ཧོང་ཀོང་གྱི་ངོ་རྒོལ་དང་དབྱིན་རྒྱའི་རྩོད་རྙོག་སྐོར་གྱི་དཔྱད་བརྗོད།
དབྱིན་ཡུལ་གྱིས་ཧོང་ཀོང་གི་མང་གཙོ་དོན་གཉེར་བྱེད་མཁན་གྱི་ངོ་རྒོལ་བ་ཚོར་རྒྱབ་སྐྱོར་བྱས་ཡོད་པ་དེ། དབྱིན་ཇི་གཞུང་ནས་“རྒྱལ་ཁབ་གཅིག་ལ་མ་ལུགས་གཉིས་”ཀྱི་སྲིད་བྱུས (འདིས་ཧོང་ཀོང་གི་མི་སེར་ཚོར་རྒྱ་ནག་སྐམ་ས་ཆེན་མོའི་མི་མང་དང་མི་འདྲ་བའི་ཁྲིམས་དང་ཐོབ་ཐང་སྤྲོད་ཀྱི་ཡོད།) ཅེས་ཀྱང་མུ་མཐུད་ལག་བསྟར་བྱེད་དགོས་ཚུལ་བརྗོད་ཀྱི་ཡོད། དེར་རྒྱ་ནག་གིས་དབྱིན་ཇིའི་སྲིད་གཞུང་ལ་རྒྱ་ནག་ནང་ལོགས་ཀྱི་གནད་དོན་ལ་ཐེ་བྱུས་བྱས་པའི་ངན་ཁག་བཙུགས་ཡོད།
བྷི་བྷི་སི་གསར་ཁང་ནས་ཟླ་འདིའི་ཚེས་༤ ཉིན་སྤེལ།
དཀོན་མཆོག་རབ་བརྟན་གྱིས་ཚེས་༨ ཉིན་བསྒྱུར།
ཅིའི་ཕྱིར་རྒྱ་ནག་དང་དབྱིན་ཇི་གཉིས་ཀྱིས་ཧོང་ཀོང་གི་གནད་དོན་རྩོད་བཞིན་ཡོད་དམ།
དབྱིན་ཡུལ་གྱིས་ཧོང་ཀོང་གི་མང་གཙོ་དོན་གཉེར་བྱེད་མཁན་གྱི་ངོ་རྒོལ་བ་ཚོར་རྒྱབ་སྐྱོར་བྱས་ཡོད་པ་དེ། དབྱིན་ཇི་གཞུང་ནས་“རྒྱལ་ཁབ་གཅིག་ལ་མ་ལུགས་གཉིས་”ཀྱི་སྲིད་བྱུས (འདིས་ཧོང་ཀོང་གི་མི་སེར་ཚོར་རྒྱ་ནག་སྐམ་ས་ཆེན་མོའི་མི་མང་དང་མི་འདྲ་བའི་ཁྲིམས་དང་ཐོབ་ཐང་སྤྲོད་ཀྱི་ཡོད།) ཅེས་ཀྱང་མུ་མཐུད་ལག་བསྟར་བྱེད་དགོས་ཚུལ་བརྗོད་ཀྱི་ཡོད། དེར་རྒྱ་ནག་གིས་དབྱིན་ཇིའི་སྲིད་གཞུང་ལ་རྒྱ་ནག་ནང་ལོགས་ཀྱི་གནད་དོན་ལ་ཐེ་བྱུས་བྱས་པའི་ངན་ཁག་བཙུགས་ཡོད།
དོན་དངོས་ཐོག་ཅི་ཞིག་འབྱུང་བཞིན་ཡོད་དམ།
