སྦིར་སྡེ་ནང་གཉིས་ཀྱིས་ཡུལ་མི་ཉམ་ཐག་ཅིག་ལ་ཁང་པ་གསར་རྒྱག་གི་རོགས་རམ།

ཕྱི་ལོ་ ༢༠༢༡ ཟླ་ ༡༡ ཚེས་ ༡༥ ཉིན་སྦིར་སུ་ཇ་བོད་ཁྱིམ་སློབ་གྲྭའི་ཉེ་འགྲམ་དུ་ཡོད་རྒྱ་གར་ཡུལ་མི་ཁྱིམ་ཚང་ཉམ་ཐག་ཅིག་ལ། བོད་ཁམས་བཟོ་ལས་ཚོགས་པའི་ཁྱབ་ཁོངས་སྡེ་ནང་གཞིས་ཆགས་གཉིས་ཀྱི་མི་མང་གིས་ཞལ་འདེབས་ཕུལ་ནས་སྡོད་ཁང་གསར་རྒྱག་གི་རོགས་རམ་འགོ་འཛུགས་བྱས་ཡོད་འདུག
རྒྱ་གར་ཧི་མ་ཅལ་སྦིར་ཁུལ་དུ་ཡོད་པ་བོད་པའི་གཞིས་ཆགས་དང་འདབས་འབྲེལ་རྒྱ་གར་ཡུལ་མི་ཁྱིམ་ཚང་ཉམ་ཐག་སྡོད་ཁང་གི་དཀའ་ངལ་ཆེན་པོ་ཡོད་པ་དང་། ཟས་གོས་གནས་མལ་གང་ཐད་ནས་དཀའ་ངལ་ཆེ་བའི་ཁྱིམ་ཚང་བུ་ཕྲུག་གསུམ་ཡོད་པ་ཞིག་གི་ཆེད་དུ། བོད་ཁམས་བཟོ་ལས་ཚོགས་པའི་ཁོངས་གཏོགས་སྡེ་དགེ་ཚོགས་པ་དང་། ནང་ཆེན་ཚོགས་པ་གཉིས་ཀྱི་ཚོགས་གཙོ་སོགས་ཀྱིས་འགན་ཁུར་ནས་གཞིས་ཆགས་གཉིས་ཀྱི་བོད་མི་རྣམས་ལ་ཞལ་འདེབས་བསྡུ་རུབ་བྱས་ནས་སྡོད་ཁང་གསར་རྒྱག་གི་མཐུན་འགྱུར་གནང་ཡོད་ཅིང་། ཕྱི་ཚེས་༡༥ ཉིན་བོད་མིའི་གཞིས་ཆགས་ཁག་གི་ས་གནས་འགོ་འཛིན་རྣམ་པ་དང་། ཚོགས་པ་ཁག་གི་ཚོགས་གཙོ་རྣམ་པ། ས་འཐུས་ཚོགས་གཙོ་བཅས་གནད་ཡོད་མི་སྣ་དང་། ས་གནས་རྒྱ་གར་ཡུལ་མིའི་གྲོང་སྡེའི་བརྒྱ་དཔོན་བཅས་འཛོམས་ནས་སྡོད་ཁང་གསར་རྒྱག་གི་རྩིག་རྨིང་འདིང་བའི་མཛད་སྒོ་སྟབས་བདེ་ཞིག་ཚོགས་ཡོད་པ་རེད།
དེ་བཞིན་ལོ་འདིའི་ཕྱི་ཟླ་༧ ཚེས་༦ སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་གྱི་མཛད་སྒོ་དང་སྟབས་བསྟུན་ནས་ཁྱིམ་ཚང་དེ་རང་ལ་ཟ་འབྲུ་དང་གྱོན་ཆས། བུ་ཕྲུག་ཆེ་བར་དྲ་ཐོག་ནས་སློབ་གྲྭར་འཛུལ་ཞུགས་ཐུབ་ཆེད་སེམས་སུང་(Samsung Smartphone)ཁ་པར་བཅས་སྤྲད་ཡོད་པ་དང་། དེའི་སྐོར་རྒྱ་གར་གྱི་གསར་ལམ་ཁག་ཏུ་ཁྱབ་བསྒྲགས་བྱུང་ཡོད་པ་རེད། དེ་ནས་བཟུང་ད་བར་ས་གནས་གཞིས་ཆགས་ཁག་གི་འབྲེལ་ཡོད་མི་སྣ་རྣམས་ལ་ཞལ་འདེབས་བསྡུས་ནས་སྡོད་ཁང་གསར་རྒྱག་ཐུབ་པ་ཞིག་བྱུང་ཡོད་པ་འདི་ནི། རྒྱ་གར་གཞུང་འབངས་གཉིས་བཙན་བྱོལ་བོད་མི་རྣམས་ལ་རོགས་རམ་རྒྱ་ཆེ་གནང་ཡོད་པར་བརྟེན། ད་ལྟ་བོད་མི་རྣམས་རང་འགོ་ཅུང་ཙམ་ཐོན་བའི་སྐབས་ས་གནས་ཀྱི་ཡུལ་མི་ཉམ་ཐག་རྣམས་ལ་རོགས་རམ་དགོས་པ་དེ་གལ་ཆེན་པོ་ཡིན་པ་དང་། རྒྱ་གར་གཞུང་འབངས་གཉིས་ལ་བཀའ་དྲིན་རྗེས་དྲན་དང་། བོད་མི་གནས་སྡོད་བྱེད་ཡུལ་ས་གནས་གཞན་ཁག་ལ་མིག་དཔེར་འོས་པ་ཞིག་ཀྱང་ཡོང་བའི་རེ་བ་ཡོད། ཕྱོགས་གཅིག་བོད་པ་དང་ཡུལ་མིའི་མཛའ་འབྲེལ་ལ་ཕན་ཐོགས་ཀྱང་ཡོད་པའི་སྐོར་བཅས་འབྲེལ་ཡོད་ཅིག་གིས་འདི་ག་གསར་ཁང་དུ་འགྲེལ་བཤད་གནང་སོང་། །

གསར་འགོད་པ་སྐལ་བཟང་དོན་གྲུབ།