ཧ་ཝར་ཌི་སློབ་གྲྭ་ཆེན་མོའི་རྒྱ་ཡིག་འཛིན་གྲྭ་རྒྱ་ནག་ནས་ཐའེ་ཝན་དུ་སྤོ་གཏན་འཁེལ་འདུག
ཨ་རིའི་ཧ་ཝར་ཌི་སློབ་གྲྭ་ཆེན་མོའི་(Harvard University)དབྱར་ཁའི་རྒྱ་ཡིག་འཛིན་གྲྭའི་ལས་རིམ་དེ་པེ་ཅིང་ནས་ཐའེ་ཝན་གྱི་རྒྱལ་ས་ཐའེ་པེ་(Taipei)རུ་སྤོ་གཏན་འཁེལ་འདུག་ཅིང་། ལས་རིམ་དེའི་འགན་འཛིན་ཇཱ་ན་ཧྥེར-ལུའུ་(Jennifer Liu)ཡིས་དེ་ལྟར་སྤོ་བའི་རྒྱུ་མཚན་ནི་པེ་ཅིང་སློབ་གྲྭ་ཆེན་མོ་ནས་“མཛའ་བརྩེའི་རྣམ་འགྱུར་ཞན་”པའི་ཡིན་སྐོར་འགྲེལ་བརྗོད་བྱས་ཡོད་འདུག
བདུན་ཕྲག་གོང་མར་ཧ་ཝར་ཌི་སློབ་གྲྭ་ཆེན་མོའི་འབྲེལ་ཡོད་སྡེ་ཚན་ནས་སློབ་ཆེན་དེའི་དབྱར་ཁའི་རྒྱ་ཡིག་འཛིན་གྲྭ་པེ་ཅིང་སློབ་གྲྭ་སྐད་ཡིག་སློབ་གྲྭ་ཆེན་མོ་(Beijing language and Culture University)ནས་ཐའེ་ཝན་རྒྱལ་ཡོངས་སློབ་གྲྭ་ཆེན་མོ་(National Taiwan University)ལ་སྤོ་གཏན་འཁེལ་ཡོད་པའི་གསལ་བསྒྲགས་སྤེལ་ཡོད་འདུག
ཧ་ཝར་ཌིའི་དབྱར་ཁའི་རྒྱ་ཡིག་འཛིན་གྲྭའི་ལས་རིམ་དེ་ལོ་ངོ་ ༡༥ ལྷག་གི་ཡར་སྔོན་ཏེ། ཕྱི་ལོ་ ༢༠༠༤ ལོར་འགོ་ཚུགས་ནས་མིང་ལ་ཧ་ཝར་ཌི་པེ་ཅིང་རིག་གནས་བརྗེ་རེས་(the Harvard Beijing Academy)ཞེས་བཏགས་ཡོད་འདུག་ན་ཡང་། ལོ་རྗེས་མ་མིང་དེའང་ཧ་ཝར་ཌི་ཐའེ་ཕེ་རིག་གནས་བརྗེ་རེས་(Harvard Taipei Academy)ལ་བསྒྱུར་གཏན་འཁེལ་ཡོད་འདུག
ལས་རིམ་དེའི་འགན་འཛིན་ཇཱ་ན་ཧྥེར-ལུའུ་ཡིས། ཧ་ཝར་ཌི་སློབ་ཆེན་གྱིས་དེ་ལྟར་ཐག་གཅོད་བྱེད་དགོས་པའི་རྒྱུ་མཚན་དེ་པེ་ཅིང་སློབ་གྲྭ་ཆེན་མོ་ནས་“མཛའ་བརྩེའི་རྣམ་འགྱུར་ཞན་”པར་ཐུག་ཡོད་པ་དང་། དེ་ཡང་ཨ་རྒྱའི་ཆབ་སྲིད་ཀྱི་རླུང་བུའི་ལྡང་ཕྱོགས་ལ་འགྱུར་བ་ཐེབས་པས་ཡིན་སྲིད་སྐོར་འགྲེལ་བརྗོད་བྱས་ཡོད་འདུག
ཁོང་གིས་ད་དུང་ཉེ་བའི་ལོ་ཤས་ནང་པེ་ཅིང་སྐད་ཡིག་སློབ་ཆེན་གྱིས་སློབ་གཉེར་བྱེད་དུ་ཡོང་མཁན་གྱི་སློབ་མ་རེ་ལ་ཉལ་ཁང་རེ་མཁོ་སྤྲོད་བྱེད་ཀྱི་མེད་པ་མ་ཟད། སྲིད་འཛིན་ཞི་ཅིན་ཕིང་གིས་དབང་ཆ་བཟུང་བའི་རྗེས་སུ། རྒྱ་ནག་གིས་ཨ་རིའི་ཤེས་ཡོན་ལྟེ་གནས་ཁང་ལ་བཟུང་བའི་ལྟ་སྟངས་ཞན་དུ་ཕྱིན་ནས་ ༢༠༡༩ ལོར་ཨ་རིའི་དགེ་སློབ་རྣམས་ལ་ཕྱི་ཟླ་ ༧ པའི་ཚེས་བཞིའི་ཨ་རིའི་རྒྱལ་སྟོན་དུས་ཆེན་སྲུང་བརྩི་བྱེད་དུ་བཅུག་མེད་ཚུལ་ཡང་བཤད་ཡོད་འདུག
