སྤྱི་ཚོགས་རུལ་སུངས་ཅན་དུ་སྒྱུར་སྲིད།

བོད་ཀྱི་བང་ཆེན་སྤྱིའི་འདོན་ཐེངས་ ༥༣༥  ཕྱི་ལོ་ ༢༠༡༥/༣/༢༥

སྤྱིར་བོད་པ་ཙམ་དུ་མ་ཟད་འཛམ་གླིང་ཧྲིལ་པོའི་ཁྱོན་གྱི་མི་རྣམས་ལ་མཚོན་ན་ཕལ་ཆེ་བས་གསར་འགྱུར་བརྒྱུད་ལམ་ཁག་སོགས་ཀྱི་གནས་ཚུལ་མི་སྙན་པའི་སྐོར་ལ་དོ་སྣང་ཆེ་བ་བྱེད་པ་དང་། དེ་ལ་བརྟེན་ནས་གསར་འགྱུར་བརྒྱུད་ལམ་ཁག་གི་ངོས་ནས་ཀྱང་གནས་ཚུལ་མི་སྙན་པའི་རིགས་མང་པོ་ཞིག་ཆེད་འགོད་བྱེད་བཞིན་ཡོད་པ་རེད། གསར་འགོད་པ་ཞིག་གི་ངོས་ནས་གསར་འགྱུར་འབྲི་བའི་སྐབས་སུ་ལྟ་ཀློག་ཉན་གསུམ་བྱེད་མཁན་མང་པོ་ཡོང་ཐུབ་མིན་གྱི་ཐོག་ལ་བསམ་བློ་གཏོང་དགོས་པ་ནི། རྔ་དང་རྔ་གཡོག་གི་དཔེ་བཞིན་གཅིག་ལ་གཅིག་བརྟེན་གྱི་འབྲེལ་བ་ཆགས་ཡོད། བཙན་བྱོལ་བོད་པའི་སྤྱི་ཚོགས་ལ་མཚོན་ན་སྤྱི་ཡོངས་ནས་དེབ་ཀློག་པ་དང་གསར་འགྱུར་ལ་དོ་སྣང་བྱེད་རྒྱུའི་གོམས་གཤིས་དཀོན་ནའང། གནས་ཚུལ་མི་སྙན་པ་རེ་བྱུང་བའི་སྐབས་སུ་དོ་སྣང་ཆེན་པོ་བྱེད་པ་ནི་རྒྱུན་ལྡན་ལྟ་བུར་གྱུར་ཡོད། ལྷག་པར་དུ་ད་ལྟའི་ཆར་སྤྱི་ཚོགས་འབྲེལ་མཐུད་དྲ་རྒྱ་ཁག་བེད་སྤྱད་ནས་རང་ཉིད་ཀྱི་འདོད་མོས་བཞིན་སྒྲོ་འདོགས་དང་སྐུར་འདེབས་ཀྱི་འགྲེལ་བཤད་རིང་ཐུང་སྣ་ཚོགས་ཤིག་སྤེལ་བཞིན་པ་ནི་རྒྱུན་ལྡན་གྱི་གནས་ཚུལ་ཞིག་ཏུ་གྱུར་ཡོད།

ཉེ་ཆར་ནེའུ་ཡོག་གི་གསུམ་བཅུའི་དུས་དྲན་སྐབས་ཀྱི་དོན་རྐྱེན་དང། གྲོས་ཚོགས་ནང་གི་རྩོད་གླེང་ལ་བརྟེན་ནས་སྤྱི་ཚོགས་འབྲེལ་མཐུད་དྲ་རྒྱ་ཁག་ཏུ་རང་རང་སོ་སོའི་ཕྱོགས་བཟུང་ནས་གནས་ཚུལ་འདྲ་མིན་སྣ་ཚོགས་བཅད་གཏུབ་བྱས་ནས་སྤེལ་བཞིན་འདུག་པ་དང། འདི་བརྒྱུད་ནས་གྲོས་ཚོགས་ལས་རིམ་སྤྱི་ཡོངས་ལ་དོ་སྣང་གསར་པ་ཞིག་སླེབས་མི་སྲིད་པ་མ་རེད། གླེང་རྙོག་རེ་རེ་བྱུང་བའི་སྐབས་སུ་སྤྱི་འཐུས་རྣམས་ལ་ཁ་རྡུང་གཏོང་མཁན་མང་པོ་ཡོད་ཀྱང། འོས་བསྡུའི་སྐབས་སུ་གླེང་རྙོག་དེ་དག་གི་འབྱུང་རྩ་གཙོ་བོ་རྣམས་ལ་ཁོངས་སོ་སོའི་མི་མང་གིས་རྒྱབ་སྐྱོར་ཚད་མཐོ་ཤོས་བྱེད་བཞིན་ཡོད་པའང་དངོས་ཡོད་གནས་ཚུལ་དུ་གྱུར་ཡོད། དེར་བརྟེན་ད་དུང་བོད་པའི་སྤྱི་ཚོགས་ཀྱི་ངོས་ནས་དོ་སྣང་དང་བསམ་བློའི་ཁ་ཕྱོགས་ཧ་ཅང་བརྟན་པོ་མེད་པ་མ་ཟད། ཞིབ་འཇུག་དང་བརྟག་དཔྱད་ཡག་པོ་བྱེད་པའི་གོམས་གཤིས་དེ་ཡང་ད་དུང་ཧ་ཅང་ནར་སོན་མེད། གླེང་རྙོག་དེ་དག་གི་བྱེད་གཏེ་གཙོ་བོ་དག་གིས་དམིགས་ཡུལ་དང་འཆར་གཞི་ཡོད་པའི་ཐོག་ནས་བྱས་པ་ལས་སྟབས་འཁེལ་བ་ཙམ་ཞིག་ག་ལ་ཡིན།

