སྲིད་འཛིན་བྷ་ཌན་གྱིས་“ཡུ་གུར་གྱི་བཙན་འོག་ངལ་རྩོལ་བཀག་འགོག་”གི་ཁྲིམས་འཆར་ལ་མཚན་རྟགས་བཀོད་འདུག 

ཨ་རིའི་སྲིད་འཛིན་བྷ་ཌན་གྱིས་“ཡུ་གུར་གྱི་བཙན་འོག་ངལ་རྩོལ་བཀག་འགོག་”གི་ཁྲིམས་འཆར་ལ་མཚན་རྟགས་བསྐྱོན་ནས་གཏན་ལ་ཕབ་འདུག་ཅིང་། ཨ་རིའི་ཁྲིམས་གསར་པ་དེའི་ནང་དུ། ཨ་རི་དང་རྒྱལ་སྤྱིའི་བཟོ་ཚོང་ཁང་རྣམས་ཀྱིས་ཤར་ཏུར་ཀི་སི་ཐན་ནས་ནང་འདྲེན་བྱེད་འདོད་པའི་ཚོང་རྫས་རྣམས་བཙན་འོག་ངལ་རྩོལ་གྱིས་བཟོ་སྐྲུན་བྱས་པ་མ་ཡིན་པའི་དཔང་རྟགས་གསལ་པོར་སྟོན་ཐུབ་ན་མ་གཏོགས། ཐོན་རྫས་གཅིག་ཀྱང་ནང་འདྲེན་བྱེད་མི་ཆོག་པ་བཟོས་ཡོད་འདུག 

ཟླ་འདིའི་ཨ་རིའི་ཚེས་༢༣ ཉིན་སྲིད་འཛིན་བྷ་ཌན་གྱིས་“ཡུ་གུར་གྱི་བཙན་འོག་ངལ་རྩོལ་བཀག་འགོག་”གི་ཁྲིམས་འཆར་ལ་མཚན་རྟགས་བཀོད་དེ་དངོས་སུ་ཨ་རིའི་རྒྱལ་ཁབ་ཀྱི་ཁྲིམས་སུ་གཏན་ལ་ཕབ་ཡོད་འདུག་ཅིང་། ཁྲིམས་དེ་ནི་རྒྱ་ནག་གིས་ཤར་ཏུར་ཀི་སི་ཐན་དུ་ལག་བསྟར་བྱེད་བཞིན་པའི་མི་རིགས་རྩ་མེད་ཀྱི་སྲིད་བྱུས་དང་། ཡུ་གུར་བ་རྣམས་བཙན་གྱིས་གླ་མེད་ངལ་རྩོལ་བྱེད་དུ་བཅུག་ནས་ཚོང་རྫས་བཟོ་སྐྲུན་བྱེད་བཞིན་པའི་གནད་དོན་དེ་ལ་ཁ་གཏད་གཅོག་ཆེད་དུ་དམིགས་པ་ཞིག་ཡིན་འདུག 

ད་ཐེངས་གཏན་ལ་ཕབ་པའི་ཁྲིམས་དེའི་འོག་ཏུ། བཟོ་ཚོང་ཁང་རྣམས་ཀྱིས་ཤར་ཏུར་ཀི་སི་ཐན་གྱི་ཐོན་རྫས་གང་རུང་ཞིག་ཨ་རིར་ནང་འདྲེན་བྱེད་སྐབས། ཐོན་རྫས་དེ་ཡུ་གུར་བ་ཚོས་བཙན་འོག་ངལ་རྩོལ་གྱིས་བཟོ་སྐྲུན་བྱས་པ་ཞིག་མ་ཡིན་པའི་དཔང་རྟགས་གསལ་པོར་སྟོན་ཐུབ་ན་མ་གཏོགས་ནང་འདྲེན་བྱེད་མི་ཆོག་པ་བཟོས་ཡོད་འདུག 

སྲིད་འཛིན་བྷ་ཌན་གྱིས་ཁྲིམས་འཆར་དེ་ལ་མཚན་རྟགས་བཀོད་རྗེས།“དེ་རིང་ངས་’ཡུ་གུར་གྱི་བཙན་འོག་ངལ་རྩོལ་བཀག་འགོག་གི་ཁྲིམས་’ལ་མཚན་རྟོགས་བཀོད་པ་ཡིན། ཨ་རིས་མུ་མཐུད་ཐབས་ཤེས་ཡོད་རྒུ་རྩལ་དྲུག་བེད་སྤྱོད་བྱས་ཏེ་ཚོང་རྫས་རྣམས་བཙན་འོག་ངལ་རྩོལ་གྱིས་བཟོས་པ་མ་ཡིན་པ་བྱེད་རྒྱུ་ཡིན་ལ། དེའི་ནང་དུ་ཤིང་ཅང་དང་རྒྱ་ནག་གི་ས་ཁུལ་གཞན་ནས་ཐོན་པའི་ཚོང་རྫས་རྣམས་ཀྱང་འདུས་ཡོད་”ཅེས་གསུངས་འདུག  

རྒྱ་ནག་གི་བཙན་དབང་འོག་ཏུ་ཡོད་པའི་ཤར་ཏུར་ཀི་སི་ཐན་ནམ་ཤིང་ཅང་ནི་གཏེར་ཁ་དང་ཐོན་རྫས་སྣ་ཚོགས་ཀྱིས་ཕྱུག་པའི་ས་ཁུལ་ཞིག་ཡིན་སྟབས། རྒྱ་ནག་རྒྱལ་ཡོངས་ཀྱི་དཔལ་འབྱོར་གྱི་ཡོང་ཁུངས་གལ་ཆེ་ཤོས་ཤིག་ཆགས་ཀྱི་ཡོད་འདུག་པས། ཨ་རིའི་ཁྲིམས་འཆར་གསར་པ་འདིས་རྒྱ་ནག་གི་སྣང་བརྙན་ལ་གནོད་པ་ཙམ་མ་ཡིན་པར་རྒྱ་ནག་གི་དཔལ་འབྱོར་ལའང་ཤུགས་རྐྱེན་ཆེན་པོ་ཐེབས་ངེས་པའི་ཚོད་དཔག་བྱེད་ཀྱི་ཡོད་འདུག ། 

གསར་འགོད་པ་དཀོན་མཆོག་རབ་བརྟན།