ཧི་མ་ཅལ་མངའ་སྡེའི་ཁོངས་ཀྱི་བོད་པའི་སློབ་གྲྭ་ཁག་གི་ནང་ཁུལ་རིགས་ལམ་འདུ་འཛོམས་སྐབས་༡༡ པ་དབུ་འཛུགས་གནང་།
དེ་རིང་ཕྱི་ཚེས་༣༠་ཉིན་བོད་ཁྱིམ་གོ་གལ་པུར་དུ་ཧི་མ་ཅལ་མངའ་སྡེའི་ཁོངས་ཀྱི་བོད་པའི་སློབ་གྲྭ་ནང་ཁུལ་གྱི་སྐབས་བཅུ་གཅིག་པའི་རིགས་ལམ་འདུ་འཛོམས་ཀྱི་དབུ་འབྱེད་མཛད་སྒོ་འཚོགས་སོང་།
ཐེངས་འདིའི་རིགས་ལམ་འདུ་འཛོམས་དེ་ཕྱི་ཟླ་༩པའི་ཚེས་༣༠ ནས་ཕྱི་ཟླ་༡༠ ཚེས་༥ བར་འཚོག་རྒྱུ་ཡིན་འདུག སྐབས་དེར་སྐུ་མགྲོན་གཙོ་བོར་ཤེས་རིག་ལས་ཁུངས་གྱི་དྲུང་ཆེ་འཇིགས་མེད་རྣམ་རྒྱལ་ལགས་དང་ཆེད་འབོད་བོད་ཁྱིམ་སྤྱི་ཁྱབ་ཤེས་ཡོན་འགན་འཛིན་དགེ་ངག་དབང་ལྷ་མོ་ལགས་དང་དགེ་འདུན་གྱི་འདུལ་བ་འཛིན་པ་ལྟ་གྲུབ་སློབ་དཔོན་རྣམ་པ།བོད་ཁྱིམ་འགན་ཛིན་ལྷན་ཚོགས་དང་གོ་པལ་པུར་དབུ་འཛིན་དང་དགེ་རྒན་དང་སློབ་ཕྲུག་བཅས་ཚང་འཛོམས་གནང་བ་དང་སློབ་གྲྭ་ཁག་དྲུག་ནས་ཕན་ཚུན་དམ་བཅའ་དང་རྟགས་བསལ་བརྒྱུད་ནས་རིགས་ལམ་རྩོད་པའི་ཐོག་ནས་མཛད་སྒོ་དབུ་འཛུགས་གནང་།
མཚམས་དེར་གོ་པལ་པུར་དབུ་འཛིན་སྐལ་བཟང་ཕུན་ཚོགས་ལགས་ཀྱིས་འཚམས་འདྲིའི་གསུང་བཤད་དང་སྦྲགས་ཁོང་གིས་ལོ་ལྟར་ཕྱོགས་མཐའ་ཁག་ནས་སློབ་ཕྲུག་ཕེབས་པ་བཞིན། འདི་ལོར་རྡ་སྟེང་བོད་ཁྱིམ།སུ་ཇ་བོད་ཁྱིམ།ཅོན་ཏ་ར་བོད་ཁྱིམ་དང་གོ་པལ་པུར་བོད་ཁྱིམ་བཅས་ནས་སློབ་གྲྭ་རེའི་ངོས་ནས་སློབ་ཕྲུག་གྲངས་༥༠དང་སི་ལ་ཀུའི་བོད་ཁྱིམ་དང་དཔེ་སྟོན་བོད་ཁྱིམ་རེའི་ངོས་ནས་སློབ་གྲངས་༢༠། དེ་བཞིན་གོ་པལ་པུར་སློབ་གྲྭ་རང་གི་སློབ་མ་ཁག་ལ་གོ་སྐབས་དང་བསྟུན་མཉམ་བཞུགས་བཅས་ཁྱོན་བསྡོམས་པའི་སློབ་གྲངས་༣༠༠ཙམ་ཞིག་མཉམ་བཞུགས་གནང་ཐུབ་ཡོད་གསུངས་འདུག་པ་དང་། དེ་བཞིན་ཁོང་གིས་༧གོང་ས་མཆོག་གི་བཀའ་དོན་བཞིན་དབྱར་དུས་ནང་ཆོས་ངོ་སྤྲོད་སྐབས་སུ་ཐུགས་འགྱེས་ཚོར་ཆེན་པོའི་ངང་བཀའ་མངགས་པ་བཞིན་