སྲིད་སྐྱོང་དང་ཚོགས་གཙོ་གཉིས་ནས་ཐུགས་གསོའི་གསུང་འཕྲིན་གནང་འདུག 

ཟླ་༡༢ ཚེས་༢༦ ཉིན་ལྷོ་ཨ་ཧྥི་རི་ཀའི་ཡི་ཤུའི་བླ་ཆེན་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་དགུང་གྲངས་༩༠  ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར། ཚེས་༢༧ ཉིན་བོད་མིའི་སྒྲིག་འཛུགས་ཀྱིས་གཞུང་འབྲེལ་མཆོད་འབུལ་སྨོན་ལམ་འཚོགས་ཡོད་པ་དང་། སྲིད་སྐྱོང་དང་ཚོགས་གཙོ་གཉིས་ནས་ཐུགས་གསོའི་གསུང་འཕྲིན་གནང་འདུག 

དེ་ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས་དམ་པ་དེ་ཉིད་ཀྱི་སྐུ་ཟླ་ལཱེ་ཧ་ཊུ་ཊུ་ (Leah Tutu) ལ་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན། “ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་ཕྲན་རང་ཉིད་ཧ་ཅང་བློ་ཕམ་བྱུང་། ངས་བོད་མིའི་སྒྲིག་འཛུགས་དང་འཛམ་གླིང་ས་ཕྱོགས་གང་སར་གནས་པའི་བོད་མི་ཡོངས་ཀྱི་ཚབ་ཞུས་ཏེ་འདས་པོ་དམ་པ་དེ་ཉིད་ཀྱི་ཆེད་དུ་སྨོན་ལམ་གསོལ་འདེབས་དང་། དེ་བཞིན་སྐུ་ཉིད་ཀྱིས་གཙོས་ནང་མི་སྤུན་མཆེད་དང་ལྷོ་ཨ་ཧྥི་རི་ཀའི་མི་མང་ཡོངས་ལ་སྙིང་ཐག་པ་ནས་ཐུགས་གསོ་ཞུ་རྒྱུ་ཡིན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་གི་དབར་མཛའ་གྲོགས་ཀྱི་འབྲེལ་བ་དམིགས་བསལ་ཞིག་བྱུང་ཡོད་པ་དེས་བོད་མི་ཡོངས་ལ་སེམས་འགུལ་ཐེབས་བཅུག་ཡོད་པ་མ་ཟད། སེམས་ཤུགས་ཀྱང་བསྐྱེད་དུ་བཅུག་ཡོད་སྟབས་དམ་པ་ཁོང་འདས་གྲོངས་སུ་གྱུར་བ་ལ་བརྟེན་ནས་བོད་མི་རྣམས་ཧ་ཅང་བློ་ཕམ་བྱུང་ཡོད། དམ་པ་ཁོང་བཞུགས་སྒར་རྡ་སར་ཕེབས་པ་དང་། ལྷག་པར་ཕྱི་ལོ་༢༠༡༥ ལོར་དམ་པ་ཁོང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་༨༠ ལ་ཕེབས་པའི་༧སྐུའི་འཁྲུངས་སྐར་དུས་ཆེན་སྔ་སྣུར་གྱིས་སྲུང་བརྩི་ཞུས་པའི་མཛད་སྒོར་ཕེབས་པ་དེ་ང་ཚོས་དགའ་སྤྲོའི་ངང་ནས་དྲན་སོས་ཀྱི་འདུག ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་གིས་འཛམ་གླིང་གི་མི་ས་ཡ་མང་པོ་ཚུད་པའི་བོད་མི་རྣམས་ལ་གདུང་སེམས་མཉམ་སྐྱེ་དང་རྒྱབ་སྐྱོར་གནང་ཡོད། དམ་པ་ཁོང་གིས་རང་གི་མི་མང་ལ་དྲང་བདེན་དང་རང་དབང་ཐོབ་བཅུག་པ་ནི་བོད་མི་ཚུད་པའི་འཛམ་གླིང་གི་སྐྱེ་བོ་མང་པོར་སེམས་ཤུགས་བསྐྱེད་དུ་བཅུག་ཡོད། ང་ཚོས་དམ་པ་ཁོང་ལ་བཀའ་དྲིན་ཤིན་ཏུ་ཆེ་ཞེས་ཞུ་རྒྱུ་ཡིན་ལ། དམ་པ་ཁོང་གི་མཛད་རྗེས་ཀྱིས་ང་ཚོར་སེམས་ཤུགས་བསྐྱེད་དུ་བཅུག་ཡོད། ད་ལྟ་དམ་པ་ཁོང་ང་ཚོ་དང་ལྷན་དུ་སྐུ་འཚོ་བཞུགས་མེད་ནའང་ཁོང་གི་མཛད་རྗེས་དེ་མུ་མཐུད་གསོན་པོར་གནས་ཀྱི་རེད། དེ་རིང་ང་ཚོས་ནང་པའི་ལུགས་སྲོལ་ལྟར་དམ་པ་ཁོང་ལ་རྗེས་དྲན་སླད་མཆོད་འབུལ་སྨོན་ལམ་ཞིག་འཚོགས་རྒྱུ་ཡིན། དམ་པ་ཁོང་གི་གཞན་ཕན་གྱི་སྙིང་སྟོབས་ཀྱིས་ང་ཚོར་མུ་མཐུད་ལམ་སྟོན་གནང་རྒྱུའི་སྨོན་ལམ་འདེབས་རྒྱུ་ཡིན། སླར་ཡང་ངས་སྙིང་ཐག་པ་ནས་འདས་པོ་དམ་པ་དེ་ཉིད་ཀྱི་ཆེད་དུ་སྨོན་ལམ་གསོལ་འདེབས་དང་། དེ་བཞིན་སྐུ་ཉིད་ཀྱིས་གཙོས་ནང་མི་སྤུན་མཆེད་ཡོངས་ལ་ཐུགས་གསོ་ཞུ་རྒྱུ་ཡིན་”ཞེས་འཁོད་འདུག 

དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་གཞིས་བྱེས་བོད་མི་ཡོངས་དང་། སྐབས་༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། དམ་པ་ཁོང་གི་སྲས་མོ་གཙོས་པའི་ཤུལ་ལུས་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུས་གནང་འདུག

དམ་པ་ཁོང་གི་སྲས་མོ་ལྕམ་སྐུ་མི་ཧྥོ་ཊུ་ཊུ་ (Rev. Mpho Tutu)ལ་བསྐུར་བའི་ཐུགས་གསོའི་འཕྲིན་ཡིག་ནང་འཁོད་དོན། “ཕྱི་ལོ་༢༠༢༡ ཟླ་༡༢ ཚེས་༢༦ ཉིན་མོ་དེ་ནི་འཛམ་གླིང་སྤྱི་ཡོངས་དང་། ལྷག་པར་དུ་བོད་མི་ཚོར་མཚོན་ན། ཧ་ཅང་གི་སེམས་སྐྱོ་དགོས་པའི་ཉིན་མོ་ཞིག་ཆགས་ཀྱི་ཡོད། སྐུ་གཤེགས་དམ་པ་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། བོད་མིའི་ཧ་ཅང་བློ་ཐག་ཉེ་བའི་མཛའ་གྲོགས་ཞིག་ཡིན་པ་མ་ཟད། འཛམ་གླིང་ཞི་བདེའི་མཚོན་རྟགས་ཤིག་ཀྱང་ཡིན། ངོས་རང་ལ་མཚོན་ན། ཕྱི་ལོ་༢༠༡༥ ལོར་དམ་པ་ཁོང་བཞུགས་སྒར་དུ་ཕེབས་སྐབས་སྐུ་དངོས་སུ་མཇལ་རྒྱུའི་གོ་སྐབས་བྱུང་། དམ་པ་ཁོང་ནི་༧གོང་ས་མཆོག་དང་དམ་ཚིག་ཟབ་ཅིང་། བོད་དོན་བདེན་པའི་འཐབ་རྩོད་ཐོག་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན། ཁོང་སྐུ་འཚོ་བཞུགས་སྐབས་འགྲོ་བ་མིའི་གཞི་རྩའི་ཐོབ་ཐང་དང་། རིན་ཐང་། དེ་བཞིན་འཛམ་གླིང་ཞི་བདེ་ཡོང་ཐབས་སླད་ཕྱག་ལས་རྒྱ་ཆེ་གནང་ཡོད། ཁོང་སྐུ་གཤེགས་པ་དེ་ང་ཚོ་ཚང་མ་བློ་ཕམ་དགོས་པའི་གནས་ཚུལ་ཞིག་ཡིན། ངས་དམ་པ་ཁོང་གི་ཤུལ་ལུས་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་དང་། དམ་པ་ཁོང་གི་བྱམས་བརྩེའི་བཀའ་སློབ་ལམ་སྟོན་དང་། ཁོང་གིས་བཞག་པའི་མཛད་རྗེས་རྣམས་ང་ཚོས་དུས་རྟག་ཏུ་དྲན་ངེས་ཡིན། ངས་སླར་ཡང་བོད་མི་མང་སྤྱི་འཐུས་ལྷན་ཚོགས་དང་། བོད་མི་ཡོངས་ཀྱི་ཚབ་ཞུས་ཏེ། དཀའ་ཚེགས་ཆེ་བའི་དུས་ཚོད་འདིར་ཁྱེད་ནང་མི་ཡོངས་ལ་ཐུགས་གསོ་ཞུ་རྒྱུ་ཡིན།” ཞེས་འཁོད་འདུག །

གསར་འགོད་པ་སྐལ་བཟང་དོན་གྲུབ།