ཧ་ཝར་ཌི་སློབ་ཆེན་ནང་དུ་བོད་ཀྱི་རིག་གཞུང་གི་ཚོགས་པ་ཞིག་གསར་འཛུགས།

ཨ་རིའི་ཧ་ཝར་ཌི་སློབ་གྲྭ་ཆེན་མོའི་(Harvard University) ནང་དུ་སློབ་གཉེར་བྱེད་བཞིན་པའི་བོད་ཀྱི་སློབ་མ་འགས་བོད་ཀྱི་རིག་གཞུང་བརྒྱུད་འཛིན་དང་ངོ་སྤྲོད་བྱེད་སའི་རིག་གཞུང་གི་ཚོགས་པ་ཞིག་གསར་འཛུགས་བྱས་ཡོད་འདུག

ཟླ་འདིའི་ཚེས་ ༢༤ ཉིན་ཧ་ཝར་ཌི་སློབ་ཆེན་གྱི་སློབ་མའི་ཉིན་རེའི་ཚགས་པར་ཁི་རི་སོན་(The Harvard Crimson) གྱིས་གནས་ཚུལ་སྤེལ་བ་ལྟར་ན། སྙན་གྲགས་ཆེ་བའི་སློབ་གྲྭ་ཆེན་མོ་དེར་སློབ་གཉེར་བྱེད་བཞིན་པའི་བོད་ཀྱི་སློབ་མ་ཁག་ཅིག་གིས་བོད་ཀྱི་རིག་གཞུང་རྒྱུན་འཛིན་དང་ངོ་སྤྲོད་བྱེད་པའི་ཆེད་དུ་རིག་གཞུང་གི་ཚོགས་པ་ཞིག་གསར་འཛུགས་བྱས་ཡོད་འདུག

རིག་གཞུང་གི་ཚོགས་པ་དེའི་ལས་རིམ་གོ་སྒྲིག་ཞུ་མཁན་གྱི་སློབ་མ་ཚེ་རིང་དབྱངས་ཅན་གྱིས་“ཧ་ཝར་ཌི་སློབ་ཆེན་འདིའི་ནང་དུ་བོད་པ་ཞེས་ཐུན་མོང་གི་ངོ་བོ་ཞིག་བྱུང་བ་དེ་རླབས་ཆེན་པོ་ཞིག་རེད་”ཅེས་བརྗོད་པའི་ཐོག “ང་ཚོ་འདིར་ཡོད་པ་ཁས་ལེན་དང་། ཚོགས་པ་འདི་འཛུགས་སུ་བཅུག་པ་ཁོ་ན་ཡང་ལེགས་གྲུབ་ཆེན་པོ་ཞིག་རེད་”ཅེས་བསྣན་ཡོད་འདུག

ཚོགས་པ་དེ་གསར་འཛུགས་བྱེད་མཁན་གྱི་ཚོགས་མི་བསྟན་འཛིན་བདེ་གྲགས་ཀྱིས་“འདི་ནི་ང་ཚོ་བོད་པ་ཙམ་མ་ཟད། བོད་ཀྱི་སྐོར་ལ་ཤེས་འདོད་ཡོད་མཁན་ཚོའི་ཆེད་དུའང་ཡིན་”ཞེས་བཤད་དེ་ཚོགས་པ་དེ་ནི་བོད་པ་ཚོ་དང་། བོད་ལ་དོ་སྣང་ཡོད་མཁན་ཚོའི་ཆེད་དུ་བཙུགས་པའི་རིག་གཞུང་གི་ཁོར་ཡུག་ཅིག་ཡིན་པའི་འགྲེལ་བརྗོད་བྱས་ཡོད་འདུག

ཧ་ཝར་ཌིའི་བོད་ཀྱི་རིག་གཞུང་གི་ཚོགས་པ་དེས་བོད་ཀྱི་རིག་གཞུང་དང་འབྲེལ་བའི་བྱ་འགུལ་སྤེལ་བའི་ཐོག ཕྱི་ལོ་ ༡༩༥༠ ལོར་རྒྱ་ནག་གིས་བོད་བཙན་འོག་ཏུ་བསྡུས་པའི་གནད་དོན་ཡང་གླེང་སློང་གི་བྱེད་སྒོ་སྤེལ་བའི་དམིགས་ཡུལ་དང་འཆར་གཞི་འཐེན་གྱི་ཡོད་འདུག
གཞན་ཡང་། ཟླ་བ་འདིའི་ནང་ལ་ཧ་ཝར་ཌི་སློབ་ཆེན་ནང་ལ་གསར་དུ་བཙུགས་པའི་བོད་ཀྱི་རིག་གཞུང་གི་ཚོགས་པ་དེས་ལྷག་དཀར་སྲུང་བརྩི་དང་། ད་ལོའི་ཕྱི་ཟླ་ ༣ པའི་བོད་ཀྱི་ལོ་གསར་བསུ་བ་ལ་སོགས་པའི་བོད་ཀྱི་རིག་གཞུང་དང་སྲོལ་རྒྱུན་དང་འབྲེལ་བའི་བྱེད་སྒོ་སྣ་ཚོགས་ཤིག་ཀྱང་གོ་སྒྲིག་ཞུས་ཏེ་བོད་ཀྱི་ངོ་བོ་སྲུང་སྐྱོབ་དང་རྒྱུན་འཛིན་བྱེད་པའི་དམིགས་ཡུལ་འཆང་གི་ཡོད་འདུག །

གསར་འགོད་པ་དཀོན་མཆོག་རབ་བརྟན།