སྲིད་སྐྱོང་དང་ཨ་རིའི་བོད་དོན་དམིགས་བསལ་འབྲེལ་མཐུད་པ་མཇལ་འཕྲད།

ཟླ་འདིའི་ཚེས་༢༥ ཉིན་ཐེངས་འདིར་སྲིད་སྐྱོང་སྤེན་པ་ཚེ་རིང་གིས་ཨ་རིར་གཞུང་འབྲེལ་ཕྱོགས་བསྐྱོད་གནང་བ་དང་སྟབས་བསྟུན། ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཛེ་ཡ་(Uzra Zeya) ལ་ཨ་རིའི་ཕྱི་སྲིད་ལས་ཁུངས་ནང་མཇལ་འཕྲད་གནང་ཡོད་པ་རེད།

མཇལ་འཕྲད་རྗེས་སུ་སྲིད་སྐྱོང་གིས་ཐེངས་འདིར་གཙོ་བོ་བོད་རྒྱའི་དཀའ་རྙོག་སེལ་ཐབས་དང་། བོད་རྒྱ་འབྲེལ་མོལ་ཡོང་ཐབས་སུ་ཐབས་ཇུས་གསར་པ་ག་རེ་བྱེད་དགོས་མིན་དང་། མ་འོངས་ལས་དོན་བྱེད་ཕྱོགས་སོགས་ཀྱི་གཙོས་གནད་དོན་ཁག་ཅིག་གི་ཐོག་བཀའ་མོལ་ཡག་ཐག་ཆོད་བྱུང་བ་གསུངས་ཞེས་གསར་འགོད་པར་གསུངས་འདུག 

མཇལ་འཕྲད་སྐབས་བྱེས་ཀྱི་གདན་ས་བཀྲ་ཤིས་ལྷུན་པོ་དགོན་པའི་མཁན་པོ་གཟིག་རྒྱབ་རིན་པོ་ཆེ་ལྷན་བཅར་ཞུས་ནས། ཨ་རིའི་བོད་དོན་དམིགས་བསལ་འབྲེལ་མཐུད་པར་པཎ་ཆེན་མཆོག་སྤྲུལ་རིན་པོ་ཆེའི་གནས་སྟངས་ངོ་སྤྲོད་དང་མཉམ། སྤྱི་ནོར་༧གོང་ས་མཆོག་བོད་ལ་ཕེབས་ཐུབ་ཐབས་དང་། བོད་ཀྱི་དཀའ་རྙོག་སེལ་ཐབས་སུ་སྒོ་ཀུན་ནས་རྒྱབ་སྐྱོར་ཤུགས་ཆེ་ཙམ་གནང་རྒྱུའི་འབོད་སྐུལ་དང་། དེ་བཞིན་ཀུན་གཟིགས་པཎ་ཆེན་རིན་པོ་ཆེའི་གནད་དོན་ཐད་རྒྱ་ནག་ནང་ཡོད་པའི་ཨ་རིའི་གཞུང་ཚབ་པ་པཎ་ཆེན་རིན་པོ་ཆེ་དང་དངོས་སུ་མཇལ་ནས་རིན་པོ་ཆེའི་སྐུ་གཟུགས་གནས་སྟངས་གཟིགས་ཞིབ་གནང་ནས་སྐུ་ཉིད་སྐུ་འཁོར་དང་བཅས་པར་རང་དབང་ཡོང་ཐབས་གནང་དགོས་བའི་འབོད་སྐུལ་ཞུས་འདུག 

དམིགས་བསལ་འབྲེལ་མཐུད་པས་ཨ་རིའི་ངོས་ནས་བོད་ཀྱི་ཆོས་དང་སྐད་ཡིག་གཙོས་ཐུན་མོང་མ་ཡིན་པའི་རིག་གཞུང་ཁག་སྲུང་སྐྱོབ་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་བཟང་དུ་གཏོང་རྒྱུ། དེ་བཞིན་རྒྱལ་སྤྱིའི་ཁྱོན་ཡོངས་སུ་ཡོད་པའི་བོད་པའི་སྤྱི་ཚོགས་བདེ་དོན་ཐོག་མུ་མཐུད་ནས་རོགས་རམ་དང་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་ཅེས་གསུངས་འདུག།

གསར་འགོད་པ་ཆོས་ཉིད་འོད་ཟེར།