སྤྱི་འཐུས་རྣམས་ཀྱི་ནང་མོལ་ཚོགས་འདུའི་ཐོག་ཐག་གཅོད་ག་རེ་བྱུང་ཡོད་པ་ཕྱིར་བསྒྲགས་བྱས་མ་སོང་།

བོད་མི་མང་སྤྱི་འཐུས་ལྷན་ཚོགས་སྐབས་བཅུ་བདུན་པའི་སྤྱི་འཐུས་རྣམས་ཀྱི་དམ་འབུལ་ཞུ་ཕྱོགས་ཕྱོགས་ཁག་གཉིས་ཆགས་ནས་ཚོགས་འདུ་འཚོགས་མ་ཐུབ་པར་ལྷག་ཡོད་པས། ཟླ་འདིའི་ཚེས་༢༧ ནས་ཉིན་གཉིས་དང་ཕྱེད་རིང་དྷ་ས་གངས་སྐྱིད་སྲིད་སྐྱོང་ཚོགས་ཁང་དུ་ནང་མོལ་ཚོགས་འདུ་ཞིག་འཚོགས་ཡོད་ནའང་། ཐག་གཅོད་ག་རེ་བྱུང་ཡོད་པ་ཕྱིར་བསྒྲགས་མ་བྱས་པར་ཚོགས་འདུ་གྲོལ་ཡོད་པ་རེད།

ནང་མོལ་ཚོགས་འདུ་དེ་ཨ་རིའི་དང་ཡུ་རོབ་ནས་ཡོང་བའི་བོད་མི་མང་སྤྱི་འཐུས་རྣམས་ཀྱིས་གོ་སྒྲིག་བྱས་ཡོད་པ་དང་། ཚོགས་འདུའི་ཟིན་བྲིས་ཚོགས་ཆུང་ནང་སྤྱི་འཐུས་ཡོང་ཁུངས་ཆོལ་ཁ་དང་ཆོས་བརྒྱུད་རེ་ནས་མི་རེ་རེ་དང་། ཕྱི་རྒྱལ་ནས་མི་གཅིག་བཅས་མི་གྲངས་ལྔ་ལས་གྲུབ་པའི་ཚོགས་ཆུང་བཟོས་ཡོད་འདུག བརྗོད་གཞི་སྐབས་༡༧ པའི་གྲོས་ཚོགས་ཀྱི་དཀའ་སེལ་ཐབས་ལམ་སྐོར་ཡིན་པ་དང་། ཐག་གཅོད་སྤྱི་མོས་བྱུང་ན་སྨོས་མེད་དང་། ཡང་ན་ཚོགས་མི་ངོ་ཡོད་སུམ་ཆ་གཉིས་ཀྱིས་མོས་མཐུན་ཐག་གཅོད་བྱེད་རྒྱུ་བྱས་ནས། ཚོགས་འདུ་གྲོལ་རྗེས་གསར་འགོད་གསལ་བསྒྲགས་ཤིག་བྱེད་འཆར་ཡོད་ནའང་། རྗེས་སུ་ཚོགས་འདུ་དེའི་སྐོར་གསར་འགོད་པར་གང་ཡང་བཤད་རྒྱུ་མིན་པ་དང་། གལ་ཏེ་དགོས་གལ་བྱུང་ཚེ་གསར་འགོད་པར་འབྲེལ་བ་བྱེད་འཆར་འདུག

ནང་མོལ་དེའི་ཐོག་ཞུ་འགྲིག་ཐག་གཅོད་ཐུབ་པར་མི་མང་གིས་རེ་བ་ཆེན་པོ་བརྒྱབ་ཡོད་པ་དང་། དམ་འབུལ་ཞུ་ཕྱོགས་ཤོག་ཁག་ཆགས་པ་དེར་ཕྱོགས་གཉིས་ནས་གཉིས་ཀར་མོས་མཐུན་བྱེད་ཐུབ་མིན་སྐོར་དང་།  བཅའ་ཁྲིམས་དོན་ཚན་དང་པོའི་དགོངས་དོན་ལྟར། ༧གོང་ས་མཆོག་ལ་སྙན་སེང་ཞུས་ནས་ལམ་སྟོན་ཞུ་དགོས་སྐོར་ལ་སྤྱི་ཚོགས་ནང་རྒྱུན་རིང་གླེང་སློང་བྱུང་ཡོད་པ་རེད།

དེ་ཡང་ཕྱི་ཟླ་༦ པའི་ཚེས་༨ ཉིན་བོད་མི་མང་སྤྱི་འཐུས་ལྷན་ཚོགས་སྐབས་༡༧ པའི་སྤྱི་འཐུས་རྣམས་ཀྱི་དམ་འབུལ་མཛད་སྒོ་གངས་སྐྱིད་སྤྱི་འཐུས་ལས་ཁུངས་སུ་འཚོགས་པ་དང་། ཕྱོགས་གཉིས་ཆགས་རྐྱེན་ནི་འཐུས་མི་༢༡ གིས་བར་བརྒལ་ཚོགས་གཙོ་ཟླ་བ་ཚེ་རིང་གི་མདུན་ནས་དམ་འབུལ་བྱས་པ་དང་། བར་བརྒལ་ཚོགས་གཙོས་འདི་ལོའི་ཕྱི་ཟླ་༣ པའི་གྲོས་ཚོགས་ནང་འཕོ་འགྱུར་བཏང་ཟིན་པའི་ཁྲིམས་ཞིབ་པའི་མདུན་ནས་དམ་འབུལ་བྱས་པ་དེ་ཁྲིམས་མཐུན་ལ་ངོས་ལེན་མི་བྱེད་མཁན་སྤྱི་འཐུས་༢༢ ཀྱིས་༧གོང་ས་མཆོག་གི་སྐུ་པར་དང་བཅའ་ཁྲིམས་མདུན་ནས་དམ་འབུལ་བྱས་ནས། ཤོག་ཁག་གཉིས་ཆགས་པ་དང་། གྲོས་ཚོགས་འཚོག་རྒྱུ་དང་ཚོགས་གཙོ་གཞོན་འདེམས་མ་ཐུབ་པར་ལྷག་ཡོད་པ་རེད།

ད་ལྟའི་ཆར་གྲོས་ཚོགས་ནས་འཕོ་འགྱུར་བཏང་ཟིན་པའི་ཁྲིམས་ཞིབ་པ་རྣམས་ཀྱིས་ལས་མཚམས་བཞག་རྗེས། བསྐྱར་དུ་ལས་ཁུར་རྒྱུན་མཐུད་རྒྱུ་ཡིན་ཞེས་ཁྲིམས་ཞིབ་པའི་འགན་ཁུར་བ་དེར་མི་མང་ནང་ངོས་ལེན་མེད་པའི་ངོ་རྒོལ་བྱེད་མཁན་ཡང་བྱུང་ཡོད་པ་རེད།།

གསར་པ་ཆོས་ཉིད་འོད་ཟེར།