སྨན་རྩིས་ཁང་བོད་ཀྱི་སྨན་པའི་ལྷན་ཚོགས་ནས་ཕྱིར་འཐེན་བྱས་འདུག 

ཟླ་༡༠ པའི་ཚེས་༡༡ ཉིན་དྷ་སར་རྟེན་གཞི་བྱས་པའི་བོད་ཀྱི་སྨན་རྩིས་ཁང་གི་ཚོགས་ཁང་དུ། དབུས་བོད་ཀྱི་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་གིས་གསར་འགོད་ལྷན་ཚོགས་ཤིག་བསྐོངས་ནས། གནད་དོན་གཉིས་ཀྱི་ཐོག་ལ་གསལ་བསྒྲགས་བྱས་སོང་།

དེ་ཡང་ལོ་རྗེས་མའི་ཟླ་༢ པའི་རྗེས་སུ་དབུས་བོད་ཀྱི་སྨན་རྩིས་ཁང་ནས་འཛིན་རིམ་གཉིས་རྒྱ་གར་ལྷོ་ཕྱོགས་ཀར་ན་ཀྲ་ཀ་མངའ་སྡེའི་བྷེང་ལོར་ཉེ་འགྲམ་དུ་གནས་སྤོ་བྱེད་རྒྱུ་ཡིན་པ་དང་། མཐོ་སློབ་རྒྱ་བསྐྱེད་ཀྱི་ལས་གཞི་དང་འབྲེལ་ནས། དགེ་རྒན་གསོ་སྐྱོང་སོགས་ཀྱི་ལས་གཞི་འགྲོ་མུས་ཡིན་པ། དེ་བཞིན་མ་འོངས་པར་སྨན་སྦྱོར་ཁང་རྒྱ་བསྐྱེད་ཀྱི་ལས་གཞི་སྤེལ་རྒྱུ་ཡིན་སྐོར་འགྲེལ་བརྗོད་གནང་སོང་།

དེ་རྗེས་ཁོང་གིས་དབུས་བོད་ཀྱི་སྨན་རྩིས་ཁང་དེ་དེ་རིང་ནས་བོད་ཀྱི་སྨན་པའི་ལྷན་ཚོགས་(བོད་ཀྱི་གསོ་བ་རིག་པའི་སྨན་པའི་ལྷན་ཚོགས་)ཀྱི་ཚོགས་མི་ནས་ཕྱིར་འཐེན་བྱས་པ་ཡིན་པའི་གསལ་བསྒྲགས་བྱས་ཏེ། དེ་ཡང་ཐོག་མར་བོད་ཀྱི་སྨན་པའི་ལྷན་ཚོགས་དེ་རྒྱ་གར་དབུས་གཞུང་གིས་ངོས་འཛིན་བྱེད་ཀྱི་མེད་ཁར། དབུས་བོད་ཀྱི་སྨན་རྩིས་ཁང་དེ་ནི་རྒྱ་གར་དབུས་གཞུང་གིས་༧གོང་ས་མཆོག་གི་མཐོ་སློབ་ཅིག་ཡིན་པའི་ངོས་འཛིན་ཐོག་ནས་ལྟ་སྐྱོང་ཞིག་བྱེད་ཀྱི་ཡོད་བཞིན་པ་དང་། རྒྱ་གར་གྱི་སྨན་པའི་ལྷན་ཚོགས་ཤིག་ཡོད་པས། སྨན་རྩིས་ཁང་བོད་ཀྱི་སྨན་པའི་ལྷན་ཚོགས་ཀྱི་འབྲེལ་ཡོད་ཚོགས་མི་མུ་མཐུད་བསྡད་ཚེ་ཡག་པོ་མི་འདུག དེའི་ཐོག་བོད་ཀྱི་སྨན་པའི་ལྷན་ཚོགས་དེ་བཙུགས་པའི་ཉིན་མོ་དང་པོ་ནས་བཟུང་། བོད་ཀྱི་སྨན་རྩིས་ཁང་གི་སྨན་པ་རྣམས་ཀྱི་ཁྲོད་དུ་ལྟ་ཚུལ་མང་པོ་ཞིག་ཡོད་སྐོར་འགྲེལ་བརྗོད་གནང་སོང་།

དེ་བཞིན་ཁོང་གིས་འགྲེལ་བརྗོད་གནང་དོན་ལ། སྨན་པའི་ལྷན་ཚོགས་ཀྱིས་བོད་མི་མང་སྤྱི་འཐུས་ཀྱིས་གཏན་ལ་ཕབ་པའི་ལས་འགན་གཙོ་བོ་གསོ་རིག་ཐོག་བྱ་རའམ་སྟངས་འཛིན་བྱེད་རྒྱུ་ཡིན་པ་དེ་མ་བྱས་པར། སློབ་གྲྭ་དང་སྨན་པ་མང་དུ་གཏོང་ཐབས་བྱེད་བཞིན་པ་དང་། ལ་དྭགས་ཁུལ་དུ་སྨན་པའི་དེབ་སྐྱེལ་ལག་ཁྱེར་མང་པོ་ཞིག་སྤྲད་ཡོད་པར་བརྟེན། ཨ་ཡུ་ཤུ་སྨན་པ་མང་པོ་ཞིག་ལ་སྨན་རྩིས་ཁང་ནས་ཀྱང་གསོ་རིག་གི་ལག་ཁྱེར་སྤྲོད་དགོས་སྐོར་བརྗོད་མཁན་མཐོ་རིམ་དཔོན་པོ་ཁག་ཅིག་བྱུང་བས་ཁས་ལེན་བྱས་མེད། དེ་བཞིན་རྒྱ་གར་དབུས་གཞུང་གི་མིག་ལམ་དུ་བོད་ཀྱི་སྨན་པའི་ལྷན་ཚོགས་ལ་མཐོང་ཚུལ་ཡག་པོ་མེད་པས། ༧གོང་ས་མཆོག་གི་མཐོ་སློབ་ལ་ངོས་འཛིན་བྱེད་བཞིན་པའི་སྨན་རྩིས་ཁང་གི་མཐོ་སློབ་དང་སྨན་སྦྱོར་གཉིས། ལྷན་ཚོགས་ཀྱི་ཚོགས་མིའི་དེབ་སྐྱེལ་ཁོངས་ནས་ཕྱིར་འཐེན་བྱེད་རྒྱུ་ཡིན་སྐོར་འགྲེལ་བརྗོད་གནང་སོང་།།

གསར་འགོད་པ་སྐལ་བཟང་དོན་གྲུབ།