མང་ཤོས་བྷང་ལ་དྷེ་ཤེ་དང་། མ་ལི་ཤི་ཡ། ཐེ་ལནཌི། ཝེ་ཋེ་ནམ་བཅས་ཡིན་འདུག འདར་ཚད་ཅེས་པ་དུག་སྦྲང་གི་ན་ཚ་གཞན་ཞིག་ཡིན་པ་དང་དེས་ལུས་པོ་འདར་ཞིང་ཚ་བ་རྒྱས་ཀྱི་ཡོད་འདུག ན་ཚ་དེ་དུག་སྦྲང་ནས་ཡོང་བའི་ན་ཚ་ཉེན་ཚབས་ཆེ་ཤོས་ཤིག་ཀྱང་ཡིན་འདུག་ལ། དེ་ནི་དུག་སྦྲང་མོ་ཡིས་མི་ལ་སོ་བརྒྱབས་ནས་ན་ཚ་ཁྱབ་ཀྱི་ཡོད་འདུག དུག་སྦྲང་དེ་ཡང་ཡུ་རོབ་ལ་ཡོད་འདུག་པ་དང་། མ་འོངས་པར་ཡུ་རོབ་ནང་འདར་ཚད་ཅེས་པའི་དུག་སྦྲང་གི་ན་ཚ་དེ་ཁྱབ་པའི་ཉེན་ཁ་ཆེན་པོ་ཡོད་འདུག
གསར་འགོད་པ། བསྟན་འཛིན་གཡང་འཛོམ།