ཧོང་ཀོང་དུ་ཁྲིམས་འཆར་ཞིག་ལ་རྒྱ་ཆེའི་མི་མང་གི་ངོ་རྒོལ་རབ་དང་རིམ་པ་བྱུང་དང་འབྱུང་མུས་སུ་ཡོད། ཁྲིམས་འཆར་དེ་ནི་པེ་ཅིང་ཕྱོགས་གཏོགས་ཀྱི་འགོ་ཁྲིད་ཁེ་རི་ལེམ (Carrie Lam) གྱིས་མཚམས་སྦྱོར་བྱས་པ་ཞིག་ཡིན་ཞིང་། དེས་དོགས་ཡོད་ཉེས་ཅན་རྣམས་རྒྱ་ནག་སྐམ་ས་ཆེན་མོར་ཁྲིད་ནས་ཁྲིམས་ཐག་གཅོད་སྟབས་བདེ་རུ་གཏོང་གི་ཡོད།
ངོ་རྒོལ་བ་ཚོས་ཁྲིམས་འཆར་དེས་ཧོང་ཀོང་གི་རང་སྲིད་རང་སྐྱོང་གཏོར་སྐྱོན་དང་། རང་དབང་ཅན་གྱི་ཁྲིམས་ལུགས་མེད་པ་བཟོ་ངེས་ཞེས་རྩོད་སྒྲུབ་བྱེད་ཀྱི་ཡོད་ལ། དེ་བཞིན་རྒྱ་ནག་གིས་ཁྲིམས་འཆར་དེ་ཆབ་སྲིད་ཀྱི་ལག་ཆར་བེད་སྤྱོད་བྱེད་སྲིད་པར་ཞེད་སྣང་ལང་གི་ཡོད།
ཧོང་ཀོང་མི་མང་གི་གཞི་རྒྱ་ཆེ་བའི་ངོ་རྒལ་ལ་བརྟེན་ནས་ཁྲིམས་འཆར་དེ་ཕར་འགྱངས་བྱས་ཡོད་རུང་། ད་ལྟའི་ཆར་ཡོངས་སུ་ཕྱིར་བསྡུ་བྱས་མེད།
དབྱིན་ཇིའི་ཕྱི་སྲིད་དྲུང་ཆེ་ཇར་མི–ཧན་ཐྲི (Jeremy Hunt) ཡིས་ངོ་རྒོལ་བའི་དྲག་སྤྱོད་ལ་སྐྱོན་བརྗོད་བྱས་ཡོད་ཀྱང་། དེ་དང་ཆབས་ཅིག་གལ་སྲིད་རྒྱ་ནག་གིས་དྲག་སྤྱོད་བཀོལ་ནས་ངོ་རྒོལ་བ་རྣམས་ལ་དྲག་གནོན་བྱས་ན། མཇུག་འབྲས་ཚབས་ཆེན་འབྱུང་ངེས་ཞེས་བཤད་པ་མ་ཟད། ད་རུང་རྒྱ་ནག་གིས་ངེས་པར་དུ་ཧོང་ཀོང་གི་ཚད་གཞི་མཐོ་བའི་རང་སྲིད་རང་སྐྱོང་ལ་བརྩི་བཀུར་ཞུ་དགོས་ཚུལ་བརྗོད་ཡོད།
དེའི་ལན་དུ་དབྱིན་ཇིར་ཡོད་པའི་རྒྱ་ནག་གི་སྐུ་ཚབ་པ་ལོའོ-ཤོའོ་མིན (Liu Xiaoming) གྱིས་སྐུ་ཞབས་ཇར་མི-ཧན་ཐྲི་ཡི་སྐད་ཆ་དེས་དབྱིན་རྒྱའི་འབྲེལ་བ་གཏོར་སྐྱོན་བཏང་ཚུལ་བཤད་པ་མ་ཟད། དབྱིན་ཇི་”ཁྲམ་པ་”ཡིན་པའི་ཉེས་འཛུགས་ཀྱང་བྱས་ཡོད།
ཅིའི་ཕྱིར་ཧོང་ཀོང་གི་གནད་དོན་ལ་དབྱིན་ཇིར་ཐེ་ཇུས་ཡོད་དམ།
