སྲིད་སྐྱོང་དང་ཚོགས་གཙོ་ནས་རྒྱ་གར་གཞུང་དམངས་གཉིས་ལ་འཚམས་འདྲི་ཞུས་འདུག 

ཟླ་༨ པའི་ཚེས་༡༥ ཉིན་ནི་རྒྱ་གར་རང་བཙན་ཐོབ་ནས་མི་ལོ་༧༥ འཁོར་བའི་དུས་དྲན་ཉིན་མོ་ཡིན་པ་དང་བསྟུན། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་གཉིས་ཀྱིས་རྒྱ་གར་གཞུང་དམངས་གཉིས་ལ་འཚམས་འདྲི་ཞུས་གནང་འདུག

དེ་ཡང་སྤྱིར་བཏང་བྱས་ན་བཀའ་ཤག་གི་མདུན་ཐང་དུ་རྒྱ་གར་གྱི་རྒྱལ་དར་སྒྲེང་འཛུགས་དང་རྒྱ་གར་གྱི་རྒྱལ་གླུ་གཏོང་བ་སོགས། རྒྱ་གར་གྱི་རང་བཙན་ཉིན་མོ་སྲུང་བརྩི་ཞུ་འཆར་ཡོད་ཀྱང་། རྡ་སར་ཆར་པ་ཤུགས་ཆེན་འབབ་བཞིན་པས། མཛད་རིམ་དེ་ཕྱིར་འཐེན་བྱས་འདུག་པ་དང་། ཕྱི་དྲོར་བོད་གཞུང་ཟློས་གར་ཚོགས་ཁང་དུ་རྒྱ་གར་གྱི་དཔོན་རིགས་ཚོར་གཞས་སྣ་འཁྲབ་སྟོན་དང་དགོང་ཚིགས་གྲ་སྒྲིག་གནང་རྒྱུ་རེད་འདུག 

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས་སྤྱི་ཚོགས་དྲ་ལམ་ཊེའུ་ཊར་ཐོག་ཏུ། བློ་ཉེ་བའི་རྒྱ་གར་གྱི་མི་མང་ཚོས་རྒྱ་གར་རང་བཙན་ཐོབ་ནས་མི་ལོ་༧༥ འཁོར་བའི་དུས་དྲན་ཐེངས་སྲུང་བརྩི་ཞུ་བཞིན་པའི་སྐབས་དེར། བོད་མིའི་སྒྲིག་འཛུགས་དང་འཛམ་གླིང་གང་སར་ཡོད་པའི་བོད་མི་ཚོས་ཀྱང་དགའ་སྤོབས་ངང་ནས་འཚམས་འདྲི་དང་དགའ་སྤྲོ་བྱེད་བཞིན་ཡོད། རྒྱ་གར་གཞུང་དམངས་གཉིས་ཀྱིས་ང་ཚོར་གྲུབ་འབྲས་ལྡན་པའི་བཙན་བྱོལ་སྤྱི་ཚོགས་འཛུགས་སྐྲུན་བྱེད་པར་རོགས་རམ་གནང་བའི་བཀའ་དྲིན་ང་ཚོས་དྲན་བཞིན་ཡོད་པ་དང་། རྒྱ་གར་རྒྱལ་ཁབ་དེ་ཉིད་ཡར་རྒྱས་གོང་འཕེལ་མུ་མཐུད་ནས་འགྲོ་བའི་རེ་སྨོན་ཡོད་ཅེས་གསུངས་འདུག 

དེ་བཞིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་ནས་སྤྱི་ཚོགས་དྲ་ལམ་ངོ་དེབ་སྟེང་དུ། རྒྱ་གར་རང་བཙན་ཐོབ་པའི་དུས་དྲན་ཐེངས་ ༧༥ པར་རྒྱ་གར་གཞུང་མང་གཉིས་ལ་འཚམས་འདྲི་བཀྲ་ཤིས་བདེ་ལེགས་ཞུ་ཞེས་གསུངས་འདུག 

རྒྱ་གར་ནང་དུ་ཆགས་པའི་བཙན་བྱོལ་བོད་མིའི་གཞིས་ཆགས་ཁག་དང་སློབ་གྲྭ་སོགས་ནང་དུ་ཡང་རྒྱ་གར་གྱི་རང་བཙན་ཉིན་མོ་སྲུང་བརྩི་ཞུ་བཞིན་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།