སྲིད་འཛིན་བྷ་ཌན་གྱི་གོ་སྐབས་ཤོར་བ།

ཉེ་ཆར་༧གོང་ས་མཆོག་གི་ཚ་བོ་དང་སྤྱི་འཐུས་ཟུར་པ་མཁས་གྲུབ་དོན་གྲུབ་ཀྱིས་སྲིད་འཛིན་བྷ་ཌན་གྱི་གོ་སྐབས་ཤོར་བ་ཞེས་པའི་རྩོམ་ཞིག་ཟླ་འདིའི་ཚེས་༡༨ ་ཉིན་(TheSundayGuardian) ་ཞེས་པའི་གསར་འགྱུར་བརྒྱུད་ལམ་ཐོག་ཏུ་སྤེལ་འདུག
ཕྱི་ལོ་༢༠༢༠ ལོ་སྲིད་འཛིན་གྱི་འོས་བསྡུའི་ལས་འགུལ་སྤེལ་བའི་སྐབས་སུ། སྐབས་དེའི་ཨ་རིའི་སྲིད་འཛིན་གྱི་འོས་མི་ཡིན་པའི་བྷ་ཌན་གྱིས་གལ་སྲིད་ཁོང་ཉིད་ཨ་རིའི་སྲིད་འཛིན་ལ་འདེམས་ཐོན་བྱུང་བ་ཡིན་ན། ཁོང་གིས་༧གོང་ས་མཆོག་ཨ་རིའི་ཕོ་བྲང་དཀར་པོ་ལ་གདན་འདྲེན་ཞུ་རྒྱུ་དང་༧གོང་ས་མཆོག་དང་མཇལ་འཕྲད་གནང་རྒྱུའི་ཁས་ལེན་བྱས་ནས་འགྲོ་བ་མིའི་ཐོབ་ཐང་དང་ཆོས་དད་རང་དབང་ལ་རྒྱབ་སྐྱོར་བྱེད་མཁན་ཚོར་རེ་བ་ཆེན་པོ་ཞིག་སྤྲད་ཡོད།

ཁས་ལེན་འདི་ནི་བོད་དོན་ལ་རྒྱབ་སྐྱོར་དང་བོད་ནང་རྒྱ་ནག་གི་དམ་དྲག་ཅན་གྱི་སྲིད་བྱུས་ལ་གདོང་ལེན་བྱེད་པའི་རྣམ་འགྱུར་གལ་ཆེན་ཞིག་ཏུ་བརྩིས་ཡོད། ཡིན་ན་ཡང་། སྲིད་འཛིན་བྷ་ཌན་གྱི་ལོ་བཞིའི་དུས་ཡུན་མཇུག་བསྒྲིལ་ལ་ཉེ་བའི་སྐབས་སུ་ཡང་། ཁས་ལེན་འདི་ད་དུང་མ་བསྒྲུབས་པར་ལྷག་ཡོད་པ་དེས་བྷ་ཌན་སྲིད་གཞུང་གི་ཕྱི་འབྲེལ་དང་འགྲོ་བ་མིའི་ཐོབ་ཐང་ཐོག་གི་ལངས་ཕྱོགས་ལ་དྲི་བ་ཞིག་སླེབ་ཀྱི་ཡོད།

སྲིད་འཛིན་བྷ་ཌན་གྱིས་འོས་བསྡུའི་སྐབས་སུ་ཁས་ལེན་བྱས་ཡོད་པ་ལ་མ་ལྟོས་པར། ཁོང་གིས་སྲིད་འཛིན་གྱི་དུས་ཡུན་རིང་༧གོང་ས་མཆོག་དང་མཇལ་འཕྲད་གནང་མེད་པ་ནི་མངོན་གསལ་དོད་པོ་ཞིག་ཏུ་གྱུར་ཡོད། ལྷག་པར་དུ་དེ་སྔོན་གྱི་ཨ་རིའི་སྲིད་འཛིན་ཇོར་ཇི་ཨེཆ་ཌབ་ལུ་བྷུ་ཤུ་(George H.W.Bush) ་དང་། བྷིལ་ཁི་ལིན་ཊོན་(Bill Clinton) ། ཇོར་ཇི་ཌབ་ལུ་བྷུ་ཤུ(George W. Bush)། ཨོ་བྷ་མ་(Obama) ་བཅས་ཚང་མས་༧གོང་ས་མཆོག་དང་མཇལ་འཕྲད་གནང་ཡོད། ༧གོང་ས་མཆོག་ནི་ནོ་སྦེལ་ཞི་བདེའི་གཟེངས་རྟགས་བཞེས་མཁན་ཞིག་དང་། ཁོང་གིས་བོད་ཀྱི་རང་སྐྱོང་གི་འཐབ་རྩོད་དང་། འགྲོ་བ་མིའི་ཐོབ་ཐང་དང་ཆོས་དད་རང་དབང་གི་གཞི་རྒྱ་ཆེ་བའི་འཐབ་རྩོད་ཀྱི་མཚོན་དོན་གནང་གི་ཡོད།

