སྦེལ་ལྗམ་དུ་གྷེན་ཋི་འཇམ་དབྱངས་བློ་འཕེལ་སློབ་གྲྭ་གསར་འཛུགས།

ཟླ་འདིའི་ཚེས་༨ ཉིན་སྦེལ་ལྗམ་གྷེན་ཋི་(Gent) ས་གནས་ཀྱི་བུ་ཕྲུག་ཅན་གྱི་བོད་རིགས་ཕ་མ་ཚོས་སྦེལ་ལྗམ་བོད་ཀྱི་ཆོས་རིག་འཛིན་སྐྱོང་ཁང་ལ་གྷེན་ཋི་ས་གནས་སུ་བོད་ཀྱི་སྐད་ཡིག་འཛིན་གྲྭ་ཞིག་གསར་འཛུགས་དགོས་པའི་རེ་སྐུལ་བྱུང་བར། སྦེལ་ལྗམ་བོད་ཀྱི་ཆོས་རིག་འཛིན་སྐྱོང་ཁང་གི་རྒྱུན་ལས་དང་འགན་འཛིན་ལྷན་ཚོགས་རིམ་པའི་ཐོག་གྲོས་བསྡུར་ཐག་ཆོད་བྱུང་དོན་བཞིན། ས་གནས་སུ་གུང་སེང་སྐབས་ཀྱི་བོད་ཀྱི་སྐད་ཡིག་འཛིན་གྲྭ་དངོས་སུ་སྒོ་འབྱེད་བྱས་སོང་།

དེ་ཡང་ཞོགས་པའི་ཆུ་ཚོད་ ༩ པའི་ཐོག་སྦེལ་ལྗམ་བོད་ཀྱི་ཆོས་རིག་འཛིན་སྐྱོང་ཁང་གི་སྤྱི་ཁྱབ་འགན་འཛིན་བློ་བཟང་དབང་འདུས་དང་། འགན་འཛིན་གཞོན་པ་འཇིགས་མེད། ཤེས་ཡོན་འགན་འཛིན་ལྷག་པ་ཚེ་རིང་། སློབ་སྟོན་པ་མེ་ཏོག་རིན་པོ་ཆེ། དྲུང་ཆེ་བཀྲ་ཤིས་བདེ་ལེགས། ས་གནས་ཀྱི་འགན་ཁུར་བ་དཀོན་མཆོག དེ་མིན་སྦུ་རུ་སལ། ཨེན་ཌོབ། ཨོ་སི་ཏན་ཏི། སྦུ་རོའུ་རྗེ་བཅས་ཀྱི་ས་གནས་སློབ་སྤྱི་རྣམས་མཉམ་འཛོམས་དང་མཛད་སྒོ་གོ་སྒྲིག་བྱས་ཤིང་། ཆུ་ཚོད་བཅུ་ཕྱེད་ཐོག་ས་གནས་ཀྱི་ཕ་མ་དང་བུ་ཕྲུག་བཅས་མཉམ་འཛོམས་ཀྱིས་བོད་ཀྱི་སྐད་ཡིག་འཛིན་གྲྭ་གསར་བའི་མཛད་སྒོ་དངོས་སུ་ཚུགས་པའི་རྟེན་འབྲེལ་དུ་བོད་རྒྱལ་ཁབ་ཆེན་པོའི་རྒྱལ་གླུ་བླངས་ཤིང་སྣང་གསལ་ཞལ་ཕྱེ་གནང་།

མཛད་སྒོའི་ཐོག་འགན་འཛིན་གཞོན་པ་འཇིགས་མེད་ཀྱིས་སྦེལ་ལྗམ་བོད་ཀྱི་ཆོས་རིག་འཛིན་སྐྱོང་ཁང་དང་འཇམ་དབྱངས་བློ་འཕེལ་སློབ་གྲྭའི་ས་གནས་ཁག་གི་འཛིན་གྲྭའི་བྱུང་རིམ་ངོ་སྤྲོད་བྱས།

ས་གནས་ཀྱི་འགན་ཁུར་བ་དཀོན་མཆོག་གིས་ས་གནས་སུ་བོད་ཀྱི་སྐད་ཡིག་འཛིན་གྲྭ་གསར་འཛུགས་དགོས་པའི་རྒྱབ་ལྗོངས་དང་གནས་བབ་འགྲེལ་བཤད་གནང་སྟེ། ཁོང་གིས་ས་གནས་སུ་བོད་མི་ཧ་ཅང་མང་པོ་ཞིག་མེད་ནའང་། བོད་ཀྱི་བུ་ཕྲུག་མང་པོ་ཞིག་སྐྱེས་ཤིང་འཚར་ལོངས་བྱུང་བཞིན་ཡོད་པར་བརྟེན།

བོད་ཀྱི་ཕྲུ་གུ་དེ་དག་ལ་ཆུང་ཆུང་སྐབས་ནས་བོད་མི་རིགས་ཀྱི་སྐད་ཡིག་གིས་གཙོས་པའི་ཆོས་དང་རིག་གཞུང་སློབ་ཐབས་བྱེད་དགོས་པ་ང་ཚོའི་ལས་འགན་གལ་ཆེན་ཞིག་ཆགས་ཡོད་པར་བརྟེན། སྔོན་མ་ཞིག་ནས་དེའི་སྐོར་ལ་ཕ་མ་རྣམས་ཀྱིས་གཙོས་པའི་མང་ཚོགས་ནང་སྔ་ཕྱི་རིམ་པར་བགྲོ་གླེང་དང་གྲོས་བསྡུར། རྒྱུས་ལོན་བྱས་པ་བརྒྱུད། མཐར་སྦེལ་ལྗམ་བོད་ཀྱི་ཆོས་རིག་འཛིན་སྐྱོང་ཁང་ལ་རེ་སྐུལ་སྙན་ཞུ་ཕུལ་ཏེ། དེ་རིང་དངོས་སུ་བོད་ཀྱི་སྐད་ཡིག་འཛིན་གྲྭ་གསར་འཛུགས་བྱུང་བར་སྙིང་ཐག་པ་ནས་དགའ་ཚོར་དང་། འབྲེལ་ཡོད་རྣམས་ལ་ཐུགས་རྗེ་ཆེ་ཞུ་གི་ཡོད་ཅེས་གསུངས།