དབྱིན་རྒྱའི་དམག་འཁྲུག་(༡༨༤༡ ལོར) བྱུང་རྗེས། ཧོང་ཀོང་དབྱིན་ཇིའི་མངའ་འོག་ཏུ་ལོ་༡༥༦ བསྡད་ཡོད། ཕྱི་ལོ་༡༨༩༨ ལོར་དབྱིན་ཇིས་ཧོང་ཀོང་གི་ས་ཁུལ་རྒྱ་སྐྱེད་བྱས་ཀྱང་། གསར་དུ་རྒྱ་སྐྱེད་བྱས་པའི་ས་ཁུལ་དེ་རྒྱ་ནག་གི་ལག་ནས་ལོ་ངོ་༩༩ རིང་བོགས་གཏོང་གན་འཇོག་བྱས་ནས་བླངས་པ་ཡིན།
ཕྱི་ལོ་༡༩༨༤ ལོར། སྐབས་དེའི་དབྱིན་ཇིའི་སྲིད་བློན་མར་གྷར་ཐྲི-ཐེ་ཆིར (Margaret Thatcher) གྱིས་རྒྱ་ནག་གཞུང་དང་ལྷན་དུ་”མཉམ་འབྲེལ་གྱི་བསྒྲགས་གཏམ” (Joint declaration) ལ་མཚན་རྟགས་བཀོད་ཅིང་། བསྒྲགས་གཏམ་དེའི་ནང་ཆ་རྐྱེན་མང་པོ་ཞིག་གི་ཐོག་ནས་དབྱིན་ཇིས་ཕྱི་ལོ་༡༩༩༧ ལོར་ཧོང་ཀོང་ཕྱིར་རྒྱ་ནག་ལ་རྩིས་སྤྲོད་པའི་མོས་མཐུན་བྱས་ཡོད་ལ། ཆ་རྐྱེན་དེ་དག་གི་ཁྲོད་དུ་ཧོང་ཀོང་གི་ཚད་གཞི་མཐོ་བའི་རང་སྲིད་རང་སྐྱོང་དང་། རྒྱ་ནག་སྐམ་ས་ཆེན་མོར་མེད་པའི་ཐོབ་ཐང་ངེས་ཅན་རྣམས་བརྩི་སྲུང་བྱེད་རྒྱུ་སོགས་འདུས་ཡོད་པ་མ་ཟད། ད་རུང་རྒྱ་ནག་དམར་ཤོག་རིང་ལུགས་དང་མི་མཚུངས་པའི་མ་རྩ་རིང་ལུགས་མུ་མཐུད་ཧོང་ཀོང་དུ་ལག་བསྟར་རྒྱུན་སྐྱོང་བྱེད་པའི་མོས་མཐུན་ཡང་བྱུང་ཡོད།
དབྱིན་རྒྱ་རྒྱལ་ཁབ་གཉིས་ཀྱི་བར་དུ་བཞག་པའི་གྲོས་མཐུན་དེ་འབྱུང་འགྱུར་གྱི་ལོ་༥༠ རིང་གནས་ངེས་པ་དང་། དེ་ནི་ཕྱི་ལོ་༢༠༤༧ བར་ཡིན།
དབྱིན་ཇིའི་ཕྱི་སྲིད་དྲུང་ཆེ་ཧན་ཐྲི་ཡིས་རྒྱལ་ཁབ་གཉིས་ཀྱི་གྲོས་མཐུན་གྱི་ཡིག་ཆ་དང་བསམ་བློ་ལ་ངེས་པར་དུ་བརྩི་སྲུང་བྱེད་དགོས་ཚུལ་བཤད་ཡོད་ལ། དེ་བཞིན་ཧོང་ཀོང་དུ་དབྱིན་ཇིའི་མི་སེར་༣༠༠,༠༠༠ འཚོ་གནས་བྱེད་ཀྱི་ཡོད་པས། དབྱིན་ཇིས་ཧོང་ཀོང་ལ་དོ་ཁུར་བྱེད་ཀྱི་ཡོད་ལ། སྤྱི་ཡོངས་ནས་བཤད་ན། དབྱིན་ཇིའི་སྲིད་གཞུང་གིས་མང་གཙོ་ལ་རྒྱབ་སྐྱོར་བྱེད་པའི་རྣམ་པ་གཞན་ལ་མངོན་དུ་འཇུག་འདོད་ཀྱང་ཡོད།
