སྲིད་སྐྱོང་གིས་བོད་དོན་དམིགས་བསལ་འབྲེལ་མཐུད་པར་རེ་བ་ཆེན་པོ་ཡོད་སྐོར་གསུངས་སོང་།

ཟླ་༡༢ པའི་ཚེས་༢༡ ཉིན་དྷ་ས་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུཛ་རཱ་ཛཱི་ཡ་བསྐོ་གཞག་གནང་བ་དང་འབྲེལ་ནས་གསར་འགོད་ལྷན་ཚོགས་ཤིག་བསྐོངས་འཚོགས་གནང་སོང་།

དེ་ཡང་སྲིད་སྐྱོང་གིས་ཨ་རིའི་སྲིད་འཛིན་རྗོ་བྷའེ་ཌན་གྱི་སྲིད་འཛིན་ལས་ཡུན་ལོ་གཅིག་མ་འཁོར་བའི་སྔོན་དུ། དྲུང་གཞོན་ལས་རོགས་ཀྱི་གནས་རིམ་ཡོད་མཁན་བོད་དོན་དམིགས་བསལ་འབྲེལ་མཐུད་པ་ལྕམ་ཨུཛ་རཱ་ཛཱི་ཡ་(Uzra Zeya)བསྐོ་གཞག་གནང་བ་དེར་སྲིད་འཛིན་རྗོ་བྷའེ་ཌན་དང་། ཕྱི་སྲིད་དྲུང་ཆེ་ཨན་ཐོ་ནི་བྷེལ་ཀན་གཉིས་ལ་ཐུགས་རྗེ་ཆེ་ཞུ་རྒྱུ་དང་། དེ་བཞིན་གྲོས་ཚོགས་གོང་འོག་གཉིས་ཀྱི་འཐུས་མི་༦༠ ལྷག་གིས་བོད་དོན་དམིགས་བསལ་འབྲེལ་མཐུད་པ་བསྐོ་གཞག་དགོས་པའི་ཞུ་ཡིག་ཕུལ་གནང་བར་ཐུགས་རྗེ་ཆེ་ཞུས་སོང་།

སྲིད་སྐྱོང་གིས་གསུང་དོན་ལ། བོད་དོན་དམིགས་བསལ་འབྲེལ་མཐུད་པ་དེ་དྲུང་གཞོན་ལས་རོགས་ཀྱི་གནས་རིམ་ཐོག་བསྐོ་གཞག་གནང་བར་གལ་ཆེན་པོ་འཛིན་གྱི་ཡོད་པ་དང་། གནས་རིམ་དེའི་ཐོག་ལས་གཞི་རྒྱ་ཆེན་པོ་ཡོད་པས། རྒྱ་ནག་དང་མཉམ་དུ་གནད་དོན་མང་པོའི་ཐོག་གླེང་སློང་བྱེད་པའི་གོ་སྐབས་མང་པོ་ཞིག་ཐོབ་ཀྱི་ཡོད་སྐོར་གསུངས་སོང་།

དེ་བཞིན་ཁོང་གིས་རྒྱལ་སྤྱིའི་རྒྱལ་ཁབ་ཁག་གི་གཞུང་ནས་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་མཁན་ཨ་རི་གཅིག་པུ་ཡིན་པ་དང་། ཐེངས་འདིའི་བོད་དོན་དམིགས་བསལ་འབྲེལ་མཐུད་པ་བདུན་པ་དེ་ཆགས་ཀྱི་ཡོད་པ། ལྕམ་ཁོང་གི་ལོ་རྒྱུས་ལ་གཟིགས་ན་མི་ཚེ་གང་བོར་སྲི་ཞུ་བའི་ལས་ཁུར་གནང་མྱོང་མཁན་ཞིག་དང་། དེ་བཞིན་བར་དུ་ལོ་གསུམ་གྱི་རིང་འཛམ་གླིང་ནང་རྩོད་རྙོག་ཡོད་པའི་ས་གནས་སུ་ཞི་བདེ་ཡོང་ཆེད་ཚོགས་པ་དེ་འདྲའི་ནང་ལས་ཀ་གནང་བ་སོགས་བྱས་ཡོད་པར་བརྟེན། ལྕམ་ཁོང་གིས་ཞི་བདེ་དང་འགྲོ་བ་མིའི་ཐོབ་ཐང་ཐོག་གི་རིན་ཐང་ལྟ་བ་གསལ་པོ་ངོས་འཛིན་ཐུབ་ཀྱི་ཡོད་པས་རེ་བ་ཆེན་པོ་ཞེ་དྲག་རྒྱག་གི་ཡོད་སྐོར་གསུངས་སོང་།

གསར་འགོད་པའི་དྲི་བ་དང་འབྲེལ་ནས། སྲིད་སྐྱོང་གིས་བོད་དོན་དམིགས་བསལ་འབྲེལ་མཐུད་པ་ཁོང་གི་ལས་འགན་གཙོ་བོ་ནི་བོད་དོན་རྒྱབ་སྐྱོར་གྱི་སྲིད་ཇུས་ནང་དུ་གསལ་བའི་བོད་རྒྱ་གྲོས་མོལ་བསྐྱར་གསོ་བྱེད་རྒྱུ་དེ་ཡིན་པ་དང། དེ་བཞིན་ཨ་རིའི་གཞུང་དང་འབྲེལ་བ་བྱས་ནས་མ་འོངས་པར་ཨ་རིས་འགོ་ཁྲིད་པའི་ཐོག་ནས། བོད་དོན་ཐོག་བསམ་བློ་མཐུན་པའི་རྒྱལ་ཁབ་རྣམས་མཉམ་ལས་ཡོང་ཐབས་བྱེད་རྒྱུ་ལས་ཀ་གལ་ཆེན་ཞིག་ངོས་འཛིན་གནང་གི་ཡོད་སྐོར་གསུངས་སོང།།

གསར་འགོད་པ་སྐལ་བཟང་དོན་གྲུབ།