སྦེལ་ལྗམ་བོད་ཀྱི་ཆོས་རིག་འཛིན་སྐྱོང་ཁང་གི་ཤེས་ཡོན་འགན་འཛིན་ལྷག་པ་ཚེ་རིང་གིས་སློབ་གྲྭའི་ཤེས་ཡོན་དང་སློབ་གསོའི་ལས་དོན་བྱེད་ཕྱོགས་ཀྱི་ལམ་སྟོན་གཏམ་བཤད་གནང་བ་དང་། རིམ་བཞིན་ས་གནས་གཞན་དག་གི་སློབ་སྤྱི་རྣམ་པས་ས་གནས་སོ་སོའི་གནས་བབ་དང་འབྲེལ་བའི་ཉམས་མྱོང་གི་ལམ་སྟོན་གཏམ་བཤད་བྱས།

རིམ་བཞིན་ས་གནས་གྷེན་ཋི་འཇམ་དབྱངས་བློ་འཕེལ་སློབ་གྲྭའི་སློབ་སྤྱི་དང་དགེ་རྒན་གསུམ་བཅས་བསྐོ་བཞག་བྱས་སྟེ། ༸གོང་ས་སྐྱབས་མགོན་ཆེན་པོ་མཆོག་གིས་བཀའ་དྲིན་གསོལ་བསྩལ་གནང་བའི་འཇམ་དབྱངས་བློ་འཕེལ་ཅེས་པའི་སློབ་གྲྭའི་མཚན་བྱང་ཞིག་ས་གནས་ལ་ཕུལ་ཡོད་པ་རེད།

སློབ་སྟོན་པ་མེ་ཏོག་རིན་པོ་ཆེས་བོད་ཀྱི་སྐད་ཡིག་སློབ་གསོའི་ལས་དོན་སྤེལ་དགོས་པའི་བཀའ་སློབ་ལམ་སྟོན་གནང་གྲུབ་པ་དང་། ཨེན་ཌོབ་ནས་ཆེད་དུ་ཕེབས་པའི་སློབ་ཕྲུག་རྣམས་ཀྱིས་ས་གནས་གྷེན་ཋི་ལ་འཇམ་དབྱངས་བློ་འཕེལ་སློབ་གྲྭའི་འཛིན་གྲྭ་གསར་པ་དངོས་སུ་སྒོ་འབྱེད་བྱས་པར་དགའ་སྤྲོའི་རྟེན་འབྲེལ་གྱི་གཞས་སྣ་འཁྲབ་སྟོན་བྱས་སྟེ། གྷེན་ཋི་འཇམ་དབྱངས་བློ་འཕེལ་སློབ་གྲྭ་གསར་འཛུགས་ཀྱི་མཛད་སྒོ་གྲོལ་ཡོད་པ་རེད།

༼འཇམ་དབྱངས་བློ་འཕེལ།༽ ཞེས་པ་ནི་༸སྤྱི་ནོར་༸གོང་ས་སྐྱབས་མགོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་སྦེལ་ལྗམ་བོད་ཀྱི་ཆོས་རིག་འཛིན་སྐྱོང་ཁང་གིས་སྦེལ་ལྗམ་ས་གནས་སུ་བོད་ཀྱི་སྐད་ཡིག་སློག་གྲྭ་གསར་འཛུགས་བྱེད་བཞིན་པའི་ལས་དོན་ལམ་ལྷོངས་འོང་བར་ཐུགས་སྨོན་རྗེས་འཛིན་དང་བཅས་གནང་བའི་མཚན་བྱང་གནང་བ་ཡིན་པ་དང་། གྷེན་ཋི་འཇམ་དབྱངས་བློ་འཕེལ་སློབ་གྲྭའི་འཛིན་གྲྭ་ནི་སྦེལ་ལྗམ་ཆོས་རིག་འཛིན་སྐྱོང་ཁང་གིས་བོད་ཀྱི་སྐད་ཡིག་འཛིན་གྲྭ་གསར་འཛུགས་བྱས་པའི་ས་གནས་དྲུག་པ་དེ་ཡིན་པ་དང་། ས་གནས་ཐོག་མའི་འགོ་འཛུགས་སྐབས་འཛིན་གྲྭར་དངོས་སུ་ཞུགས་རྒྱུར་ལོ་ཚོད་ལོན་པའི་སློབ་མ་བཅུ་ཕྲག་ལྷག་ཡོད་འདུག འདི་ཕྱི་རྒྱལ་ཁག་ཏུ་བོད་པའི་ཕྲུ་གུ་ཚོར་སོ་སོའི་སྐད་ཡིག་དང་རིག་གཞུང་སློབ་ཆེད་དུས་རྒྱུན་གཟའ་སྤེན་པ་ཉི་མ་འཚོག་གི་ཡོད་པ་དང་གཅིག་མཚུངས་གུང་སྐབས་འཛིན་གྲྭ་འཚོག་རྒྱུ་ཡིན་པ་རེད།།
ས་གནས་གསར་འགོད་པ་ནགས་ཕྲན་པ་བསོད་ནམས་ཚེ་རིང་།