ཧ་ཝར་ཌི་ཐའེ་ཕེའི་རྒྱ་ཡིག་འཛིན་གྲྭ་དེ་ལོ་རྗེས་མའི་ཕྱི་ཟླ་ ༦ པའི་ནང་དངོས་སུ་འཛུགས་རྒྱུ་དང་། དེར་སློབ་མ་ ༦༠ ཙམ་བསྡུ་གཏན་འཁེལ་ཡོད་འདུག་ཅིང་། ལས་རིམ་དེའི་ནང་དུ་རྒྱའི་སྐད་ཡིག་ཙམ་མ་ཡིན་པར་རྒྱལ་ཁབ་གཉིས་ཀྱི་རིག་གནས་བརྗེ་རེས་དང་ངོ་སྤྲོད་ཀྱི་ལས་འགུལ་སྣ་ཚོགས་ཀྱང་ཡོད་འདུག
ཐའེ་ཝན་རྒྱལ་ཡོངས་སློབ་གྲྭ་ཆེན་མོའི་རྒྱ་ཡིག་སྡེ་ཚན་གྱི་འགན་འཛིན་ཚེ་ཡ་སན་(Tsai Ya-hsun)གྱིས་རྒྱ་ནག་དང་ཐའེ་ཝན་གཉིས་ཀར་རྒྱ་ཡིག་སློབ་གཉེར་ཁང་སྤུས་ལེགས་ཡོད་ན་ཡང་། ༡༩༨༠ གྱ་གྲངས་ནང་དུ་རྒྱ་ནག་གིས་ཐའེ་ཝན་བསྒྲིབས་ནས་ཐའེ་ཝན་ལ་རྒྱ་ཡིག་སློབ་སྦྱོང་བྱེད་དུ་ཡོང་མཁན་དཀོན་ན་ཡང་། ད་ལྟ་ཨ་རྒྱའི་འབྲེལ་ལམ་སྡུག་ཏུ་འགྱུར་བཞིན་པའི་ཐོག ཨ་རིའི་གཞུང་གིས་ཁུང་ཙི་སློབ་གཉེར་ཁང་(Confucius Institutes)རྣམས་རྒྱའི་གཞུང་དོན་སྒྲུབ་མཁན་དུ་ངོས་འཛིན་བྱས་པར་བརྟེན་ཐའ་ཝན་རྒྱ་ཡིག་སློབ་སྦྱོང་བྱེད་ཡུལ་བླ་ན་མེད་པ་ཞིག་ཏུ་འགྱུར་བཞིན་ཡོད་སྐོར་བཤད་པའི་ཐོག། ཁོང་གིས་ཐའེ་ཝན་གྱི་རང་དབང་གི་ཁོར་ཡུག་དེ་སྐད་ཡིག་སློབ་སྦྱོང་བྱེད་མཁན་ཚོར་མཐུན་རྐྱེན་ལེགས་པོ་ཞིག་ཏུ་འགྱུར་ཆོག་པའི་ཡིད་ཆེས་བྱེད་ཀྱི་ཡོད་ཚུལ་ཡང་བརྗོད་ཡོད་འདུག
རྒྱ་ནག་གིས་ཤེས་ཡོན་དང་། ཚོང་ལས། ཆབ་སྲིད་ལ་སོགས་པའི་འཚོ་བའི་གྲུབ་ཆ་ཐམས་ཅད་ལ་སྟངས་འཛིན་དང་དྲག་གནོན་སྔར་བས་ཀྱང་ཆེ་བ་བྱེད་བཞིན་པའི་དུས་ཚོད་འདིར། རྒྱ་ནག་ནས་ཐའེ་ཝན་ལ་སྤོ་མཁན་དེ་རྒྱའི་སྐད་ཡིག་འཛིན་གྲྭ་ཁོ་ན་ཡིན་པར་རྒྱལ་སྤྱིའི་བཟོ་ཚོང་ཁང་དང་། གསར་ཁང་། གཞུང་འབྲེལ་མ་ཡིན་པའི་ཚོགས་པ་རྣམས་རྒྱ་ནག་ནས་ཐའེ་ཝན་དང་གནས་གཞན་དུ་སྤོ་བ་དང་སྤོ་བའི་བསམ་བློ་གཏོང་བཞིན་ཡོད་འདུག
ད་ལོའི་ཕྱི་ཟླ་ ༤ པའི་ནང་བྷེ་བྷེ་སི་གསར་ཁང་(BBC) གི་གསར་འགོད་པ་གྲགས་ཅན་ཇོན-སུ་ཝ་ཐི་(John Sudworth)རྒྱ་ནག་གཞུང་གི་འཇིགས་སྐུལ་མ་བཟོད་པར་རྒྱ་ནག་ནས་ཐའེ་ཝན་ལ་གནས་སྤོ་བྱེད་སྐབས། ཐའེ་ཝན་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཇོ་ནི་ཝོ་(Joanne Ou)ཡིས་རྒྱ་ནག་དང་ནུབ་ཕྱོགས་ཀྱི་འགལ་ཟླ་ཇེ་ཆེར་འགྱུར་བཞིན་པའི་གནས་སྟངས་་འོག་ནས་ ༢༠༢༠ ལོའི་ཕྱི་ཟླ་ ༣ པ་ནས་ ༢༠༢༡ ལོའི་ཕྱི་ཟླ་ ༣ པའི་བར་གྱི་ལོ་ངོ་གཅིག་གི་ནང་དུ་་ཐའེ་ཝན་དུ་རྒྱལ་སྤྱིའི་གསར་ཁང་ ༢༡ ཀྱི་ཡན་ལག་གསར་འཛུགས་དང་། གསར་འགོད་པ་ ༣༩ གསར་དུ་འབྱོར་ཚུལ་བསྒྲགས་ཡོད། །
གསར་འགོད་པ་དཀོན་མཆོག་རབ་བརྟན།