ད་ལོར་བློ་རིགས་བྱས་པ་བཞིན་ལོ་རྗེས་མར་རྟགས་རིགས་གནང་དགོས་པའི་བཀའ་སློབ་དེ་དྲན་སྐུལ་དང་འབོད་སྐུལ་གནང་འདུག་ལ། གཞན་ཡང་སློབ་ཕྲུག་ཚོར་གོ་སྐབས་བཟང་པོ་ཐོབ་པ་དེར་མ་འོངས་པར་སློབ་སྦྱོང་ཅི་ཞིག་ལ་འབད་ཀྱང་དེ་དང་མཉམ་དུ་མཉམ་བསྲེས་བཏང་ནས་མཐུན་མོང་མིན་པའི་སྲོལ་རྒྱུན་དེ་མི་ཉམས་རྒྱུན་འཛིན་བྱ་དགོས་པ་སོགས་བཀའ་སློབ་གནང་སོང་།
སྐབས་དེར་དམིགས་བསལ་སྐུ་མགྲོན་ངག་དབང་ལྷ་མོ་ལགས་ནས་སློབ་ཕྲུག་ཚོ་ལ་ད་ལྟ་འཛིན་གྲྭའི་བསླབ་གཞི་དེ་ཟུར་དུ་བཞག་ནས་དེར་ཡོང་ནས་དུས་ཚོད་བཏང་འཛིན་ནན་པོ་བྱ་དགོས་པ་དང་། འདིར་ཕེབས་པའི་སློབ་མ་རྣམས་རང་ངོས་སློབ་གྲྭ་ནང་ནས་དྲག་གྲས་ཡིན་པས་ཕན་ཚུན་ལེགས་ཆ་ལེན་དགོས་ཚུལ་དང་མཉམ་བཞུགས་གནང་སྐབས་འགོ་བཙུགས་པ་ནས་ཉིན་མཐའ་མ་བར་དུ་དྲོད་མ་ཡལ་བར་མཇུག་སྐྱོང་ཐུབ་དགོས་པའི་ནན་སྐུལ་གནང་།
མཐར་སྐུ་མགྲོན་གཙོ་བོ་འཇིགས་མེད་རྣམ་རྒྱལ་ལགས་ཀྱིས། སྤྱིར་རིགས་ལམ་དང་ཆོས་སྲིད་གང་ལ་ཡང་༧རྒྱལ་བ་རིན་པོ་ཆེའི་དགོངས་པ་ལྟར་སྒྲུབ་ཀྱི་ཡོད། དེ་མིན་པར་མི་སྐྱ་དང་མི་དམངས་སློབ་གྲྭའི་དགེ་རྒན་དང་འགོ་འཁྲིད་མཁན་གྱི་ངོས་ནས་གསར་གཏོད་དང་རྣམ་དཔྱོད་གསར་པའི་ཐོག་ནས་འབད་བརྩོན་བྱ་རྒྱུ་ནི་དེ་བས་གལ་ཆེན་ཡིན་པ་དང་། མ་ཟད་སློབ་ཕྲུག་རྣམས་ལ་བློ་འཛིན་གྱི་གལ་གནད་དང་དེའི་མཉམ་དུ་དོན་དག་གོ་རྟོགས་ཡོང་བ་བྱ་རྒྱུ་ནི་གལ་ཆེན་ཡིན་པ། ད་དུང་ལེགས་ཉེས་ཀྱི་གནས་ལ་མ་རྨོངས་པར་བྱ་དགོས་པའི་བཀའ་སློབ་བསྩལ་གནང་སོང་།་
མཐར་ཐུགས་རྗེ་ཆེ་ཞུས་གསུང་བཤད་གནང་རྗེས་ཚོགས་ཁང་ནང་དུ་འདུ་འཛོམས་གནང་མཁན་ཡོངས་ནས་རྔ་རོལ་དང་མཉམ་དུ་མགྲིན་བསངས་མཐོན་པོའི་ངང་ནས་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་སྦྲགས་མཛད་སྒོ་མཇུག་བསྡོམས་གནང་སོང་།
གསར་འགོད་པ། བསྟན་འཛིན་ཆོས་དབྱངས།
