ཧོང་ཀོང་ནང་ཡུ་གུར་བར་གདུང་སེམས་མཉམ་བསྐྱེད་ལས་འགུལ་སྤེལ་འདུག

མང་གཙོའི་ལས་འགུལ་འགོ་བཙུགས་ནས་ཟླ་བ་༧ པ་འགྲོ་བཞིན་པའི་ཧོང་ཀོང་ནང་དུ། རྒྱ་ནག་གཞུང་གི་དྲག་གནོན་འོག་ཏུ་གང་བྱུང་བཀག་ཉར་དང་བཙོན་འཇུག་མྱོང་བཞིན་པའི་ཡུ་གུར་བ་རྣམས་ལ། གདུང་སེམས་མཉམ་བསྐྱེད་ཀྱི་ལས་འགུལ་ཞིག་སྤེལ་འདུག་པ་དང་། སྐབས་དེར་བོད་ཀྱི་རྒྱལ་དར་འཕྱར་མཁན་ལས་འགུལ་བ་ཡང་ཡོད་འདུག

ཟླ་༡༢ པའི་ཚེས་༢༢ ཉིན་ཧོང་ཀོང་ནང་དུ་ཉེན་རྟོག་པའི་ཆོག་མཆན་ཡོད་པའི་ཐོག་ནས། རྒྱ་ནག་གི་བཙན་འཛུལ་འོག་ཡོད་པའི་ཤར་ཏུར་ཀི་སི་ཐན་གྱི་ཡུ་གུར་བ་རྣམས་ལ་གདུང་སེམས་མཉམ་བསྐྱེད་ཀྱི་ལས་འགུལ་ཞིག་སྤེལ་འདུག་པ་དང་། དེ་ཡང་ཧོང་ཀོང་ནང་ཡུ་གུར་བ་རྣམས་ལ་དམིགས་ནས་སྤེལ་བའི་ལས་འགུལ་ཐོག་མ་དེ་ཡིན་ཚུལ་འདུག ལས་འགུལ་སྐབས་སུ་ལས་འགུལ་བ་མང་པོ་ཞིག་གིས་ཤར་ཏུར་ཀི་སི་ཐན་གྱི་རྒྱལ་དར་འཕྱར་བ་དང་། རྒྱལ་དར་གྱི་གདོང་སྦག་གྱོན་པ་སོགས་བྱས་འདུག ལས་འགུལ་དེའི་སྐབས་སུ་བོད་དང་ཐའེ་ཝན་གྱི་རྒྱལ་དར་འཕྱར་མཁན་ཡང་བྱུང་འདུག

ལས་འགུལ་དེ་ཕྱོགས་ཡོང་ནས་ཞི་བའི་ངང་སྤེལ་འདུག་ཀྱང་། ཕྱི་དྲོའི་ཆུ་ཚོད་༥ པ་ཙམ་ལ་ལས་འགུལ་བ་ཞིག་གིས། ལས་འགུལ་ས་ཚིགས་ཀྱི་ཉེ་འགྲམ་དུ་ཡོད་པའི་གཞུང་ལས་ཁང་ཞིག་མདུན་དུ་འཕྱར་ཡོད་པའི་རྒྱ་ནག་གི་རྒྱལ་དར་མར་ཕབ་ནས་ལས་འགུལ་བ་ཁག་ཅིག་དང་མཉམ་དུ་རྒྱལ་དར་དེ་མེར་བསྲེགས་ཐབས་བྱས་སྐབས། ཉེན་རྟོག་པས་ལས་འགུལ་བ་རྣམས་ལ་རྡུང་རྡེག་དང་འཛིན་བཟུང་བྱས་པ་དང་། མེ་མདའ་བསྟན་འདུག་ཀྱང་བརྒྱབ་མི་འདུག སྐབས་དེར་ལས་འགུལ་བ་མང་པོ་ཞིག་གིས་ཉེན་རྟོག་པར་ཆུའི་འགྱིག་དམ་སོགས་འཕངས་འདུག

ལས་འགུལ་གོ་སྒྲིག་པ་ཚོས་སྡིངས་ཆའི་ཐོག་ཏུ། དེ་རིང་གི་ཤིན་ཅང་། སང་ཉིན་གྱི་ཧོང་ཀོང་། ཨིལ་ཧམ་ཀྲོ་ཀྲི་གློད་གྲོལ་དགོས་ཞེས་པའི་འཕྲེད་དར་བཏགས་འདུག ཨིལ་ཧམ་ཀྲོ་ཀྲི་ནི་ཡུ་གུར་གྱི་ཤེས་ཡོན་པ་དང་འགྲོ་བ་མིའི་ཐོབ་ཐང་རྩོད་ལེན་པ་ཞིག་ཡིན་པ་དང་། ཕྱི་ལོ་༢༠༡༤ ལོར་ཁ་བྲལ་རིང་ལུགས་པའི་ཉེས་མིང་འོག ཚེ་བཙོན་ཁྲིམས་ཐག་བཅད་ཡོད་པ་རེད། ལས་འགུལ་བ་ཁག་ཅིག་གིས་རྒྱ་ནག་དམར་ཤོག་ཚོགས་པ་མེད་པ་བཟོ་དགོས་པ་དང་། ཧོང་ཀོང་རང་བཙན་དགོས་པའི་འབོད་ཚིག་ཀྱང་བསྒྲགས་འདུག