རྩ་བས་གྲོས་ཚོགས་ནང་དུ་རྩོད་གླེང་སྣ་ཚོགས་ཡོང་གི་ཡོད་པ་དང། རྩ་དོན་དང་མི་མང་གི་བདེ་སྡུག་དང་འབྲེལ་བའི་སྐོར་ཡང་མང་པོ་གླེང་གི་ཡོད། འོན་ཀྱང་མི་མང་ཕལ་མོ་ཆེའི་ངོས་ནས་རྩོད་གླེང་གི་རིགས་ལ་དོ་སྣང་ཆེན་པོ་བྱེད་པ་ལས། བརྗོད་གཞི་གཞན་གྱི་ཐོག་ལ་བགྲོ་གླེང་བྱས་པར་དོ་སྣང་དམིགས་བསལ་གང་ཡང་བྱེད་ཀྱི་མེད། རྩོད་གླེང་གི་རིགས་ལ་དོ་སྣང་དང་རིམ་པས་གྲོས་ཚོགས་ཀྱི་ལས་རིམ་བརྒྱུད་བཀའ་ཤག་གི་ལས་འཆར་ཁག་ལ་དོ་སྣང་དང་ཤེས་རྟོགས་བྱེད་ཐུབ་པའི་གོ་སྐབས་ཤིག་ཀྱང་ཡོང་སྲིད་པ་རེད། མི་མང་གི་ངོས་ནས་རང་ཉིད་ཀྱི་བདེ་སྡུག་དང་འབྲེལ་བའི་ལས་འཆར་ཡོད་མེད་དང། ཡོད་ན་དེ་གནད་དུ་འཁེལ་བ་ཞིག་ཡིན་མིན། ལྷག་པར་དུ་རང་ཉིད་ཀྱིས་བདམས་པའི་འཐུས་མི་རྣམས་ཀྱིས་འགན་ཚུལ་བཞིན་ཁུར་ཐུབ་མིན་སོགས་ཀྱི་ཐོག་ལ་དོ་སྣང་བྱེད་དགོས་པ་དེ་མང་གཙོའི་ཁེ་དབང་ཉག་གཅིག་ཏུ་གྱུར་ཡོད། གལ་སྲིད་རང་ཉིད་ཀྱིས་བདམས་པའི་འཐུས་མི་དག་གིས་འགན་ཚུལ་བཞིན་ཁུར་ཐུབ་ཀྱི་མེད་ན་བསྐྱར་དུ་རྒྱབ་སྐྱོར་མི་བྱེད་པ་དང་སྐྱོན་བརྗོད་ཀྱང་བྱེད་ཆོག