ཁས་ལེན་དེ་མ་བསྒྲུབས་པའི་རྒྱུ་མཚན་གཙོ་བོ་ཞིག་ནི་བྷ་ཌན་སྲིད་གཞུང་གིས་རྒྱ་ནག་ལ་དོོ་ཕོག་གཏོང་བར་སེམས་འཚབ་བྱེད་པ་དེ་མངོན་གྱི་འདུག། ཨ་རྒྱའི་འབྲེལ་བ་ནི་རྙོག་འཛིང་ཆེ་ཞིང། ཚོང་འབྲེལ་ནས་འགྲོ་བ་མིའི་ཐོབ་ཐང་། ལྷོ་རྒྱ་མཚོར་དམག་དོན་གནས་གཞི་འཛུགས་པ་སོགས་ཀྱི་གནད་དོན་ཐོག་རྙོག་གླེང་ཆེན་པོ་ཡོད། རྒྱ་གཞུང་གིས་ཁ་ཕྲལ་རིང་ལུགས་པར་ངོས་འཛིན་བྱེད་པའི་༧གོང་ས་མཆོག་དང་མཇལ་འཕྲད་གནང་བ་དེས་ཕྱོགས་གཉིས་བར་ཀྱི་རྙོག་གླེང་དེ་དག་ཇེ་སྡུག་ཏུ་གཏོང་སྲིད་པ་དང་། གནད་དོན་གཞན་གྱི་ཐད་ལ་འབྲེལ་བ་བྱེད་རྒྱུ་ལ་འགོག་རྐྱེན་བཟོ་སྲིད་པ་ཞིག་རེད།

༧གོང་ས་མཆོག་དང་མཇལ་འཕྲད་མ་གནང་བ་དེས་སྲིད་འཛིན་བྷ་ཌན་གྱིས་ཨ་རིས་འགྲོ་བ་མིའི་ཐོབ་ཐང་དང་ཆོས་དད་རང་དབང་ལ་ཁས་ལེན་བྱས་པ་དེ་ནན་བརྗོད་བྱེད་པའི་གོ་སྐབས་ཤོར་བ་རེད། དེ་འདྲའི་མཇལ་འཕྲད་ཅིག་གིས་གནད་དོན་གལ་ཆེན་དེ་ཚོའི་ཐོག་གི་ཨ་རིའི་ལངས་ཕྱོགས་གང་ཡིན་འཛམ་གླིང་ལ་བརྡ་ལན་ནུས་པ་དང་ལྡན་པ་ཞིག་གཏོང་ཐུབ་ཀྱི་ཡོད། མཇལ་འཕྲད་དེས་བོད་ནང་འབྱུང་བཞིན་པའི་འགྲོ་བ་མིའི་ཐོབ་ཐང་རྡོག་རོལ་གཏོང་བའི་སྐོར་གསལ་འདོན་དང་བོད་མིའི་རང་སྐྱོང་གི་འཐབ་རྩོད་ལ་རྒྱབ་སྐྱོར་བྱེད་པའི་སྡེངས་ཆ་ཞིག་ཀྱང་བསྐྲུན་ཐུབ་ཀྱི་ཡོད།

སྲིད་འཛིན་བྷ་ཌན་གཞུང་གིས་བོད་དོན་སེལ་ཐབས་སུ་གོམ་པ་ཁ་ཤས་བརྒྱབ་ཡོད། དཔེར་ན། རྒྱ་གཞུང་གིས་བོད་ཀྱི་འགོ་ཁྲིད་ཚོ་དང་གྲོས་མོལ་བསྐྱར་གསོ་བྱེད་པར་གནོན་ཤུགས་སྤྲོད་པའི་བོད་དོན་ཁྲིམས་འཆར་(Resolve Tibet Act) ་ལ་མཚན་རྟགས་བཀོད་ཡོད། ཡིན་ཡང་། ༧གོང་ས་མཆོག་དང་སྲིད་འཛིན་གྱི་མཇལ་འཕྲད་ཀྱི་མཚོན་དོན་གྱི་ནུས་པ་དེ་གལ་ཆེན་ཡིན་ཞིང་། ཕྱིི་འབྲེལ་གྱི་ཁྲོད་དུ་མཚོན་དོན་གྱི་རྣམ་འགྱུར་ལ་ལྗིད་ཁོག་ཡོད་པ་མ་ཟད། དེས་མང་ཚོགས་ཀྱི་བསམ་ཚུལ་དང་རྒྱལ་སྤྱིའི་འབྲེལ་ལམ་ལ་ཤུགས་རྐྱེན་ཐེབས་ཀྱི་ཡོད།

སྲིད་འཛིན་བྷ་ཌན་གྱིས་༧གོང་ས་མཆོག་དང་མཇལ་འཕྲད་མི་གནང་བའི་ཐག་གཅོད་དེས་རྒྱལ་སྤྱིའི་འབྲེལ་ལམ་གྱི་དོ་མཉམ་མཚོན་གྱི་ཡོད་ན་ཡང་། དེས་འགྲོ་བ་མིའི་ཐོབ་ཐང་དང་ཆོས་དད་རང་དབང་གི་ཆེད་དུ་བརྟན་པོ་ལངས་པའི་གོ་སྐབས་ཀྱང་ཤོར་བ་མངོན་གྱི་ཡོད། འཛམ་གླིང་གིས་ལྟ་བཞིན་པའི་སྐབས་སུ། དབུ་ཁྲིད་ཚོས་ཁས་ལེན་བྱས་པ་ཙམ་མིན་པར་ལག་ལེན་བསྟར་རྒྱུ་གལ་འགངས་ཆེན་པོ་རེད། ལྷག་པར་དུ་དེ་ཚོ་གཞི་རྩའི་རིན་ཐང་དང་རྩ་དོན་དང་འབྲེལ་བ་ཡོད་དུས་ལག་ལེན་བསྟར་རྒྱུ་གལ་ཆེན་རེད། ཅེས་བྲིས་གནང་འདུག།

གསར་འགོད་པ། བློ་བཟང་རྒྱ་མཚོ།

ཚིག་དོན་ལ་ནོར་བ་ཡོད་ན་མ་ཡིག་ལ་གཞི་གཞག་རོགས། ( https://rb.gy/b8vytr )