སྲིད་སྐྱོང་འོས་མི་སྤེན་པ་ཚེ་རིང་གིས་ཡུ་རོབ་ཏུ་སྐོར་བསྐྱོད།

སྲིད་སྐྱོང་འོས་མི་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་ཁོང་སྲིད་སྐྱོང་ལ་བཞེངས་དགོས་པའི་དམིགས་ཡུལ་དང་། འབྱུང་འགྱུར་གྱི་འཆར་གཞི་དང་ལས་དོན་བྱེད་ཕྱོགས་སོགས་ངོ་སྤྲོད་ཆེད་ཡུ་རོབ་ཁུལ་གྱི་བོད་མི་གནས་སྡོད་བྱེད་ཡུལ་ཁག་ཏུ་ཕེབས་བཞིན་ཡོད་པ་ལྟར། ཟླ་འདིའི་ཚེས་༣༠ དགོང་མོ་སུད་སིའི་འཛུ་རིག་གནམ་ཐང་དུ་འབྱོར་ཡོད་པ་རེད།

སྲིད་སྐྱོང་འོས་མི་སྤྱི་འཐུས་ཚོགས་གཙོ་སྤེན་པ་ཚེ་རིང་གི་རྒྱབ་སྐྱོར་བས་གནས་ཚུལ་བཏང་བ་ལྟར་ན། ཁོང་སུས་སིའི་གནམ་ཐང་དུ་འབྱོར་སྐབས། སུད་སིར་གནས་སྡོད་བྱེད་བཞིན་པའི་དབུས་བོད་མིའི་སྒྲིག་འཛུགས་ཀྱི་དོན་གཅོད་དངོས་གྲུབ་རྡོ་རྗེ་གཙོས། སུད་སི་དང་ལིག་ཏན་སི་ཊན་བོད་རིགས་མི་མང་ཚོགས་པའི་ཚོགས་གཙོ་གཞོན་དང་རྒྱུན་ལས། འཐུས་མི་ཁག་ཅིག ད་དུང་ཡོ་རོབ་ཀྱི་བོད་མི་མང་སྤྱི་འཐུས་ལས་ཐོག་བཀྲས་མཐོང་དབང་པོ། དེ་བཞིན་སྤྱི་ཟུར་གངས་གཞོན་ཚང་ངག་དབང་དང་གསང་གླིང་ཚེ་རིང་རྡོ་རྗེ་སོགས་མི་མང་༢༠༠ ལྷག་དང་། སུད་སིར་གནས་བཞུགས་རྒྱ་གར་མི་སེར་བོད་དོན་རྒྱབ་སྐྱོར་བ་ཁག་ཅིག་བཅས་ཀྱིས་སྣེ་ལེན་དགའ་བསུ་བྱས་ཡོད་པ་རེད།

ཟླ་འདིའི་ཚེས་༣༡ ཉིན་དོན་གཅོད་གཙོས་སུད་སིར་གནས་སྡོད་ལས་རིགས་འདྲ་མིན་གྱི་བོད་རིགས་གནད་ཡོད་མི་སྣ་ཁག་ཅིག་དང་མཇལ་འཕྲད་ཀྱིས་ཆབ་སྲིད་དང་འབྲེལ་བའི་གླེང་མོལ་གནང་རྒྱུ་དང་། ཉིན་རྒྱབ་མི་མང་ལ་གཏམ་བཤད་གནང་གི་ཡོད་པ་རེད། ཕྱི་ཟླ་༢ ཚེས་༡ ཉིན་རྒྱ་གར་ལ་ཕྱིར་ཕེབས་འཆར་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།