ཧིན་དྷུ་ནི་ཞི་ཡས་ཨུ་རུ་སུ་ལ་ཉེས་འཛུགས་མི་བྱེད་པའི་རྒྱུ་མཚན་གཉིས་བགྲངས་འདུག

ཟླ་འདིའི་ཚེས་༡༠ ཉིན་རྒྱ་གར་གསར་ཁང་(TFIGlobal) ནས་གནས་ཚུལ་སྤེལ་བ་ལྟར་ན། རྒྱ་གར་དང་ཉི་ཧོང་བརྩིས་པའི་ལྷོ་ཤར་ཨེ་ཤི་ཡི་མཐུན་ཚོགས་རྒྱལ་ཁབ་ཁག་གིས་རྒྱ་ནག་གི་དམག་ཤུགས་གནས་བབས་ལ་སེམས་ཁྲེལ་བྱེད་མིན་ལ་མ་ལྟོས་པར། ཨ་རིའི་སྲིད་འཛིན་གྱིས་རྒྱལ་ཁབ་དེ་དག་ལ་ཨུ་རུ་སུར་ཉེས་འཛུགས་བྱེད་དགོས་པའི་བཙན་ བསྐུལ་བྱེད་ཀྱི་ཡོད་ན་ཡང་། ཨ་རིའི་སྲིད་འཛིན་གྱི་ལས་དོན་དེ་དག་ནི་ལམ་ལྷུང་བྱུང་མེད་པ་རེད།

ལྷོ་ཤར་ཨེ་ཤི་ཡིའི་མཐུན་ཚོགས་ཀྱི་རྒྱལ་ཁབ་ཆེ་ཤོས་སུ་གྱུར་པའི་ཧིན་དྷུ་ནི་ཞི་ཡས་ཨུ་རུ་སུ་ལ་ཉེས་འཛུགས་བྱེད་རྒྱུ་ཁས་ལེན་བྱས་མེད་ལ། དེ་ལས་ལྡོག་སྟེ་རྒྱ་ནག་ལ་དོ་སྣང་ཤུགས་ཆེ་བྱས་ཡོད་པའི་གནས་ཚུལ་ཐོན་འདུག

ཨ་རི་དང་ཧིན་དྷུ་ནི་ཞི་ཡ་གཉིས་ཀྱི་ཟུང་འབྲེལ་ཐོག་ལོ་རེ་Garuda Sheildཞེས་པའི་དམག་སྦྱོང་བྱེད་ཀྱི་ཡོད་པ་ དང་། ལོ་འདིའི་ལོ་འཁོར་དམག་སྦྱོང་ཐེངས་བཅུ་དྲུག་པ་དེ་ནི་ཕྱི་ཟླ་༨ པའི་ནང་དུ་བྱེད་འཆར་ཡོད་མོད། ལོ་འདིའི་ དམག་སྦྱོང་དེ་ནི་ལོ་སྔོན་མ་དང་མ་འདྲ་བར་གཞི་རྒྱ་ཆེ་རུ་གཏོང་རྒྱུ་ཡིན་པའི་གནས་ཚུལ་ཐོན་འདུག

ཐེངས་འདིའི་དམག་སྦྱོང་གི་ནང་དུ་དབྱིན་ཇི་དང་། ཨོ་སི་ཁྲི་ལི་ཡ། ཉི་ཧོང་། ཁ་ན་ཌ། སིང་ག་པོར། མ་ལེ་ཤི་ཡ་བཅས་ཁྱོན་བསྡོམ་རྒྱལ་ཁབ་བཅུ་བཞི་འཛུལ་ཞུགས་བྱེད་རྒྱུ་ཡིན་པའི་གནས་ཚུལ་འདུག་ལ། རྒྱལ་ཁབ་དེ་དག་གི་ཁྲོད་ནས་ཉི་ཧོང་དང་། ཨོ་སི་ཁྲི་ལི་ཡ། སིང་ག་པོར། མ་ལེ་ཤི་ཡ་བཅས་ནི་རྒྱ་ནག་ལ་མ་དགའ་མཁན་རྐྱང་པ་ཡིན་འདུག་པས། ཧིན་དྷུ་ནི་ཤི་ཡས་དམག་སྦྱོང་དེ་ནི་གཙོ་བོ་རྒྱ་ནག་ལ་ཁ་གཏད་བཅག་རྒྱུའི་ཆེད་དུ་ཡིན་པར་ངོས་འཛིན་གསལ་བོ་བྱས་ཡོོད་ལ། དེ་བཞིན་ཁོ་ཚོས་ཨ་རིའི་སྲིད་འཛིན་ལ་ཡང་རྒྱ་ནག་ལ་ངོ་རྒོལ་གྱི་ནུས་པ་ཇེ་ཆུང་གཏོང་བཅུག་འདོད་མེད་པའི་གནས་ཚུལ་ཐོན་འདུག