ཧོང་ཀོང་གི་ངལ་རྩོལ་བའི་ཐོབ་ཐང་རྩོད་ལེན་པ་རྒན་གྲས་ལཱི་ཡིས། རྒྱ་ནག་གཞུང་གིས་ཡུ་གུར་བའི་ཐོག་གི་དྲག་གནོན་དེ་ནི་དམར་ཤོག་ཚོགས་པའི་ངན་སྤྱོད་ཚབས་ཆེ་ཤོས་ཀྱི་དཔེ་མཚོན་ཞིག་ཡིན་པ་དང་། ཡུ་གུར་ས་གནས་སུ་རྒྱ་ནག་གཞུང་གིས་དམ་དྲག་སྟངས་འཛིན་དང་ཆོས་ལུགས་རང་དབང་ལ་དྲག་གནོན་བྱེད་ཀྱི་ཡོད་སྐོར་གཏམ་བཤད་སྤེལ་འདུག དེ་བཞིན་ཧོང་ཀོང་རང་བཙན་འཐབ་རྩོད་པ་ཨེན་ཌི་ཆེན་གྱིས་ཡུ་གུར་གྱི་གནས་བབ་ལས། རྒྱ་ནག་གཞུང་གི་དབང་སྒྱུར་འོག་ཏུ་རང་སྐྱོང་ཞེས་པ་དེ་ནི་གཡོ་ཐབས་ཤིག་ཡིན་པ་ར་སྤྲོད་བྱས་ཡོད་པ་དང་། རྒྱ་ནག་གཞུང་གིས་ཡུ་གུར་བ་རྣམས་ལ་སོ་སོའི་ཆོས་ལུགས་དང་རིག་གཞུང་སྲུང་སྐྱོབ་བྱེད་དུ་འཇུག་རྒྱུའི་ཁས་ལེན་རྩིས་མེད་རྡོག་རོལ་བཏང་ཡོད་སྐོར་གཏམ་བཤད་སྤེལ་རྗེས། ལས་འགུལ་བ་རྣམས་དང་མཉམ་དུ་ཧོང་ཀོང་རང་བཙན་ལ་རྒྱབ་སྐྱོར་གྱི་འབོད་ཚིག་བསྒྲགས་པའི་སྣེ་ཁྲིད་བྱས་འདུག

ལས་འགུལ་བའི་ཁྲོད་དུ་རྒྱ་ནག་གཞུང་གིས་ཡུ་གུར་ནང་དུ་གང་བྱེད་འདོད་པ་བྱེད་ཀྱི་ཡོད་པ་དང་། རྗེས་སུ་ཧོང་ཀོང་ནང་དུ་ཡང་དེ་ལྟར་བྱེད་རྒྱུ་ཡིན་པའི་སེམས་འཚབ་སྟོན་མཁན་མང་པོ་ཡོད་འདུག

རྒྱལ་སྤྱིའི་ནང་རྒྱ་ནག་གཞུང་གིས་ཡུ་གུར་ས་གནས་སུ་ཡུ་གུར་ཁ་ཆེ་མི་རིགས་གཙོས་པའི་ཁ་ཆེ་མི་རིགས་ས་ཡ་གཅིག་ལས་མང་བ་གང་བྱུང་འཛིན་བཟུང་བཀག་ཉར་བྱས་ཏེ། ཆབ་སྲིད་བཅོས་སྒྱུར་གཞིས་སྒར་ཁག་ཏུ་བཙོན་འཇུག་བྱེད་ཀྱི་ཡོད་པའི་གནས་ཚུལ་ཆེན་པོ་ཁྱབ་ཡོད་ཁར། འཛིན་བཟུང་འོག་ཡོད་པའི་ཕ་མ་རྣམས་ཀྱི་ཕྲུ་གུ་རྣམས་ཀྱང་ཆེད་དུ་བཙུགས་པའི་གཏན་འཇགས་སློབ་གྲྭ་ཁག་ཏུ་བཅུག་ནས། བསམ་བློ་བཅོས་སྒྱུར་གྱི་ལས་གཞི་སྤེལ་བཞིན་ཡོད་པའི་གནས་ཚུལ་ཡང་ཕྱིར་ཐོན་ཡོད་པ་རེད་དེ། རྒྱ་ནག་གཞུང་གིས་བཀག་ཉར་ཁང་དེ་དག་ནི་ལག་ཤེས་སྦྱོང་བརྡར་ཁང་ཡིན་པ་དང་དེའི་དགོས་པ་ནི་འཇིགས་སྐུལ་རིང་ལུགས་པར་འཐབ་རྒོལ་ཆེད་ཡིན་སྐོར་བརྗོད་བཞིན་ཡོད་པ་ལས། འགྲོ་བ་མིའི་ཐོབ་ཐང་རྡོལ་རོལ་དང་ཆོས་ལུགས་རང་དབང་རྩིས་མེད་སོགས་ཀྱི་ཉེས་འཛུགས་ལ་ཁས་ལེན་བྱེད་ཀྱི་མེད་པ་རེད།།

གསར་འགོད་པ་སྐལ་བཟང་དོན་གྲུབ།