ཧོང་ཀོང་ནང་མང་གཙོར་ཕྱོགས་པའི་གསར་ཁང་ཞིག་གི་འབྲེལ་ཡོད་མང་པོ་འཛིན་བཟུང་བྱས་འདུག 

ཧོང་ཀོང་ནང་དུ་རྒྱ་ནག་གཞུང་གིས་མང་གཙོ་དང་རང་དབང་སོགས་འཆར་གཞི་ལྡན་པའི་ཐོག་ནས་མེད་པ་བཟོ་བཞིན་པའི་སྐབས་དེར། གྲོང་ཁྱེར་དེའི་ནང་གི་མང་གཙོར་རྒྱབ་སྐྱོར་བྱེད་མཁན་གྱི་གསར་ཁང་མཐའ་མའི་གྲས་སུ་ཡོད་པ་ཞིག་གི་ལས་ཁང་དུ་གློ་བུར་བསྔོགས་བཤེར་དང་འབྲེལ་ཡོད་མི་སྣ་མང་པོ་ཞིག་འཛིན་བཟུང་བྱས་འདུག 

ཟླ་༡༢ པའི་ཚེས་༢༩ ཉིན་ཧོང་ཀོང་གི་རྒྱལ་ཁབ་ཀྱི་བདེ་འཇགས་ཉེན་རྟོག་པས་གྲོང་ཁྱེར་དེའི་ནང་གི་དྲ་ཐོག་གསར་འགྱུར་བརྒྱུད་ལམ་(Stand News) ཞེས་པ་དེའི་མཐོ་རིམ་ལས་བྱེད་ད་ཡོད་དང་ཟུར་པ་སོགས་མི་སྣ་༦ འཛིན་བཟུང་དང་། གསར་ཁང་དེའི་ལས་ཁང་དུ་ཉེན་རྟོག་པ་༢༠༠ ཡིས་གསར་ཁང་དེའི་ལས་ཁང་དུ་སླེབས་ནས་བསྔོགས་བཤེར་དང་གསར་འགོད་ལས་རིགས་དང་འབྲེལ་བའི་ཡིག་ཆ་མང་པོ་ཞིག་འཕྲོག་ཡོད་འདུག 

ཧོང་ཀོང་གཞུང་གི་བསྒྲགས་གཏམ་ཞིག་ནང་དུ། དྲ་ཐོག་གསར་འགྱུར་བརྒྱུད་ལམ་ཞིག་གི་མཐོ་རིམ་ལས་བྱེད་ད་ཡོད་དང་ཟུར་པ་༦ འཛིན་བཟུང་བྱས་ཡོད་པ་དང་། རྒྱུ་མཚན་ནི་ཁོ་ཚོས་གཞུང་སྲིད་མགོ་རྟིང་སློག་པའི་གནས་ཚུལ་ཁྱབ་སྤེལ་བྱེད་རྒྱུའི་ངན་བྱུས་བཤམས་པ་དང་འབྲེལ་བ་ཡོད་སྐོར་དང་། འཛིན་བཟུང་བྱས་པའི་ཁོངས་སུ་བུད་མེད་གསུམ་དང་སྐྱེས་པ་གསུམ། ལོ་ན་༣༤ ནས་༧༣ བར་ཡིན་པ། ཁོ་ཚོའི་ཁྱིམ་དུ་ཡང་བསྔོགས་བཤེར་བྱེད་བཞིན་ཡོད་སྐོར་བརྗོད་འདུག བསྒྲགས་གཏམ་དེའི་ནང་གསར་ཁང་དང་འཛིན་བཟུང་བྱས་པའི་མི་སྣ་དག་མིང་འདོན་བྱས་མེད་པ་རེད། 

ཧོང་ཀོང་གསར་འགོད་མཐུན་ཚོགས་ཀྱིས་བསྒྲགས་གཏམ་ཞིག་སྤེལ་ནས། ལོ་གཅིག་ནང་ཧོང་ཀོང་ནང་གི་གསར་ཁང་ཁག་གི་མཐོ་རིམ་ལས་བྱེད་རྣམས་ཉེན་རྟོག་པས་ཡང་ནས་བསྐྱར་དུ་འཛིན་བཟུང་དང་། ལས་ཁང་བསྔོགས་བཤེར་ཡང་བྱས་ཡོད་པས་སེམས་འཚབ་ཆེན་པོ་བྱེད་བཞིན་ཡོད་པས། ཧོང་ཀོང་གཞུང་གིས་ཧོང་ཀོང་གི་གཞི་རྩའི་ཁྲིམས་ལྟར་གསར་འགོད་རང་དབང་སྲུང་སྐྱོབ་བྱེད་པའི་རེ་སྐུལ་བྱེད་ཀྱི་ཡོད་སྐོར་བརྗོད་འདུག 