རྒྱ་ནག་གིས་དབྱིན་ཇིའི་དགོས་འདུན་ལ་ཅི་ཞིག་བརྗོད་ཀྱི་ཡོད་དམ།
རྒྱལ་ཁབ་གཉིས་ཀྱི་རྩོད་གཞི་ནི་”མཉམ་འབྲེལ་གྱི་བསྒྲགས་གཏམ་”ད་དུང་ཁྲིམས་མཐུན་ཚད་མ་ཡིན་མིན་དེ་ཡིན་ཞིང་། རྒྱ་ནག་གིས་དེ་ནི་ལོ་རྒྱུས་ཀྱི་ཡིག་ཆ་ཙམ་ཡིན་ཚུལ་བཤད་ཀྱི་ཡོད་དེ། རྒྱ་ནག་གི་འགོ་ཁྲིད་ཚོས་ཧོང་ཀོང་ནི་རྩིས་སྤྲོད་རྩིས་ལེན་སྐབས་སུ་གཏན་འབེབས་བྱས་པའི་རྩ་ཁྲིམས་འོག་འགྲོ་བཞིན་ཡོད་སྐོར་རྗོད་ཀྱི་ཡོད། རྩ་ཁྲིམས་དེ་ལ་གཞི་རྩའི་ཁྲིམས་(Basic Law) ཟེར་ཞིང་། དེ་ནི་ཧོང་ཀོང་གི་”རྒྱལ་ཁབ་གཅིག་ལ་ལམ་ལུགས་གཉིས་”ཀྱི་སྒྲོམ་གཞི་ཆགས་ཡོད།
འོན་ཀྱང་། དབྱིན་ཇིས་དབྱིན་རྒྱ་གཉིས་ཀྱི་ཆིངས་ཡིག་དེ་ད་དུང་ཡང་ཁྲིམས་མཐུན་ཚད་མ་ཡིན་ཞེས་བཤད་ཀྱི་ཡོད་ཅིང་། དབྱིན་རྒྱ་ནག་བར་གནད་དོན་འདིའི་ཐོག་ལོ་མང་རིང་རྩོད་རྙོག་བྱུང་དང་འབྱུང་མུས་ཡོད།
རྒྱ་ནག་ལ་མཇུག་འབྲས་ཚབས་ཆེན་ཅི་ཞིག་འབྱུང་སྲིད་དམ།
དེ་གསལ་པོ་མེད་ལ། གནད་དོན་ཐུག་སའང་དེ་ཡིན། དབྱིན་ཇིའི་ཕྱི་སྲིད་དྲུང་ཆེས་ཐག་གཅོད་ཅི་ཞིག་བྱས་བྱས་ཡིན་པའི་བརྗོད་པ་ལས། རྒྱ་ནག་གཞུང་ཚབ་འགོ་ཁྲིད་རྣམས་ཕྱིར་ཕུད་གཏོང་བའམ། རྒྱ་ནག་ལ་ཉེས་ཆད་གཅོད་པ་ལྟ་བུའི་གསལ་ཁ་བཏོན་མེད། ཁོས་དེ་ནི་རྒྱ་ནག་བཀག་འགོག་བྱེད་པའི་ཐབས་བྱུས་མངོན་པར་མི་གསལ་བ་ཞིག་ཡིན་ཚུལ་བཤད་ཡོད།
ཇི་ལྟར་བྱས་རུང་། དབྱིན་ཇིའི་གཞུང་ནས་ཡ་ཡུད་ཆེ་བའི་ཡ་ལན་ཞིག་སྟེར་རྒྱུ་ཁག་པོ་རེད། རྒྱུ་མཚན་ནི་དབྱིན་ཇིས་རྒྱ་ནག་དང་ལྷན་དུ་དཔལ་འབྱོར་གྱི་འབྲེལ་ལམ་གོང་འཕེལ་གཏོང་རྒྱུའི་རེ་བ་འཆང་བཞིན་ཡོད་ཅིང་། ཟླ་གོང་མར་ཚོང་ལས་ཀྱི་གྲོས་མཐུན་བཞག་ཚར་ཙམ་ཡིན། །
