སྨན་རིའི་ཁྲི་འཛིན་ལ་བརྟན་བཞུགས།

ཕྱི་ཟླ་༡༠ ཚེས་༣༡ ནས་ཉིན་གསུམ་གྱི་རིང་ལ་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་སྐྱབས་རྗེ་མཁན་སློབ་རྣམ་གཉིས་ལ་བཀའ་དྲིན་རྗེས་དྲན་བརྟན་བཞུགས་བསྟར་འབུལ་ཞུས་ཡོད་པ་རེད།

དེ་ཡང་སྤྱི་འཐུས་བ་ར་ཚེ་དབང་བཀྲ་ཤིས་ཀྱིས་གནས་ཚུལ་འགྲེལ་བརྗོད་གནང་བ་ལྟར་ན། བརྟན་བཞུགས་དེའི་གོ་སྒྲིག་ཚོགས་པ་ལ་གཡུང་དྲུང་བོན་འཛིན་སྐྱོང་ལྷན་ཚོགས་དང་བཤད་སྒྲུབ་འདུས་སྡེ། སྨན་རིའི་གྲྭ་ཚང་བཅས་གཙོས་པའི་ཚོགས་པ་ཆེ་ཕྲ་ཁག་གིས་མཐུན་འགྱུར་དང་དཔུང་འདེགས་བྱས་ཡོད་པ་དང་། ཉིན་དང་པོར་༧སྐྱབས་རྗེ་རྒྱལ་བ་སྨན་རི་བ་མཆོག་གི་བཀའ་དགོངས་བཞིན་༧སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེས་བོད་ཕྱི་ནང་གཉིས་དང་ནུབ་ཕྱོགས་ཡུལ་གྲུ་ཁག་ནས་ཆེད་ཕེབས་གནང་བའི་བླ་སྤྲུལ་སེར་སྐྱ་དད་ལྡན་ཡོངས་ལ་སྙིང་པོ་རྣམ་གསུམ་གྱི་ལྗགས་ལུང་དང་བཀའ་ཁྲིད་བསྩལ་ཡོད་པ་དང་། དེ་རྗེས་བླ་སྤྲུལ་དགེ་བཤེས་རྣམས་དང་དགེ་འདུན་པ་དང་བཙུན་མ་ཡོངས་ཀྱིས་དཔལ་གཤེན་བསྟན་སྨན་རིའི་ཚོགས་ཁང་ཆེན་མོ་ལ་རྒྱལ་བའི་གསུང་རབ་མདོ་འབུམ་ལྗགས་ཀློག་གནང་ཡོད་པ་དང་། དད་ལྡན་མང་ཚོགས་རྣམས་ཀྱིས་ལམ་འཕྲང་བཅོས་པ་དང་། ཚ་ཚ་གདབ་པ་སོགས་རྒྱུན་བཞིའི་གེགས་སེལ་རིགས་ལ་འབད་འབུངས་གནང་ཡོད་པ་རེད།

ཉིན་གཉིས་པར་སྐྱབས་རྗེ་སྨན་རི་བ་མཆོག་གི་སྐུའི་བླ་གཟའི་ཉིན་ཞོགས་པ་ཐོག་མར་སྐྱ་སེར་མི་མང་ཚང་མ་ལྷ་རྒྱལ་རི་རྩེར་འདུ་འཛོམས་ཀྱིས་དཀར་ཕྱོགས་སྐྱོང་བའི་ལྷ་ཚོགས་ལ་བསང་གསོལ་རྒྱས་འབུལ་དང་འབྲེལ་རླུང་དར་སྒྲོན་འཛུགས་དང་ཀི་བསྭོ་ལྷ་རྒྱལ་གནང་ཡོད་པ་དང་། དེ་རྗེས་༧སྐྱབས་རྗེ་རྒྱལ་བ་སྨན་རི་བ་མཆོག་ལ་དངོས་གཞིའི་བརྟན་བཞུགས་དབུ་འཛུགས་ཀྱིས་ཆོ་ག་གཞུང་གིས་ཚིག་བཤད་ལྟར་འབུལ་ཚན་ཁག་རིམ་བཞིན་འདེགས་འབུལ་དང་མཇལ་ཁ་ཞུས་ཡོད་པ་རེད།

ཕྱི་དྲོ་བརྟན་བཞུགས་གོ་སྒྲིག་ཚོགས་པའི་ཚོགས་མི་ལྷན་རྒྱས་ལ། དཔལ་ལྡན་སྨན་རིའི་བླ་བྲང་དུ་༧སྐྱབས་རྗེ་དཔོན་སློབ་རིན་པོ་ཆེ་མཆོག་གིས་བཀའ་སློབ་གསུང་བཤད་དང་ཐུགས་རྗེ་ལེགས་གསོལ་དང་སྐུ་པར་མཐོང་གྲོལ་རིན་པོ་ཆེ་དང་དམ་རྫས་བྱིན་མདུད་བཅས་གསོལ་རས་གནང་།

ཉིན་མཐའ་མའི་ཞོགས་པར་༧སྐྱབས་རྗེ་དཔོན་སློབ་རིན་པོ་ཆེ་མཆོག་ནས་དད་ལྡན་མང་ཚོགས་རྣམས་ལ་དྲན་པ་ཚེ་སྒྲུབ་ཀྱི་བཀའ་དབང་བསྩལ་བ་དང་། དེ་རྗེས་སྐུ་མགྲོན་རྣམ་པ་དང་སེར་སྐྱ་མི་མང་ལྷན་རྒྱས་བོན་ཕྲུག་བདེ་དོན་རྩེད་ཐང་བརྟན་བཞུགས་དགའ་སྟོན་མཛད་སྒོའི་ཚོགས་གུར་དུ་གདན་འཛོམས་གནང་ནས། བརྟན་བཞུགས་གོ་སྒྲིག་ཚོགས་པའི་ཚོགས་གཙོ་ཀུན་གསལ་ཟླ་བ་ཡིས་བརྟན་བཞུགས་འདིའི་བྱུང་རིམ་དང་ཐུགས་རྗེ་ལེགས་གསོལ་ཞུ་དགོས་རིགས་ཡོངས་ལ་ཞུས་གནང་སོང་།

མཇག་ཏུ་གཞས་སྣ་འཁྲབ་སྟོན་རིམ་པ་བཞིན་མཛད་མཐར་༧གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་དྲུང་ཆེ་དགེ་བཤེས་ཟླ་བ་དར་རྒྱས་ཀྱིས་དཔལ་གཤེན་བསྟན་སྨན་རིའི་གླིང་གི་འདུས་སྤྱིའི་ཚབ་ཞུས་ཏེ་ཕྱོགས་མཐའ་ཁག་ནས་ཕེབས་པའི་སྐུ་མགྲོན་གཙོ་བོར་གྱུར་པའི་སེར་སྐྱ་མང་ཚོགས་ལ་ཐུགས་རྗེ་ལེགས་འབུལ་གསུང་བཤད་གནང་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།