བོད་མིའི་སྒྲིག་འཛུགས་ནང་སྲིད་ལས་ཁུངས་ནས་གསར་དུ་བསྐྲུན་པ་བོད་ནས་གསར་དུ་འབྱོར་བའི་སྦིར་ལི་ལི་གྲོང་སྡེའི་ཚོགས་ཁང་དུ། ལི་ལི་ཚོགས་པའི་གོ་སྒྲིག་འོག་བདེ་ཆེན་ཞིང་སྒྲུབ་ཅིག་ཕྱི་ལོ་༢༠༢༠ ཟླ་༢ ཚེས་༢༨ ནས་ཕྱི་ཟླ་༣ ཚེས་༡ བར་ཉིན་གྲངས་༣ རིང་འཚོགས་ཡོད་པ་དང་། སྐབས་དེར་དགེ་འདུན་པ་དང་མི་སྐྱ་ཕོ་མོ་བཅས་གྲངས་༡༢༠ བརྒལ་བ་ཞིག་མཉམ་ཞུགས་བྱས་ཡོད་པ་རེད།
སྦིར་ལི་ལི་ཚོགས་པའི་ཚོགས་གཙོ་སྐལ་བཟང་ཤེས་རབ་ཀྱིས། ད་ལན་བདེ་ཆེན་ཞིང་སྒྲུབ་འདིར་དཔལ་སྤུངས་བྱེས་ཀྱི་གདན་ས་ཤེས་རབ་གླིང་གི་སྤྲུལ་སྐུ་དམ་ཆོས་ནོར་བུ་བསྟན་པའི་རྒྱལ་མཚན་གྱིས་དབུ་བཞུགས་མཛད་ཐོག མཁན་པོ་དང་རྡོ་རྗེ་སློབ་དཔོན་དགེ་འདུན་པ་གྲངས་༣༠ ལྷག་ཙམ་གདན་འདྲེན་ཞུས་ཡོད་པ་དང་། དེའི་ཐོག་མི་སྐྱ་ཕོ་མོ་བཅས་ཁྱོན་མི་གྲངས་༡༢༠ ཙམ་འཚོགས་ཡོད་ཅེས་བརྗོད་སོང་། ཁོང་གིས་མུ་མཐུད་བདེ་ཆེན་ཞིང་སྒྲུབ་འདི་ཉིད་འཚོགས་དགོས་དོན་ནི། ད་བར་བཙན་བྱོལ་ནང་བདེ་ཆེན་ཞིང་སྒྲུབ་ཆེན་མོ་འཚོགས་པའི་ལོ་རྒྱུས་མ་ཐོས་ཤིང་། ད་ལན་ང་ཚོས་གོ་སྒྲིག་བྱས་པ་འདི་ཉིད་ཐོག་མ་ཆགས་ཡོད་ས་རེད་སྙམ། བོད་ནང་གི་ས་ཆ་སྟོད་སྨད་བར་གསུམ་གང་སར་བདེ་ཆེན་ཞིང་སྒྲུབ་འཚོགས་རྒྱུ་དེ་དར་སྲོལ་ཧ་ཅང་ཆེན་པོ་ཡོད་པས། བཙན་བྱོལ་ནང་དུའང་བདེ་ཆེན་ཞིང་སྒྲུབ་ཆེན་མོ་འཚོགས་པ་དགོས་པ་གལ་ཆེན་པོ་ཡིན་པ་དང་། མ་འོངས་པར་ཡང་མུ་མཐུད་དུ་འཚོག་ཐུབ་པའི་རེ་བ་བརྒྱབ་ཡོད། བཙན་བྱོལ་བོད་པའི་སྤྱི་ཚོགས་ནང་གྲྭ་བཙུན་སྔགས་གསུམ་ལ་དམིགས་པའི་ཆོས་ཕྱོགས་ཀྱི་སྨོན་ལམ་སོགས་མང་པོ་འཚོགས་སྲོལ་
ཡོད་ནའང་། མི་སྐྱ་ཕོ་མོའང་མཉམ་ཞུགས་ཆོག་པའི་ཆོས་ཚོགས་མང་པོ་མེད་སྟབས། བཙན་བྱོལ་ནང་དུའང་འདི་ལྟར་དགོས་པ་གལ་ཆེ་བར་མཐོང་བས། ད་ལན་བདེ་ཆེན་ཞིང་སྒྲུབ་འདི་ཉིད་འཚོགས་པ་ཡིན། བདེ་ཆེན་ཞིང་སྒྲུབ་འདིའི་དམིགས་ཡུལ་གཙོ་བོ་ནི་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་དབུས་རིས་མེད་ཀྱི་སྐྱེས་ཆེན་དམ་པ་རྣམས་སྐུ་ཚེ་ཞབས་པད་བརྟན་པ་དང་། བོད་དོན་བདེན་མཐའ་མྱུར་དུ་གསལ་ནས་གཞིས་བྱེས་མཉམ་འཛོམས་ཡོང་བ། དེ་བཞིན་རྒྱ་ནག་ཝུ་ཧན་གྲོང་ཁྱེར་གྱིས་གཙོས་རྒྱ་ནག་དང་། ཕྱིའི་རྒྱལ་ཁབ་ཁག ལྷག་པར་དུ་རང་རེ་བོད་ཀྱི་ས་ཁུལ་ཁག་ཅིག་ཏུའང་ཏོག་དབྱིབས་ནད་ཡམས་དེ་ཉིད་ཁྱབ་བརྡལ་དུ་འགྲོ་བཞིན་ཡོད་པ་དག་མྱུར་དུ་ཞི་ཞིང་། འཇིག་རྟེན་ཀུན་ཏུ་ནད་མུག་མཚོན་འཁྲུག་གི་འཇིགས་པ་ཐམས་ཅད་རང་སར་ཞི་ནས་བདེ་སྐྱིད་ཀྱི་དཔལ་ལ་རོལ་བ། མཁའ་ཁྱབ་ཀྱི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་འཐོབ་པའི་ཆེད་དུ་འཚོགས་པ་ཡིན་ཞེས་འགྲེལ་བརྗོད་གནང་སོང་།།
གསར་འགོད་པ་སྐལ་བཟང་དོན་གྲུབ།
