སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱ་གཞུང་གི་བཙོན་འོག་ཏུ་སྐུ་གྲོངས་པའི་ཉིན་མོ་རྗེས་དྲན།
ཟླ་འདིའི་ཚེས་༡༢ ་ཉིན་ནི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གི་བཙོན་འོག་ཏུ་སྐུ་གྲོངས་པའི་ཉིན་མོ་ཡིན་པས། དུས་དེ་དང་བསྟུན་ནས་རིན་པོ་ཆེ་མཆོག་གི་ཞབས་ཞུ་ཚོགས་པ་དང་ཚ་མོ་ཉི་མ་ལྷ་མོ་སོགས་ཀྱི་གོ་སྒྲིག་འོག སྐུ་མགྲོན་གཙོ་བོ་བདེ་སྲུང་བཀའ་བློན་རྒྱ་རི་སྒྲོལ་མ་དང་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་གཉིས་མཉམ་ཞུགས་ཐོག་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་རིན་པོ་ཆེ་ལ་མྱ་ངན་རྗེས་དྲན་དང་། ཚ་མོ་ཉི་མ་ལྷ་མོ་བཙོན་ཁང་དུ་རིན་པོ་ཆེ་མཇལ་འཕྲད་ཕྱིན་པ་སོགས་ཀྱི་སྐོར་(ཉི་མ་ལྷ་མོའི་བདེན་དོན་གླེང་བའི་གཏམ།) ་ཞེས་པའི་དཔེ་དེབ་ཅིག་དབུ་འབྱེད་གནང་སོང་།
སྐབས་དེར་སྐུ་མགྲོན་གཙོ་བོ་བདེ་སྲུང་བཀའ་བློན་རྒྱ་རི་སྒྲོལ་མས་རིན་པོ་ཆེ་བོད་ལ་ཕེབས་ནས་བོད་ཀྱི་ཆོས་དང་རིག་གཞུང་། མི་མང་གི་བདེ་སྡུག་སོགས་ཀྱི་ཐོག་ལ་ཕྱག་གནང་ཡོད་པ་དང་། རིན་པོ་ཆེའི་གནད་དོན་དེ་མི་སྒེར་ཞིག་གི་གནད་དོན་ཙམ་མ་ཡིན་པར་རྒྱལ་ཁབ་ཅིག་གི་གནད་དོན་ཆགས་ཡོད་པ་རེད་ཅེས་དང་། ཉི་མ་ལྷ་མོས་དམ་བཅར་བཞག་པ་ལྟར་ལག་བསྟར་བྱས་ཡོད་པ་དང་། ཉི་མ་ལྷ་མོ་ནི་བོད་ཀྱི་དཔའ་མོ་ཞིག་ལ་ངོས་འཛིན་བྱེད་ཀྱི་ཡོད་སོགས་གསུང་བཤད་གནང་སོང་།
སྐབས་དེར་རིན་པོ་ཆེ་མཆོག་གི་ཞབས་ཞུ་ཚོགས་པའི་ཚོགས་གཙོ་དགེ་བཤེས་ཚེ་རྡོར་གྱིས་རིན་པོ་ཆེ་མཆོག་ཁྲིན་འདུ་ཡི་འབར་གས་དོན་རྐྱེན་ཞིག་དང་འབྲེལ་བ་ཡོད་པའི་ཉེས་འཛུགས་འོག་ཕྱི་ལོ་༢༠༠༢ ལོ་འཛིན་བཟུང་བྱས་ནས། དུས་འགྱངས་སྲོག་ཁྲིམས་ནས་ཚེ་བཙོན་དུ་འགྱུར་བ་བཏང་བ་སོགས་བཙོན་འོག་ཏུ་ལོ་ངོ་༡༣ ཙམ་སྡུག་སྦྱོར་མནར་གཅོད་མྱངས་ཏེ། ཕྱི་ལོ་༢༠༡༤ ལོར་རྒྱ་གཞུང་གི་བཙོན་འོག་ཏུ་འདས་གྲོངས་སུ་ཕྱིན་ཡོད་པ་དང་། རིན་པོ་ཆེས་འདས་པའི་ལོ་ཟླའི་ནང་དཀའ་ངལ་ཇི་ཙམ་མྱངས་ན་ཡང་བློ་སྟོབས་ཇེ་ཆེར་འགྲོ་མཁན་ཞིག་ཡིན་པ་དང་། དེ་རིང་གི་ཉིན་མོ་ནི་རིན་པོ་ཆེ་འདས་གྲོངས་ཕྱིན་པའི་ཉིན་མོ་ཞིག་ཡིན་པ་དང་ཉིན་དེར་ང་ཚོས་དྲན་གསོ་བྱེད་རྒྱུ་ཧ་ལས་པའི་གལ་ཆེན་ཡིན་པ་སོགས་གསུངས་སོང་།
གཞན་ཡང་ཉི་མ་ལྷ་མོའི་བདེན་དོན་གླེང་བའི་གཏམ་ཞེས་པའི་དཔེ་དེབ་ཉམས་ཞིབ་དང་གནས་ཚུལ་ཞིབ་འབྲི་བ་རྡོ་རྗེ་རིན་ཆེན་གྱིས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་༧གོང་ས་མཆོག་གི་དགོངས་པ་བཞིན། བོད་ནང་དུ་རྒས་གསོ་ཁང་དང་སློབ་གྲྭ་གསར་འཛུགས། ཁོར་ཡུག་སྲུང་སྐྱོབ་དང་དགོན་སྡེ་ཁག་ཕྱག་བཏབ་པ། དོལ་རྒྱལ་ལམ་ཤུགས་ལྡན་བསྟེན་སྲོལ་བཀག་འགོག་བྱེད་རྒྱུ་སོགས་བོད་མི་རིགས་སྤྱིའི་རྩ་དོན་ལ་ཕན་ཐོགས་པའི་ཕྱག་ལས་མང་པོ་གནང་ཡོད་པ་དང་། ཕྱི་ལོ་༢༠༡༩ ནས་ད་བར་ལོ་ངོ་བཞི་ཙམ་གྱི་རིང་། སློབ་གྲྭའི་གུང་གསེང་དང་བསྟུན་ནས་དཔེ་དེབ་དེ་བྲིས་ཡོད་ཅེས་གསུངས་སོང་།
དེབ་དེའི་ནང་གི་གནས་ཚུལ་དང་འདྲ་པར་མཁོ་སྤྲོད་གནང་མཁན་ནི་རིན་པོ་ཆེའི་ཚ་མོ་ཉི་མ་ལྷ་མོ་ཡིན་པ་དང་། དེབ་དེའི་ནང་ཉི་མ་ལྷ་མོས་སི་ཁྲོན་ཁྲོན་ཏུང་བཙོན་ཁང་མདུན་དུ་རང་ལུས་མེར་སྲེག་གཏོང་རྩིས་གནང་བ་དང་། ཉི་མ་ལྷ་མོས་རིན་པོ་ཆེའི་སྐུ་གདུང་མཇལ་སྐབས་ཀྱི་སྣང་ཚུལ། ཉི་མ་ལྷ་མོས་༧གོང་ས་མཆོག་གི་གསེར་ཞལ་མཇལ་བ་དང་ཨ་རིའི་སྲིད་འཛིན་ཌོ་ནལ་ཊམ་ཕུ་ལ་བོད་དོན་ཞུ་སྐུལ་བྱས་པ་སོགས་ཀྱི་གནས་ཚུལ་མང་དག་ཅིག་འཁོད་འདུག།
གསར་འགོད་པ། བློ་བཟང་རྒྱ་མཚོ།
