སྲིད་འཛིན་གྱི་ཕོ་བྲང་དང་གྲོས་ཚོགས་ལ་དྲག་རྒོལ་བྱས་འདུག

བྷར་ཛིལ་གྱི་གཡས་ཕྱོགས་ཆབ་སྲིད་ཚོགས་པའི་སྲིད་འཛིན་འོས་མི་ལ་རྒྱབ་སྐྱོར་བྱེད་མཁན་སྟོང་ཕྲག་མང་པོས་གཡོན་ཕྱོགས་ཆབ་སྲིད་ཚོགས་པའི་སྲིད་འཛིན་ལ་ངོ་རྒོལ་གྱིས་སྲིད་འཛིན་གྱི་ཕོ་བྲང་དང་གྲོས་ཚོགས། ཆེས་མཐོའི་ཁྲིམས་ཁང་བཅས་ལ་དྲག་རྒོལ་བྱས་ཡོད་པའི་གནས་ཚུལ་ཐོན་འདུག

ཟླ་འདིའི་ཚེས་༩ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། འདས་པའི་ཟླ་བ་གཉིས་ཙམ་གྱི་རིང་བྷར་ཛིལ་ལ་སྲིད་འཛིན་གྱི་འོས་བསྡུ་བྱས་ཏེ། གཡོན་ཕྱོགས་ཆབ་སྲིད་ཚོགས་པའི་སྲིད་འཛིན་འོས་མི་ལུ་ལཱ་སིལ་ཝ་ (Luiz Inacio Lula da Silva) ལ་སྲིད་འཛིན་གྱི་རྒྱལ་ཁ་ཐོབ་ཡོད་པ་དང་། བྷར་ཛིལ་གྱི་གཡས་ཕྱོགས་ཆབ་སྲིད་ཚོགས་པའི་སྲིད་འཛིན་འོས་མི་དང་། བྷར་ཛིལ་གྱི་སྲིད་འཛིན་ཟུར་པ་(Bolsonaro) ལ་འོས་བསྡུའི་ཕམ་ཉེས་བྱུང་ཡོད་ཀྱང་། ཁོང་གིས་འོས་བསྡུའི་ཕམ་ཁ་ཁས་ལེན་བྱས་མེད་པ་མ་ཟད། སྲིད་འཛིན་གྱི་མཛད་སྒོའི་སྐབས་ཁོང་ཉིད་མཉམ་ཞུགས་མ་བྱས་པར་ཨ་རི་ལ་འཕུར་ཡོད་འདུག

བྷར་ཛིལ་གྱི་སྲིད་འཛིན་གསར་པས་དམ་འབུལ་བྱས་ནས་བདུན་ཕྲག་གཅིག་གི་རྗེས། ཟླ་འདིའི་ཚེས་༨ ཉིན་བྷར་ཛིལ་གྱི་གཡས་ཕྱོགས་ཚོགས་པའི་སྲིད་འཛིན་ཟུར་པ་(Jair Bolsonaro) གྱི་རྒྱབ་སྐྱོར་བ་སྟོང་ཕྲག་མང་པོས་ཉེན་རྟོག་པའི་བཀག་རྒྱ་ལས་བརྒལ་ནས་སྲིད་འཛིན་གྱི་ཕོ་བྲང་དང་གྲོས་ཚོགས། ཆེས་མཐོའི་ཁྲིམས་ཁང་བཅས་ལ་དྲག་རྒོལ་བྱས་ཡོད་འདུག་ལ། ངོ་རྒོལ་བ་ཚོས་འོས་ཤོག་རྐུ་འཁྱེར་བྱས་ནས་སྲིད་འཛིན་གྱི་རྒྱལ་ཁ་ཐོབ་ཡོད་པས་སྲིད་འཛིན་གསར་པ་ལས་གནས་ནས་དགོངས་པ་ཞུ་དགོས་ཞེས་བརྗོད་ནས་ངོ་རྒོལ་བྱས་ཡོད་འདུག

གཡོན་ཕྱོགས་ཆབ་སྲིད་ཚོགས་པའི་སྲིད་འཛིན་འོས་མི་ལ་འོས་གྲངས་བརྒྱ་ཆ་༥༠.༩% དང་གཡས་ཕྱོགས་ཆབ་སྲིད་ཚོགས་པའི་སྲིད་འཛིན་འོས་མི་ལ་འོས་གྲངས་བརྒྱ་ཆ་༤༩.༡% བཅས་སྲིད་འཛིན་འོས་མི་གཉིས་ཀྱི་འོས་ཤོག་ཐོབ་གྲངས་བར་ལ་ཁྱད་པ་ཆེན་མོ་མེད་པ་རེད་འདུག ད་ལྟའི་ཆར་དྲག་རྒོལ་བྱེད་མཁན་༤༠༠ ལྷག་འཛིན་བཟུང་བྱས་ཡོད་པ་བཅས་ཀྱི་གནས་ཚུལ་ཐོན་འདུག

གསར་འགོད་པ། བློ་བཟང་རྒྱ་མཚོ།