སྲིད་བློན་མཱི་རྡི་ལ་རྒྱབ་སྐྱོར་ཉུང་དུ་ཕྱིན་འདུག་ཀྱང་ཕྱི་ལོ་༢༠༢༤ ལོར་ཁ་གཏད་གཅོག་ཐུབ་མཁན་ཁག་པོ་ཡིན་འདུག

ཉེ་ཆར་རྒྱ་གར་རྒྱལ་ཡོངས་ཀྱི་བསམ་ཚུལ་བསྡུ་ལེན་ཁག་ཅིག་གི་གྲུབ་དོན་དུ། ཏོག་དབྱིབས་ནད་དུག་དང་དཔལ་འབྱོར་སོགས་ལ་བརྟེན་ནས་ལས་ཁུར་སྲིད་བློན་མཱོ་རྡི་ལ་རྒྱབ་སྐྱོར་བྱེད་མཁན་གྱི་བརྒྱ་ཆ་དེ་སྔོན་མ་དང་བསྡུར་ན་དམའ་རུ་སོང་ཡོད་འདུག་ཀྱང་། ཕྱོགས་འགལ་ཚོགས་པ་ཚོའི་སྟོབས་ཤུགས་ཞན་པས་ཕྱི་ལོ་༢༠༢༤ ལོར་སྲིད་བློན་གྱི་ལས་གནས་སུ་བསྐྱར་དུ་སླེབས་རྒྱུར་རེ་བ་ཆེན་པོ་ཡོད་འདུག 

ཟླ་༨ པའི་ཚེས་༢༤ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཟླ་༧ པའི་རྒྱ་གར་གྱི་གསར་ཁང་དེ་རིང་གི་རྒྱ་གར་ཞེས་པ་དེས་མི་མང་༡༤,༦༠༠ ལ་བསམ་ཚུལ་བསྡུ་ལེན་གྱི་ལས་དོན་ཞིག་སྤེལ་འདུག་པ་དང་། དེའི་གྲུབ་དོན་དུ་ལན་འདེབས་པའི་ཁོངས་ནས་བརྒྱ་ཆ་༢༤ གཅིག་པུས་ཕྱི་ལོ་༢༠༢༤ ལོའི་སྲིད་བློན་དུ་ལས་ཁུར་སྲིད་བློན་མཱི་རྡི་རན་འཚམ་ཡོད་སྐོར་བརྗོད་འདུག་པ་དང་། གྲུབ་དོན་དེ་ནི་ལོ་སྔོན་མའི་གྲུབ་དོན་དང་བསྡུར་ན་བརྒྱ་ཆ་༤༢ ཆགས་པ་ཡིན་འདུག 

དེ་ཡང་རྒྱ་གར་ནང་དུ་ཏོག་དབྱིབས་ནད་དུག་གི་ནད་རླབས་གཉིས་པའི་སྐབས་སུ་མི་རྒྱུ་གཉིས་ལ་གྱོང་གུད་ཚབས་ཆེན་བྱུང་ཡོད་པ་མ་ཟད། དཔལ་འབྱོར་ཉམས་རྒུད། ས་སྣུམ་དང་ཟས་རིགས་གི་རིན་གོང་འཕར་བ། ཞིང་པའི་ཁྲིམས་གསར་དང་འབྲེལ་ནས་ཞིང་པའི་གཞི་རྒྱ་ཆེ་བའི་ངོ་རྒོལ་ལས་འགུལ་ཆེན་མོ། ལས་མེད་ཀྱི་མི་མང་གི་ཁ་གྲངས་འཕར་བཞིན་པ་སོགས་ལ་བརྟེན་ནས་སྲིད་བློན་མཱོ་རྡི་ལ་རྒྱབ་སྐྱོར་བྱེད་མཁན་ཉུང་དུ་ཕྱིན་པར་ངོས་འཛིན་བྱེད་བཞིན་འདུག དེ་བཞིན་ལན་འདེབས་པ་བརྒྱ་ཆ་༧༠ ཡིས་ཏོག་དབྱིབས་ནད་དུག་གི་སྐབས་སུ་ཡོང་འབབ་ཆགས་ཡོད་པ་དང་། རྒྱ་གར་དབུས་གཞུང་གིས་ཏོག་དབྱིབས་ནད་དུག་ལ་བརྟེན་ནས་མི་མང་གི་ཚེ་སྲོག་ཤོར་བའི་གཞུང་འབྲེལ་ཁ་གྲངས་༤༣༠,༠༠༠ དེ་ནི་བདེན་པ་མིན་པ་དང་། ཁ་གྲངས་དངོས་གནས་དེ་ལས་མཐོ་བ་ཡོད་པར་ངོས་འཛིན་བྱེད་ཀྱི་ཡོད་འདུག 

