ཧོང་ཀོང་གི་ངོ་རྒོལ་ལ་རྒྱབ་སྐྱོར་བྱེད་པའི་ཁྲིམས་འཆར་གསུམ་ལ་ཨ་རིའི་གྲོས་ཚོགས་འོག་མའི་ནང་རྒྱབ་སྐྱོར་ཐོབ་འདུག

ཧོང་ཀོང་གྲོང་ཁྱེར་དུ་རྒྱ་ནག་གཞུང་ལ་ངོ་རྒོལ་གྱི་མང་གཙོའི་ལས་འགུལ་བརྩམས་ནས་ཟླ་བ་བཞི་ཙམ་འགྲོ་བཞིན་ཡོད་པ་མ་ཟད། ངོ་རྒོལ་བ་དང་ཉེན་རྟོག་པ་གཉིས་ཀྱི་བར་དུ་དྲག་པོའི་གདོང་ཐུག་ཇེ་མང་དང་། རྒྱ་ནག་གཞུང་ནས་ངོ་རྒོལ་བ་རྣམས་ལ་བཙན་གནོན་བྱེད་རྒྱུའི་ཉེན་བརྡ་དང་འཇིགས་སྐུལ་མང་པོ་བཏང་ནས་ཧོང་ཀོང་གི་གནས་སྟངས་དེ་ཉིན་རེ་བཞིན་ཉེན་ཚབས་ཇེ་ཆེར་འགྲོ་བཞིན་པའི་སྐབས་འདིར། ཨ་རིའི་གྲོས་ཚོགས་འོག་མ་ནས་ཧོང་ཀོང་གི་ངོ་རྒོལ་ལ་རྒྱབ་སྐྱོར་བྱེད་པའི་ཁྲིམས་འཆར་གསུམ་ལ་མོས་མཐུན་གཏན་འབེབས་བྱས་ཡོད་འདུག 

དེ་ཡང་ཟླ་འདིའི་ཚེས་༡༦ ཉིན་རྒྱལ་སྤྱིའི་བརྒྱུད་ལམ་ཁག་ནས་གནས་ཚུལ་སྤེལ་གསལ་ལ། ཨ་རིའི་གྲོས་ཚོགས་འོག་མས་རེས་གཟའ་མིག་དམར་ཉིན་ཧོང་ཀོང་གི་ངོ་རྒོལ་ལ་རྒྱབ་སྐྱོར་བྱེད་པའི་ཁྲིམས་འཆར་གསུམ་ལ་སྤྱི་མོས་ཀྱིས་མོས་མཐུན་རྒྱབ་སྐྱོར་བྱས་ཡོད་འདུག 

ཁྲིམས་འཆར་དེ་གསུམ་ནི། དང་པོ་ཧོང་ཀོང་གི་གནད་དོན་ལ་རྒྱ་ནག་གཞུང་གིས་ཁྲིམས་འགལ་ཐོག་ནས་ཐེ་གཏོགས་བྱེད་བཞིན་པར་སྐྱོན་བརྗོད་དང་། ཧོང་ཀོང་མི་མང་གི་ངོ་རྒོལ་ཐོབ་ཐང་ལ་རྒྱབ་སྐྱོར། གཉིས་པ་ཨ་རིའི་ཕྱི་སྲིད་དྲུང་ཆེས་ལོ་རེ་བཞིན་ཧོང་ཀོང་གི་དཔལ་འབྱོར་དང་། ཚོང་ལས་ཀྱི་གནས་བབ་ལ་རྟོག་ཞིབ་ཀྱིས་ཧོང་ཀོང་གི་གཞི་རྩའི་ཁྲིམས་ལ་རྒྱ་ནག་གིས་རྡོག་རོལ་གཏོང་གི་ཡོད་མེད་ལྟ་རྟོག་བྱེད་པ། གསུམ་པ་ཨ་རིའི་གོ་མཚོན་རྣམས་ཧོང་ཀོང་གི་ཉེན་རྟོག་པས་ངོ་རྒོལ་བའི་ཐོག་ལ་བཀོལ་སྤྱོད་བྱེད་རྒྱུ་མེད་པ་བཟོ་བ་བཅས་ཡིན་ལ། ཁྲིམས་འཆར་དེ་གསུམ་ཀ་ངག་ཐོག་གི་འོས་བསྡུ་བརྒྱུད་དེ་སྤྱི་མོས་ཀྱི་ལམ་ནས་རྒྱབ་སྐྱོར་བྱུང་བ་ཞིག་ཡིན་འདུག 

