སྨན་རྩིས་ཁང་དུ་སྔོ་སྨན་བགོ་བགྲེམས་ཀྱི་མཛད་སྒོ་འཚོགས་སོང་།

རྒྱ་གར་དབུས་གཞུང་གི་ལོ་འཁོར་མར་རྒྱ་གར་གྱི་ས་གནས་ཁག་ཏུ་སྲོལ་རྒྱུན་གྱི་སྔོ་སྨན་བགོ་བགྲེམས་ལས་འཆར་སྤེལ་གྱི་ཡོད་པ་ལྟར། ཟླ་༩ པའི་ཚེས་༣ ཉིན་རྡ་སར་རྟེན་གཞི་བྱས་པའི་དབུས་བོད་ཀྱི་སྨན་རྩིས་ཁང་དུ་སྔོ་སྨན་བགོ་བགྲེམས་ཀྱི་མཛད་སྒོ་འཚོགས་ཡོད་པ་རེད།

དེ་ཡང་བོད་ཀྱི་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་གིས་ད་ལོ་རྒྱ་གར་རང་བཙན་ཐོབ་ནས་ལོ་ངོ་༧༥ འཁོར་བ་དང་བསྟུན། རྒྱ་གར་དབུས་གཞུང་གིས་སྲོལ་རྒྱུན་གྱི་སྔོ་སྨན་འདེབས་ལས་ཐོག་ཤུགས་ཞེ་དྲག་རྒྱག་གནང་གི་ཡོད་པ་རེད། འོན་ཀྱང་སྨན་རྩིས་ཁང་གིས་ཕྱི་ལོ་༡༩༩༤ དང་༡༩༩༥ ལོ་ཙམ་ནས་ཁོར་ཡུག་ལ་གནོད་སྐྱོན་མེད་པའི་ཐོག་ནས་སྨན་རྩ་འདེབས་ལས་ཀྱི་ལས་གཞི་འགོ་བཙུགས་ནས། སྨན་རྩ་ཡག་པོ་བཏབ་ཡོད་པ་རེད། དེ་རིང་རྒྱ་གར་གཞུང་གིས་ང་ཚོར་སྔོ་སྨན་བགོ་འགྲེམས་ཀྱི་ལས་གཞི་གོ་སྒྲིག་བྱེད་རོགས་ཞུས་པས་གོ་སྒྲིག་ཞུས་པ་ཞིག་ཡིན་པས། ཐེངས་འདིར་སྔོ་སྨན་༡༡༣ བགོ་འགྲེམས་གནང་གི་ཡོད་སྐོར་འགྲེལ་བརྗོད་གནང་སོང་། 

དེ་བཞིན་སྨན་རྩིས་ཁང་ལས་གཞི་དེའི་མཉམ་ཞུགས་བྱེད་དགོས་དོན་ནི་རྒྱ་གར་གཞུང་གི་ཨ་ཡུར་ཤེ་ནང་དུ་བོད་སྨན་དེ་གསོ་བ་རིག་པ་ཞེས་ངོས་འཛིན་བྱེད་ཀྱི་ཡོད་པས་མཉམ་ཞུགས་བྱས་པ་ཡིན་པ་དང། རྒྱ་གར་རྒྱལ་ཡོངས་སུ་གསོ་བ་རིག་པའི་སློབ་གྲྭ་དང་སྨན་ཁང་སོགས་ཀྱིས་ལས་འཆར་དེར་མཉམ་ཞུགས་ཤུགས་ཆེན་པོ་བྱེད་ཀྱི་ཡོད། དེ་བཞིན་ཏོག་དབྱིབས་ནད་དུག་གི་གནས་སྟངས་འོག བོད་དང་རྒྱ་གར་ནས་སྨན་རྩིས་ཁང་ལ་མཁོ་བའི་སྨན་རྩ་རིགས་ཐོབ་རྒྱུར་དཀའ་ངལ་འཕྲད་མེད་སྐོར་གསུངས་སོང་།

སྤྱིར་བཏང་བྱས་ན་རྒྱ་གར་རང་བཙན་ཐོབ་ནས་ལོ་༧༥ འཁོར་གྱི་ཡོད་པས་སྔོ་སྨན་༧༥ བགོ་འགྲེམས་གནང་འཆར་ཡོད་ཀྱང་། སྨན་རྩིས་ཁང་ནས་༧གོང་ས་མཆོག་དགུང་ལོ་༡༡༣ བཞུགས་པའི་རྟེན་འབྲེལ་ཆེད་དུ་སྔོ་སྨན་༡༡༣ བགོ་བགྲེམས་གནང་བའི་རེ་སྐུལ་ཞུས་པ་ལྟར་རྒྱ་གར་གཞུང་ནས་ཞལ་བཞེས་ཐོབ་ཡོད་འདུག 

འགན་འཛིན་བཀྲ་ཤིས་ཚེ་རིང་གིས་གསུང་དོན་ལ། སྨན་རྩིས་ཁང་གི་སྨན་རྩ་འདེབས་ལས་ཀྱི་ལས་གཞིར་རྒྱ་གར་གཞུང་གི་ཨ་ཡུ་ཤེ་ལས་ཁང་གིས་སྨན་རྩིས་ཁང་གི་མིང་ཐོག་ནས་མིན་པར་ཅོན་ཏ་ར་གསོ་བ་རིག་པའི་མིང་ཐོག་ནས་རོགས་རམ་བྱེད་ཀྱི་ཡོད་པ་དང། དེ་བཞིན་སྔོ་སྨན་འདེབས་ལས་ཀྱི་སྦྱོང་བརྡར་ཡང་སྤྲོད་ཀྱི་ཡོད་པ། སྨན་རྩིས་ཁང་ནས་རྒྱ་གར་གྱི་གྲོང་ཁྱེར་བྷེང་ལོར་གྱི་མཐའ་རུ་ཡོད་པའི་སྨན་རྩིས་མཐོ་སློབ་ཀྱི་དགེ་རྒན་ཚོའི་གླ་ཕོག་དེ་རྒྱ་གར་གཞུང་ནས་རོགས་རམ་ཐོབ་ཐབས་བྱེད་ཀྱི་ཡོད་སྐོར་གསུངས་སོང་།།

གསར་འགོད་པ་སྐལ་བཟང་དོན་གྲུབ།