འདས་པའི་ཟླ་བ་གཅིག་ལྷག་གི་རིང་ནུབ་ཕྱོགས་པའི་རྒྱལ་ཁབ་མང་པོས་ཨུ་རུ་སུ་ལ་ཉེས་ཆད་བཅད་ཡོད་པ་དང་། ཨ་རིས་ཀྱང་ཕྱི་འབྲེལ་གྱི་ཐབས་ལམ་སྣ་ཚོགས་བརྒྱུད་ནས་ལྷོ་ཤར་ཨེ་ཤི་ཡའི་རྒྱལ་ཁབ་མང་པོ་ཁོང་ཚོ་དང་མཉམ་ཞུགས་ཡོང་ཐབས་བྱས་ཀྱང་། ཟླ་བ་སྔོ་མ་ཧིན་དྷུ་ནི་ཞི་ཡས་ཨུ་རུ་སུ་ལ་ཉེས་ཆད་འགེལ་རྒྱུ་མིན་པ་གསལ་བོ་བཟོས་ཡོད་འདུག

དེ་ཡང་ཧིན་དྷུ་ན་ཞི་ཡའི་སྲིད་འཛིན་ཇོ་ཁོ་ཡིས་(Joko Widodo) བཅར་དྲི་ཞིག་གི་ལན་དུ། ཉེས་ཆེད་འགེལ་བ་དེ་ནི་དཀའ་ངལ་སེམ་ཐབས་བཟང་ཤོས་དེ་མིན་པ་མ་ཟད། ཉེས་ཆེད་དེའི་དབང་གིས་དཀའ་སྡུག་མྱོང་མཁན་ནི་མི་མང་དང་མི་སེར་དཀྱུས་མ་ཚོ་ཡིན་པའི་སྐོར་དང་། དེ་བཞིན་ཨུ་རུ་སུ་དང་ཡུག་རེན་གཉིས་ནི་ཧིན་དྷུ་ནི་ཞི་ཡའི་གྲོགས་པོ་ཡིན་པས་ཧིན་དྷུ་ནི་ཞི་ཡ་ནི་བར་གནས་སུ་འདུག་རྒྱུ་ཡིན་ཞེས་བརྗོད་ཡོད་པའི་གནས་ཚུལ་འདུག

ཧིན་དྷུ་ནི་ཞི་ཡས་ཨུ་རུ་སུ་ལ་ཉེས་འཛུགས་མི་བྱེད་པའི་རྒྱུ་མཚན་གཅིག་ནི་ཧིན་དྷུ་ནི་ཞི་ཡ་དང་། རྒྱ་ནག་བར་གླིང་ཕྲན་ཁུལ་གྱི་ས་ཆའི་ཐོག་རྩོད་རྙོག་ཡོང་གི་ཡོད་པས་རྒྱ་ནག་ནི་ཁོང་ཚོའི་བདེ་འཇགས་ལ་ཉེན་ཁ་ཞིག་ཏུ་མཐོང་གི་ཡོད་པས། རྒྱ་ནག་ནི་ཁོང་ཚོའི་དགྲ་བོ་ཡིན་པ་དང་ཨུ་རུ་སུ་ནི་ཁོང་ཚོ་འི་དགྲ་བོ་མིན་པའི་རྒྱུ་མཚན་དང་། གཉིས་ནི་ཨུ་རུ་སུ་ལ་ཉེས་འཛུགས་བྱེད་རྒྱུ་དེ་ལ་ཧིན་དྷུ་ནི་ཞི་ཡའི་མི་མང་གིས་འདོད་མོས་བྱེད་ཀྱི་མེད་པ་དང་། གསུམ་ནི་ཡུག་རེན་གྱི་དཀའ་རྙོག་ཐོག་ལ་ཨ་རིས་ཡ་ལན་བྱེད་སྟངས་ནི་ཧ་ཅང་སྐྱོ་བོ་ཡོད་པ་མཐོང་བས་ནམ་ཞིག་རྒྱ་ནག་གིས་ཁོ་ཚོ་ལ་བཙན་འཛུལ་བྱས་ཚེ་ཨ་རིས་དེ་བཞིན་བྱེད་རྒྱུ་ཡིན་པར་ངེས་ནས་ཧིན་དྷུ་ནི་ཞི་ཡས་ཨ་རིའི་སྲིད་འཛིན་གྱི་འདོད་པ་ལྟར་ཨུ་རུ་སུ་ལ་ཉེས་འཛུགས་བྱས་མེད་པ་རེད།

ཧིན་དྷུ་ནི་ཞི་ཡས་ཨུ་རུ་སུ་ལ་ཉེས་འཛུགས་བྱེད་རྒྱུ་མིན་པ་དང་། ཉེས་ཆད་ཀྱང་འགེལ་རྒྱུ་མིན་པ་ཁོང་ཚོས་མུ་མཐུད་ནས་རྒྱ་ནག་ལ་ཁ་གཏད་བཅག་རྒྱུ་ཡིན་པའི་བརྡ་ལན་གསལ་བོ་སྤྲད་ཡོད་པའི་གནས་ཚུལ་ཐོན་འདུག །

གསར་འགོད་པ་བློ་བཟང་རྒྱ་མཚོ།