གྲོས་ཚོགས་འོག་མའི་ཚོགས་གཙོ་ལྕམ་ནན་སི-ཕེ་ལོ་སི་(Nancy Pelosi)ཡིས་“གལ་སྲིད་ཨ་རིས་དཔལ་འབྱོར་གྱི་ཁེ་ཕན་བསམས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་ལ་སྐད་ཆ་མ་བཤད་པ་ཡིན་ན། ང་ཚོ་ལ་འཛམ་གླིང་གི་ས་ཕྱོགས་གང་དུ་ཡང་འགྲོ་བ་མིའི་ཐོབ་ཐང་སྐོར་ལ་སྐད་ཆ་བཤད་པའི་ཀུན་སྤྱོད་ཀྱི་དབང་ཚད་དེ་མེད་པར་འགྱུར་ངེས་”ཞེས་གསུངས་པའི་ཐོག ཧོང་ཀོང་གི་ན་གཞོན་ངོ་རྒོལ་བ་ཚོའི་སྙིང་སྟོབས་དེ་ཁྲིམས་དང་སྒྲིག་གཞི་དང་། “རྒྱལ་ཁབ་གཅིག་ལ་ལམ་ལུགས་གཉིས་”ཀྱི་སྲིད་བྱུས་ལ་བརྩི་སྲུང་མི་བྱེད་མཁན་གྱི་སྲིད་གཞུང་སྡར་མ་དེ་ལས་ཡོངས་སུ་ལྡོག་ཡོད་ཚུལ་གསུངས་ཡོད་འདུག 

ཧོང་ཀོང་དང་འབྲེལ་བའི་ཁྲིམས་འཆར་དེ་གསུམ་གྱི་གཅིག་ལ་མཐུན་རྐྱེན་རོགས་སྐྱོར་བྱེད་མཁན་གཙོ་བོ་སྟེ། གྲོས་ཚོགས་འོག་མའི་འཐུས་མི་ཁུ་རི་སི་ཧྥར-སི་མིད་ཐི(Christopher Smith)ཡིས་“པེ་ཅིང་སྲིད་གཞུང་གིས་ཁས་ལེན་དམ་བཅའ་བྱས་པ་རྣམས་ལག་ལེན་བསྟར་བ་ཞིག་ཧ་ལམ་མེད། རང་དབང་ལྡན་པའི་རྒྱལ་ཁབ་དག་གི་འགོ་ཁྲིད་ཤིན་ཏུ་མང་པོ་ཞིག་གིས་བརྟག་དཔྱད་ཞིབ་འཇུག་མེད་པར་དངོས་ཡོད་གནས་ཚུལ་གྱི་ཚབ་ཏུ་[རྒྱ་ནག་གི]དམ་བཅའ་སྟོང་བ་རྣམས་ཁས་ལེན་རྐྱང་བྱེད་ཀྱི་ཡོད་”ཅེས་བརྗོད་པ་དང་། དེ་བཞིན་ཁྲིམས་འཆར་གཅིག་གི་སྦྱིན་བདག་དང་གྲོས་ཚོགས་འོག་མའི་འཐུས་མི་བྷི་ར་ཌ-ཤར་མན་(Brad Sherman)གྱིས་“འཛམ་གླིང་གིས་ཧོང་ཀོང་ལ་ལྟ་བཞིན་ཡོད་ལ། ཧོང་ཀོང་གིས་ཨ་རིའི་གྲོས་ཚོགས་འོག་མས་རྒྱ་ནག་སྲིད་གཞུང་གི་ཚབ་ཏུ་ངོ་རྒོལ་བ་ཚོར་རྒྱབ་སྐྱོར་བྱེད་མིན་ལ་ལྟ་བཞིན་ཡོད་”ཅེས་བཤད་ཡོད་འདུག 

ཨ་རིའི་གྲོས་ཚོགས་འོག་མས་དེ་ལྟར་ཁྲིམས་འཆར་གསུམ་ལ་མོས་མཐུན་གཏན་འབེབས་ཀྱིས་ཧོང་ཀོང་གི་ངོ་རྒོལ་ལ་རྒྱབ་སྐྱོར་ཤུགས་ཆེན་བྱས་རྗེས། རྒྱ་ནག་གིས་དུས་རྒྱུན་ལྟར་ཨ་རི་ལ་རྒྱ་ནག་ནང་ལོགས་ཀྱི་གནད་དོན་ལ“ཐེ་བྱུས་བྱེད་མཚམས་འཇོག་དགོས”ཞེས་བཤད་དེ་ངོ་རྒོལ་དང་དགག་པ་ཤུགས་ཆེན་བརྒྱབས་ཡོད་འདུག 

ད་ནི་ཁྲིམས་འཆར་དེ་གསུམ་ཨ་རིའི་གྲོས་ཚོགས་གོང་མར་འགྲོ་ངེས་པ་དང་། གལ་སྲིད་གྲོས་ཚོགས་གོང་མ་ནས་ཀྱང་མོས་མཐུན་རྒྱབ་སྐྱོར་བྱུང་ནས་སྲིད་འཛིན་གྱི་མཚན་རྟགས་བཀོད་པ་ཡིན་ན། ཁྲིམས་འཆར་དེ་གསུམ་དངོས་སུ་ཨ་རི་རྒྱལ་ཁབ་ཀྱི་ཁྲིམས་སུ་འགྱུར་ངེས་རེད། ། 

གསར་འགོད་པ་དཀོན་མཆོག་རབ་བརྟན།