ཧོང་ཀོང་ནང་ཉེས་ཅན་རྩིས་སྤྲོད་ཀྱི་ཁྲིམས་འཆར་བགྲོ་གླེང་དུས་འགྱངས་བྱེད་དགོས་འཁེལ་འདུག

རྩོད་རྙོག་ཅན་གྱི་ཧོང་ཀོང་གི་ཉེས་ཅན་རྩིས་སྤྲོད་ཀྱི་ཁྲིམས་འཆར་དེར། ཧོང་ཀོང་མི་མང་གཙོས་རྒྱལ་སྤྱིའི་ཁྱོན་ཡོངས་ནས་སྐྱོན་བརྗོད་དང་ངོ་རྒོལ་ཤུགས་ཆེན་བྱེད་བཞིན་ཡོད་ཀྱང་། རྒྱ་ནག་གཞུང་གིས་ཁྲིམས་འཆར་དེ་གྲོས་ཚོགས་ནང་མུ་མཐུད་ནས་གཏན་འབེབས་ཡོང་ཐབས་བྱེད་བཞིན་ཡོད་པས། ཧོང་ཀོང་མི་མང་གིས་གྲོས་ཚོགས་ཁང་གི་ཉེ་འཁོར་རྒྱ་ལམ་རྣམས་བཀག་འདུག་པས། བགྲོ་གླེང་དུས་འགྱངས་བྱེད་དགོས་འཁེལ་འདུག

ཟླ་༦ པའི་ཚེས་༡༢ ཉིན་གྱི་ཞོགས་པར་ཧོང་ཀོང་གྲོས་ཚོགས་ནང་དུ། ཧོང་ཀོང་ནས་རྒྱ་ནག་ཏུ་ཉེས་ཅན་པ་རྩིས་སྤྲོད་ཀྱི་ཁྲིམས་འཆར་ཐོག་བགྲོ་གླེང་བྱེད་རྒྱུ་ཡིན་ཡང་། ཟླ་༦ པའི་ཚེས་༡༡ དགོང་མོ་ནས་ཁྲིམས་འཆར་དེར་དགག་པ་བྱེད་མཁན་མང་གཙོའི་ལས་འགུལ་བ་མང་པོ་ཞིག་གིས། གྲོས་ཚོགས་དང་གཞུང་གི་ལས་ཁུངས་ཀྱི་ཉེ་འཁོར་དུ་སླེབས་འགོ་བཙུགས་འདུག་པ་དང་། ཉིན་རྗེས་མའི་ཞོགས་པ་ནས་ལས་འགུལ་བ་སྟོང་ཕྲག་མང་པོས་དུག་ལོག་ནག་པོ་གྱོན་ནས། གྲོས་ཚོགས་ཁང་དང་གཞུང་ལས་ཁང་གི་ཉེ་འཁོར་རྒྱ་ལམ་རྣམས་བཀག་ནས་ལས་འགུལ་སྤེལ་ཡོད་འདུག རྒྱ་ལམ་བཀག་ནས་ལས་འགུལ་སྤེལ་བའི་ཐབས་བྱུས་དེ་ནི་ཕྱི་ལོ་༢༠༡༤ ལོའི་ཉིན་གྲངས་༧༩ རིང་གི་ཉི་གདུགས་ཀྱི་མང་གཙོའི་ལས་འགུལ་ཆེན་མོའི་སྐབས་སུ་ཡང་དེ་ལྟར་བྱས་ཡོད་པ་རེད། གྲོས་ཚོགས་འཐུས་མི་མང་པོ་ཞིག་གྲོས་ཚོགས་ཁང་དུ་འཛུལ་ཐུབ་མེད་འདུག་པས། གྲོས་ཚོགས་ལས་ཁང་གིས་ཆུ་ཚོད་༡༡ ལ་འགོ་འཛུགས་བྱེད་རྒྱུ་ཡིན་པའི་གྲོས་ཚོགས་ཚོགས་དུས་དེ་དུས་འགྱངས་བྱས་ཡོད་པ་དང་། གྲོས་ཚོགས་འཐུས་མི་རྣམས་ལ་རྗེས་སུ་ག་དུས་འཚོག་རྒྱུ་ཡིན་པའི་བརྡ་ལན་སྤྲོད་རྒྱུ་ཡིན་པ་གསལ་བསྒྲགས་བྱས་ཡོད་འདུག