ལན་འདེབས་པ་བརྒྱ་ཆ་༣༦ གིས་སྲིད་བློན་མཱོ་རྡི་ཡིས་ཏོག་དབྱིབས་ནད་དུག་ཁྱབ་གདལ་སྔོན་འགོག་གི་ལས་དོན་ཡག་པོ་བྱས་ཡོད་སྐོར་བརྗོད་འདུག་པ་དང་། བརྒྱ་ཆ་༡༣ གྱིས་ཏོག་དབྱིབས་དང་འབྲེལ་ནས་མི་མང་གི་དཀའ་སྡུག་ཉེས་པ་དེ་མཱོ་རྡི་ལ་ཡོད་པ་ངོས་འཛིན་བྱས་འདུག བརྒྱ་ཆ་༤༤ ཡིས་དབུས་གཞུང་དང་མངའ་སྡེ་གཞུང་གཉིས་ཀས་ནད་དུག་སྔོན་འགོག་ལས་དོན་ལ་འཐུས་ཤོར་བཏང་ཡོད་སྐོར་བརྗོད་འདུག 

དེ་བཞིན་བསམ་ཚུལ་བསྡུ་ལེན་བྱེད་མཁན་མི་འདྲ་བ་ཁག་གཉིས་ཀྱིས་སྲིད་བློན་མཱོ་རྡི་ལ་རྒྱབ་སྐྱོར་བྱེད་མཁན་གྱི་བརྒྱ་ཆ་ཆུང་དུ་ཕྱིན་ཡོད་ཀྱང་། ཕྱོགས་འགལ་ཚོགས་པའི་འགོ་ཁྲིད་ཁག་ལས་ལྡབ་གཉིས་ཀྱིས་མཐོ་བ་ཡོད་པས། ཕྱི་ལོ་༢༠༢༤ ལོའི་སྲིད་བློན་དུ་ཁོང་ལ་ཁ་གཏད་ཡག་པོ་གཅོག་ཐུབ་མཁན་ཁག་པོ་ཡིན་འདུག

རྒྱ་གར་གྱི་གྲོས་ཚོགས་འཐུས་མི་འོས་འདེམས་ས་ཁུལ་༥༤༣ ལ་བདུན་ཕྲག་རེར་རྟག་ཏུ་བཅར་འདྲི་༡༠,༠༠༠ བྱས་ཏེ་བསམ་ཚུལ་བསྡུ་ལེན་གྱི་ལས་དོན་སྤེལ་མཁན་(CVoter) ཞེས་པ་དེས་བརྗོད་དོན་ལྟར་ན། འདི་ལོའི་ཟླ་༥ པའི་ནང་སྲིད་བློན་མཱོ་རྡི་ཡི་སྲིད་དོན་ཚོགས་པར་འགྲན་རྩོད་ཤུགས་ཆེན་བྱས་པའི་ནུབ་བྷེང་གྷལ་གྱི་མངའ་སྡེའི་གྲོས་ཚོགས་འོས་བསྡུར་ཕམ་ཁ་བྱུང་ཡོད་པ་དང་། སྐབས་དེར་ཁོང་ལ་རྒྱབ་སྐྱོར་བྱེད་མཁན་གྱི་བརྒྱ་ཆ་༣༧ ཡིན་འདུག་པ་དང་དེ་ནི་བརྒྱ་ཆ་༢༢ ཆགས་པ་ཡིན་འདུག འོན་ཀྱང་ད་ལྟའི་ཆར་ཁོང་ལ་རྒྱབ་སྐྱོར་བྱེད་མཁན་བརྒྱ་ཆ་༤༤ ལ་འཕར་ཡོད་འདུག 

ཡ་མཚན་ཞིག་ལ་སྲིད་བློན་མཱོ་རྡི་ཡི་སྲིད་དོན་ཚོགས་པ་བྷི་ཇེ་བྷིའི་ཚོགས་མི་ཡིན་ཁར་མངའ་སྡེའི་སྤྱི་ཁྱབ་བློན་ཆེན་བྱེད་མཁན་རྣམས་ལ་རྒྱབ་སྐྱོར་བྱེད་མཁན་གྱི་བརྒྱ་ཆ་ཆགས་བཞིན་ཡོད་དང་། སྲིད་བློན་མཱོ་རྡི་ལ་རྒྱབ་སྐྱོར་བརྒྱ་ཆ་ཆགས་ཀྱི་ཡོད་ཀྱང་ད་བར་བརྒྱ་ཆ་༣༧ ཡི་འོག་ལ་ཆགས་མྱོང་མེད་འདུག དེ་བཞིན་རྒྱབ་སྐྱོར་གྱི་བརྒྱ་ཆ་ཆགས་པ་ཙམ་གྱིས་ཁོང་གི་སྲིད་དོན་ཚོགས་པར་ཕྱི་ལོ་༢༠༢༤ ལོའི་རྒྱལ་ཡོངས་གྲོས་ཚོགས་འོས་བསྡུར་ཕམ་ཁ་འབྱུང་རྒྱུ་ཡིན་པའི་ངེས་གཏན་མེད་པ་རེད། གང་ཡིན་ཟེར་ན་ཕྱོགས་འགལ་ཚོགས་པ་གཙོ་བོའི་འགོ་ཁྲིད་རཱ་ཧུལ་གྷན་རྡི་དང་བསྡུར་ན། ཁོང་ལ་རྒྱབ་སྐྱོར་བྱེད་མཁན་བརྒྱ་ཆ་ལྡབ་གཉིས་དང་དེ་ལས་མང་བ་ཡིན་འདུག །

གསར་འགོད་པ་སྐལ་བཟང་དོན་གྲུབ།