གྲོས་ཚོགས་ཀྱི་འཐུས་མི་ནི་རྒྱ་ཆེའི་མི་མང་གི་སྐུ་ཚབ་ཡིན་པ་དང། གྲོས་ཚོགས་ཀྱི་འཐུས་མིས་འགན་ཁུར་བྱེད་ཡུལ་གཙོ་བོ་རྒྱ་ཆེའི་མི་མང་རང་ཡིན་པ་ནི་གཅིག་ལ་གཅིག་བརྟེན་གྱི་འབྲེལ་བ་དམ་ཟབ་ཆགས་ཡོད། སྔོན་མ་དང་མི་འདྲ་བར་ད་ལྟའི་ཆར་གྲོས་ཚོགས་ཀྱི་ལས་རིམ་ནི་དྲ་ལམ་བརྒྱུད་ཐད་ཀར་རྒྱང་བསྲིང་བྱེད་བཞིན་ཡོད་པ་མ་ཟད། རྗེས་སུའང་དྲ་ལམ་དུ་ལྟ་ཆོག་ཆོག་བྱས་ནས་བཞག་ཡོད་པ་རེད། སྲིད་དོན་པ་དང་དཀྲོག་གཏམ་སྤེལ་མཁན་དག་གིས་གྲོས་ཚོགས་ནང་གི་སྐད་ཆ་བཅད་གཏུབ་སྣ་ཚོགས་བྱས་ནས་གཏོང་སྲིད་ཀྱང། རང་ཉིད་ཀྱིས་ཐད་ཀར་བལྟས་ན་དངོས་ཡོད་གནས་ཚུལ་ཤེས་རྟོགས་ཡོང་ཐབས་བྱེད་དགོས་པ་ཧ་ཅང་གལ་ཆེ། བསྟོད་མཁན་གྱིས་བསྟོད་དྲགས་པ་དང་སྨད་མཁན་གྱིས་སྨད་དྲགས་པའི་གནས་ཚུལ་དག་གིས་སྤྱི་ཚོགས་ཁྱོན་ཡོངས་ཁ་ལོ་སྒྱུར་མི་ཐུབ་ནའང། དུས་རྒྱུན་དོ་སྣང་མི་བྱེད་མཁན་དག་ལ་མགོ་སྐོར་ཐེབས་མི་སྲིད་པའང་མིན་པས། དྲ་རྒྱ་བརྒྱུད་ནས་གྲོས་ཚོགས་ཀྱི་གནས་སྟངས་ལ་རང་ངོས་ནས་ཤེས་ཐུབ་པ་དགོས་རྒྱུ་ནི་ཧ་ཅང་གལ་ཆེ།

སྤྱིར་མང་གཙོ་ཅན་གྱི་སྤྱི་ཚོགས་ནང་རྩོད་རྙོག་འདྲ་མིན་ཡོང་སྲིད་པ་དང་ཡོང་གི་ཡོད་པ་ནི་རྒྱུན་ལྡན་ཞིག་ཡིན་ནའང། བཙན་བྱོལ་བོད་པའི་སྤྱི་ཚོགས་དེ་ཉིད་རྒྱ་ཆུང་བ་དང་སྐྱབས་བཅོལ་གྱི་ངོ་བོའི་ཐོག་ཏུ་གནས་ཡོད་སྟབས། རང་བཙན་ཅན་གྱི་རྒྱལ་ཁབ་ཅིག་དང་གཏན་ནས་མི་འདྲ་བས་རྩོད་རྙོག་མང་པོ་ཡོད་ན་འཐབ་རྩོད་ཀྱི་འགལ་རྐྱེན་ཉག་གཅིག་ཏུ་འགྱུར་རྒྱུ་ཡིན་པ་སྨྲོས་མེད་རེད། འོན་ཀྱང་གནད་དོན་དེ་ལ་ཁ་གཡར་ནས་དངོས་ཡོད་ཀྱི་གནས་ཚུལ་ཁག་ལའང་མ་གོ་མ་ཐོས་མདོག་མདོག་བྱེད་པ་དང། གཙོ་ཆེ་ཤོས་རང་ཉིད་ཀྱི་དགའ་ཉེ་ངོ་ཤེས་གྲོགས་པོ་ཡིན་པའི་རྒྱུ་མཚན་ལ་བརྟེན་ནས་འགེབས་སྲུང་བྱེད་རེས་བྱེད་པ་དག་ནི་སྤྱི་ཚོགས་རུལ་སུངས་ཅན་དུ་སྒྱུར་མཁན་ཡིན། ༧གོང་ས་མཆོག་ཞལ་བཞུགས་པའི་སྐབས་ནས་སྤྱི་རྒྱུ་སྒེར་བདག་བྱེད་མཁན་མངོན་གསལ་དུ་ཡོང་གི་ཡོད་ཀྱང། དེ་ལ་དམིགས་བསལ་གྱིས་ནུས་པ་འདོན་མི་ཐུབ་པ་མ་ཟད། རྒྱབ་སྐྱོར་བྱེད་མཁན་ཡང་མང་པོ་ཡོད་སྟབས། མ་འོངས་པར་འདི་ལས་ཐབས་སྐྱོ་བའི་གནས་ཚུལ་སྣ་ཚོགས་ཡོང་ངེས་ཡིན་པ་ད་ལྟ་ནས་ཚོད་དཔག་བྱེད་ཐུབ་པ་ཞིག་རེད།།