དེ་ཡང་ལས་འགུལ་དེའི་ཆེད་དུ་མི་མང་པོ་ཞིག་གིས་ལས་ཀ་ནས་དགོངས་པ་ཞུས་ཡོད་ཁར། ཚོང་ལས་ཁང་མང་པོ་ཞིག་གིས་ངོ་རྒོལ་ལས་འགུལ་ལ་ལས་བྱེད་རྣམས་མཉམ་ཞུགས་བྱེད་ཆེད་དུ་གུང་གསེང་བཏང་ཡོད་འདུག
ཧོང་ཀོང་གྲོས་ཚོགས་ནང་ཁྲིམས་འཆར་དེར་བགྲོ་གླེང་བྱས་ཏེ། ཚེས་༢༠ ཉིན་གྱི་ཕྱི་དྲོའི་ཆུ་ཚོད་༨ པའི་སྔོན་དུ་བགྲོ་གླེང་མཇུག་བསྒྲིལ་པ་བྱས་ཏེ་འོས་ཤོག་འཕེན་ཟིན་པ་དགོས་སྐོར་གྲོས་ཚོགས་ཀྱིས་ཚོགས་གཙོས་བརྗོད་འདུག
དེ་ཡང་ཟླ་༦ པའི་ཚེས་༩ ཉིན་མི་མང་ས་ཡ་གཅིག་ལས་མང་བས། ཉེས་ཅན་རྩིས་སྤྲོད་ཀྱི་ཁྲིམས་འཆར་ལ་ངོ་རྒོལ་གྱི་ལས་འགུལ་ནང་མཉམ་ཞུགས་བྱས་ཏེ། ཕྱི་ལོ་༡༩༩༧ ལོ་ནས་ད་བར་ལས་འགུལ་བ་མཉམ་ཞུགས་བྱེད་མཁན་གྱི་ཁ་གྲངས་མང་ཤོས་དེ་ཆགས་ཡོད་ཁར། ཚེས་༦ ཉིན་ཧོང་ཀོང་གི་ཁྲིམས་རྩོད་པ་༣༠༠༠ ལས་མང་བས་ཁྲིམས་འཆར་དེ་ཕྱིར་འཐེན་དགོས་པའི་ངོ་རྒོལ་ལས་འགུལ་སྤེལ་ཡོད་པ་རེད་དེ། ཧོང་ཀོང་སྤྱི་ཁྱབ་པས་ཁྲིམས་འཆར་དེ་མུ་མཐུད་ནས་གྲོས་ཚོགས་ནང་བགྲོ་གླེང་དགོས་པ་ནན་བརྗོད་བྱས་ཡོད་ཁར། མོ་ལ་རྒྱ་ནག་གཞུང་གི་གནོན་ཤུགས་ཆེན་པོ་སྤྲོད་ཀྱི་ཡོད་པའི་སྐད་ཆ་དེ་ནི་བདེན་པ་མིན་སྐོར་བརྗོད་ཡོད་པ་རེད།

ཧོང་ཀོང་གཞུང་གིས་ཟླ་༣ པའི་ནང་ཧོང་ཀོང་ནས་རྒྱ་ནག་དང་ཐའེ་ཝན་སོགས་ལ་ཉེས་ཅན་པ་རྩིས་སྤྲོད་ཀྱི་ལས་གཞི་བཀག་འགོག་གི་ཁྲིམས་དེ་བསྐྱར་བཅོས་བྱས་ཏེ། རྩིས་སྤྲོད་བྱེད་ཆོག་པའི་ཁྲིམས་འཆར་ཞིག་གྲོས་ཚོགས་ནང་བཏོན་ཡོད་པ་དང་། གཞུང་གིས་ཁྲིམས་འཆར་དེའི་ནང་འགྲོ་བ་མིའི་ཐོབ་ཐང་སྲུང་སྐྱོབ་ཐུབ་པའི་ཆ་རྐྱེན་ཡོད་སྐོར་བསྒྲགས་བཞིན་འདུག་ཀྱང་། ཁྲིམས་རྩོད་པ་དང་ལས་འགུལ་བ། ཚོང་པ་སོགས་སྡེ་ཚན་མང་པོ་ཞིག་གིས། ཁྲིམས་འཆར་དེའི་ནང་འགྲོ་བ་མིའི་ཐོབ་ཐང་སྲུང་སྐྱོབ་དང་ཁྲིམས་གཏུག་དྲང་བདེན་ཡོང་བའི་ངེས་གཏན་གང་ཡང་མེད་ཁར། གལ་ཏེ་རྒྱ་ནག་གཞུང་གིས་ཉེས་ཅན་པ་ངོས་འཛིན་བྱས་པའི་མི་ཞིག་ཧོང་ཀོང་ནས་རྒྱ་ནག་ལ་རྩིས་སྤྲོད་བྱས་ཚེ། རྒྱ་ནག་ནང་གི་ཁྲིམས་ལུགས་དབང་བསྒྱུར་གྱི་ཚད་གཞི་ཤིན་ཏུ་དམའ་པོ་ཡིན་ཁར། ཁྲིམས་གཏུག་དྲང་བདེན་ཡོང་རྒྱུ་ཤིན་ཏུ་ཁག་པོ་ཡིན་རྐྱེན། ཁྲིམས་འཆར་དེ་ནི་ཧོང་ཀོང་ནང་མང་གཙོ་དང་རང་བཙན་གྱི་ལས་འགུལ་བ། རྩོམ་པ་པོ། ཁྲིམས་རྩོད་པ། གསར་འགོད་པ་སོགས་ལ་གནོན་ཤུགས་དང་སྡིགས་བསྐུལ་བྱས་ཏེ། ཧོང་ཀོང་ནང་གི་མང་གཙོའི་རང་དབང་མེད་པ་བཟོ་ཆེད་ཡིན་པའི་སྐྱོན་བརྗོད་ཤུགས་ཆེ་བྱེད་བཞིན་ཡོད་པ་རེད། གལ་ཏེ་ཁྲིམས་འཆར་དེ་གྲོས་ཚོགས་ནང་གཏན་འབེབས་བྱུང་ཚེ། ཧོང་ཀོང་གཞུང་དང་ཁྲིམས་ཁང་གིས་གྲོས་ཚོགས་ཀྱི་ཐེ་བྱུས་མེད་པར། རྒྱ་ནག་གཞུང་གིས་ཉེས་ཅན་རྩིས་སྤྲོད་ཀྱི་འབོད་སྐུལ་ལ་ལས་དོན་བྱེད་ཆོག་གི་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།