སྲོལ་རྒྱུན་ཆས་གོས་འགྲེམས་སྟོན་ཁྲོམ་སྐོར།

ཟླ་འདིའི་ཚེས་༡༢ ཉིན་སུད་སི་འཛུ་རིག་མངའ་སྡེའི་སྲོལ་རྒྱུན་ཆས་གོས་འགྲེམས་སྟོན་ཁྲོམ་སྐོར་གྱི་གཞུང་འབྲེལ་དུས་སྟོན་ཐོག་སུད་སི་དང་ལེཀ་ཏེན་སིཊ་ཡན་བོད་རིགས་མི་མང་གི་གོ་སྒྲིག་འོག  རི་ཀོན་དགོན་གྱི་དགེ་བཤེས་སྦྱིན་པ་རབ་བརྟན་གྱིས་དབུ་ཁྲིད་ནས་ས་གནས་མི་འདྲ་ཁག་ནས་བོད་ཀྱི་བྱིས་པ་༤༠ དང་། བོད་ཀྱི་ཟློས་གར་ཚོགས་མི་ཁག་ཅིག་མཉམ་ཞུགས་བྱས་ཡོད་པ་རེད།

ལས་འགུལ་འདིའི་ཐོག་ལས་ཀ་བྱེད་མཁན་སྐབས་བཅོ་ལྔ་བའི་སུད་སི་དང་ལེཀ་ཏེན་སིཊ་ཡན་བོད་རིགས་མི་མང་གི་ཕྱི་འབྲེལ་བ་ཤ་བ་ཚེ་རིང་དོན་འགྲུབ་ཀྱིས་འགྲེལ་བརྗོད་བྱས་པ་ལྟར་ན། བྱིས་པའི་རྒྱན་སྤྲོས་ཀྱི་ཉིན་མོ་འདི་ནི་སུད་སིར་གནས་སྡོད་ཕྱོགས་མཐའ་ཁག་ནས་ཡོང་བའི་མི་རིགས་གཞན་ཁག་གི་བྱིས་པ་རྣམས་མཉམ་ཞུགས་བྱེད་ཆོག་གི་ཡོད་ལ། རང་སོ་སོའི་མི་རིགས་ཀྱི་ཁྱད་ཆོས་ལྡན་པའི་རིག་གཞུང་དང་འབྲེལ་བའི་རྒྱན་གོས་སོགས་གྱོན་ནས་ཉིན་དེའི་ལྟད་མོ་བ་དང་གཞུང་འབྲེལ་མི་སྣར་གཟུགས་འབུལ་ཞུ་དགོས་ཡོད་སྟབས། སུད་སིར་གནས་སྡོད་བོད་རིགས་མི་མང་གི་ངོས་ནས་ཀྱང་གཞུང་འབྲེལ་གྱི་ལས་འགུལ་གལ་ཆེན་དེའི་ཆ་ཤས་ལེན་ཐུབ་ཐབས་བྱས་པ་ཡིན་ལ་མ་འོངས་པར་སྐབས་བཅུ་དྲུག་གི་ཚོགས་འཐུས་འཚོགས་ནས་ཀྱང་དེ་ལྟར་གནང་ཐུབ་ན་དགེ་མཚན་ཆེ་པོ་འདུག་ཅེས་གསུངས་སོང་།

སུད་སིར་ sechseläuten གཞུང་འབྲེལ་དྲ་རྒྱར་བཀོད་པ་ལྟར་ན། སུད་སིའི་འཛུ་རིག་མངའ་སྡེའི་དུས་ཆེན་འདི་ནི་༡༨༦༤ ལོ་ནས་འགོ་བཙུགས་ཤིང་དར་བའི་སྲོལ་རྒྱུན་རིག་གནས་འགྲེམས་སྟོན་ཁྲོམ་སྐོར་ཞིག་ཡིན་པ་དང་། རིམ་བཞིན་རིག་གནས་དང་ཡུལ་གོམས་མི་འདྲ་བའི་གནས་སྤོར་མི་སེར་དག་ལ་རང་ཉིད་ཀྱི་སྲོལ་རྒྱུན་རིག་གནས་ཀྱི་ཁྱད་ཆོས་དེ་གནས་ཡུལ་རྒྱལ་ཁབ་དུ་འཛིན་སྐྱོང་བྱེད་པའི་དུས་སྟོན་ཉིན་མོ་ཞིག་ཆགས་འདུག ལས་འགུལ་འདིར་མཉམ་ཞུགས་བྱེད་ཆོག་པའི་བྱིས་པའི་ལོ་ཚད་ལྔ་ནས་བཅོ་ལྔ་བར་རེད་ལ། ལོ་རེར་རིག་གཞུང་གི་རྒྱབ་ལྗོངས་མི་འདྲ་བའི་བྱིས་པ་གྲངས་༢༠༠༠ ནས་༣༠༠༠ ལྷག་དང་། གཞས་སྣ་འཁྲབ་སྟོན་བྱེད་མཁན་རྒྱུ་རྩལ་བ་༨༠༠ མཉམ་ཞུགས་བྱེད་ཀྱི་ཡོད་འདུག ད་ལོར་མཉམ་ཞུགས་བྱེད་མཁན་གྱི་མི་རིགས་མི་འདྲ་བའི་བྱིས་པའི་རུ་ཁག་༤༠ ཡོད་འདུག །
ས་གནས་གསར་འགོད་པ་རྡོ་སྦིས་ཀླུ་རྒྱལ།