འཛིན་བཟུང་བྱས་པའི་ཁོངས་སུ་གསར་ཁང་དེའི་རྩོམ་སྒྲིག་པ་གཞོན་པ་ཞིག་དང་། གསར་ཁང་དེའི་འགན་འཛིན་ལྷན་ཚོགས་ཀྱི་ཚོགས་མི་ཟུར་པ་དང་མང་གཙོ་དོན་གཉེར་བ་གཞས་པ་གྲགས་ཅན་ལྕམ་ཌེ་ནིསེ་ཧཱོ་ཡང་ཡོད་པ་རེད། 

རྒྱ་ནག་གཞུང་གིས་ཧོང་ཀོང་ནང་དུ་རྒྱལ་ཁབ་ཀྱི་བདེ་འཇགས་ཁྲིམས་ཞེས་པ་བཙན་དབང་ཐོག་ནས་ལག་བསྟར་བྱས་པ་ནས་བཟུང་། གྲོང་ཁྱེར་དེའི་ནང་གི་མང་གཙོའི་ལས་འགུལ་བ་དང་གསར་འགོད་པ་སོགས་མང་པོ་ཞིག་ཁྲིམས་དེའི་འོག་ནས་འཛིན་བཟུང་བྱས་ཡོད་ཁར། མང་པོ་ཞིག་ཕྱིའི་རྒྱལ་ཁབ་ཁག་ཏུ་བྲོས་བྱོལ་འགྲོ་དགོས་བྱུང་ཡོད་པ་རེད། 

ཟླ་༦ པའི་ནང་ཧོང་ཀོང་ནང་མང་གཙོར་ཕྱོགས་པའི་གསར་ཁང་གྲགས་ཆེ་ཤོས་ཀུ་ཤུ་ཉིན་རེའི་གསར་ཁང་ལ། རྒྱ་ནག་དང་ཧོང་ཀོང་གཞུང་གཉིས་ཀྱིས་གནོན་ཤུགས་འདྲ་མིན་སྤྲད་ནས། མཐའ་མ་དེར་གསར་ཁང་དེ་སྒོ་རྒྱག་དགོས་པ་ཁེལ་ཡོད་པ་དང་། དེའི་བདག་པོ་ཕྱུག་བདག་དང་མང་གཙོ་དོན་གཉེར་བ་ཇཱི་མཱི་ལའེ་ལ་ཡང་ཉེས་འཛུགས་འདྲ་མིན་འོག་བཙོན་འཇུག་བྱས་ཡོད་པ་རེད། 

རྒྱ་ནག་གཞུང་གིས་རྒྱལ་ཁབ་ཀྱི་བདེ་འཇགས་ཁྲིམས་དེས་ཁ་བྲལ་རིང་ལུགས་པ་དང་། འཇིགས་སྐུལ་རིང་ལུགས་པ། ཕྱིའི་རྒྱལ་ཁབ་ཀྱི་ཤུགས་རྐྱེན། གཞུང་སྲིད་མགོ་རྟིང་སློག་པ་སོགས་འཐབ་རྒོལ་བྱེད་རྒྱུ་ཡིན་པ་དང་། དེ་ལ་བརྟེན་ནས་ཧོང་ཀོང་ནང་དུ་བརྟན་ལྷིང་ཕྱིར་ལོག་ཡོང་རྒྱུ་ཡིན་པ་དང་། ཆབ་སྲིད་ཀྱི་རང་དབང་བརྟན་པོ་གནས་རྒྱུ་ཡིན་པ། ཧོང་ཀོང་གྲོས་ཚོགས་ཀྱིས་འདས་པའི་ལོ་ཟླའི་ནང་རྒྱལ་ཁབ་ཀྱི་བདེ་འཇགས་ཁྲིམས་གཏན་འབེབས་བྱེད་ཐུབ་མེད་སྐོར་བརྗོད་ཡོད་ཀྱང་། རྒྱ་ནག་གཞུང་གི་བྱེད་ལས་དེར་དགག་བྱ་བྱེད་མཁན་ཚོས། རྒྱ་ནག་སྐམ་ས་ཆེན་མོར་ཁྲིམས་དེ་བེད་སྤྱད་ནས་ཆབ་སྲིད་ཀྱི་ལྟ་ཕྱོགས་མི་མཐུན་པ་འཛིན་མཁན། འགྲོ་བ་མིའི་ཐོབ་ཐང་གི་ལས་འགུལ་བ་དང་ཁྲིམས་རྩོད་པ་སོགས་གཉའ་གནོན་དང་བཙོན་འཇུག་བྱེད་ཀྱི་ཡོད་པས། ཧོང་ཀོང་ནང་དུ་ཡང་དེ་ལྟར་འབྱུང་རྒྱུའི་སེམས་འཚབ་བྱས་ཡོད་པ་ལྟར། ཧོང་ཀོང་ནང་དུ་ཡང་མང་གཙོ་མིང་ཙམ་མ་གཏོགས་མེད་པ་ཆགས་བཞིན་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།