ཧོང་ཀོང་དུ་ངོ་རྒོལ་མུ་མཐུད་བྱུང་བ་དང་མི་༣༦ ལ་རྨས་སྐྱོན་ཕོག་འདུག

ཕྱི་ལོ་༢༠༡༩ ཟླ་༧ ཚེས་༢༢ ཉིན། དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་ཉི་མའི་དགོང་མོར། སྟོད་ཐུང་དཀར་པོ་གྱོན་ཞིང་དབྱུག་པ་ཐོགས་པའི་མི་ཁག་ཅིག་གིས་ཧོང་ཀོང་གི་མེ་འཁོར་འབབ་ཚུགས་ཤིག་ལ་དྲག་རྒོལ་བྱས་ནས་འགྲུལ་བ་དང་ངོ་རྒོལ་བ་རྣམས་དབྱེ་བ་མེད་པར་རྒྱག་རྡུང་བྱས་འདུག 

མི་དེ་དག་གིས་མེ་འཁོར་འབབ་ཚུགས་ཀྱི་སྒོ་རྣམས་བཙན་གྱིས་ཕྱེ་སྟེ། འགྲུལ་བ་དང་ངོ་རྒོལ་བ། ཐ་ན་གསར་འགོད་པ་བཅས་ལ་དྲག་རྡུང་བྱེད་སྐབས། ཉེན་རྟོག་པ་གཅིག་ཀྱང་མཐོང་ཡུལ་དུ་མ་མཆིས་པས། མི་ཁ་ཅིག་གིས་ཉི་གདུགས་བཀོལ་ནས་རང་སྲུང་བྱེད་ཐབས་དང་། ཡང་འགའ་ཞིག་གིས་སྲུང་ཞྭ་(Helmet) གཡུགས་ནས་ཕར་འཛིང་བའི་ཐབས་ཤེས་བྱས་ཡོད་འདུག

མཐར་ཉེན་རྟོག་པ་རྣམས་འབྱོར་དུས། ས་གནས་མི་མང་རྣམས་ཁོང་ཁྲོ་དྲག་པོ་ལངས་ནས་ཉེན་རྟོག་པས་རྐང་བཙུགས་ནས་དྲག་རྡུང་དེ་བྱེད་དུ་བཅུག་པ་ཡིན་པའི་ཉེས་འཛུགས་བྱས་འདུག 

མཚན་དཀྱིལ་གྱི་ཆུ་ཚོད་༢.༣༠ ལ་བསླེབས་དུས། ཉུང་མཐར་ཡང་མི་༣༦ ལ་རྨས་སྐྱོན་ཐེབས་ནས་ཉེ་འཁོར་གི་སྨན་ཁང་ཞིག་ཏུ་ཁྱེར་ཡོད་འདུག 

གནས་ཚུལ་དངོས་མཐོང་མཁན་རྣམས་ཀྱིས་བརྗོད་པ་ལྟར་ན། སྟོད་ཐུང་དཀར་པོ་གྱོན་པའི་མི་དེ་དག་གིས་འགྲུལ་བ་རྣམས་ལ་དབྱུག་པ་གཞུས་པ་མ་ཟད། ཧོང་ཀོང་གི་ངོ་རྒོལ་མཚོན་རྟགས་ཏེ་དུག་ལོག་ནག་པོ་གྱོན་པའི་མི་རྣམས་ལ་ཆེད་དུ་དམིགས་ནས་འདེད་ཤར་དང་དྲག་རྡུང་བྱས་འདུག 

གནས་ཚུལ་ལྷགས་ཚར་ནས་ལྷིང་འཇགས་རྗེས། ཉེན་རྟོག་པས་དུག་ལོག་དཀར་པོ་གྱོན་པའི་མི་འགའ་ལ་འདྲི་གཅོད་ཉུང་ངུ་རེ་བྱས་པ་ལས། མི་སུ་གཅིག་ཀྱང་འཛིན་བཟུང་མ་བྱས་པ་དང་། ད་ནངས་ཞོགས་པར་སྤེལ་བའི་གཏམ་བཤད་ནང་། ཁོ་ཚོས་སུ་ཞིག་འཛིན་དགོས་མིན་མ་ཤེས་པའི་སྐོར་བཤད་ཡོད་འདུག ། 

གསར་འགོད་པ་དཀོན་མཆོག་རབ་བརྟན།