ཧོང་ཀོང་མི་མང་ནོ་བྷེལ་ཞི་བདེའི་གཟེངས་རྟགས་འོས་གཞིར་མིང་འདོན་བྱས་འདུག 

ནོར་ཝེ་རྒྱལ་ཁབ་ཀྱི་གྲོས་ཚོགས་འཐུས་མི་ཞིག་གིས། ཕྱི་ལོ་༢༠༢༠ ལོའི་ནོ་བྷེལ་ཞི་བདེའི་གཟེངས་རྟགས་ཀྱི་འོས་གཞིར་ཧོང་ཀོང་མི་མང་མིང་འདོན་བྱས་ཡོད་པ་དང་། རྒྱ་ནག་གཞུང་གིས་བྱེད་ལས་དེ་ནི་རྒྱ་ནག་གི་ནང་སྲིད་ལ་ཐེ་བྱུས་བྱས་པ་ཡིན་པས། དེ་འདྲ་བྱེད་པའི་ཐོབ་ཐང་མེད་པའི་སྐྱོན་བརྗོད་བྱས་འདུག 

དེ་ཡང་ཟླ་༡༠ པའི་ཚེས་༡༥ ཉིན་ནོར་ཝེ་རྒྱལ་ཁབ་ཀྱི་གུ་ཡངས་སྲིད་དོན་ཚོགས་པའི་གྲོས་ཚོགས་འཐུས་མི་ལྕམ་གྷུ་རི་མེལ་བྷེ་(Guri Melby)ཡིས་སྤྱི་ཚོགས་དྲ་ལམ་ཊེའུ་ཊར་ཐོག་ཏུ། ངས་ཕྱི་ལོ་༢༠༢༠ ལོའི་ནོ་བྷེལ་ཞི་བདེ་གཟེངས་རྟགས་ཀྱི་འོས་གཞིའི་ཁོངས་སུ། ཉིན་ལྟར་སོ་སོའི་ཚེ་སྲོག་དང་བདེ་འཇགས་ལ་ཉེན་ཁ་ཡོད་མེད་ལ་མ་ལྟོས་པར། སྨྲ་བརྗོད་རང་དབང་དང་མང་གཙོའི་ཆེད་དུ་འཐབ་རྩོད་བྱེད་མཁན་ཧོང་ཀོང་མི་མང་མིང་འདོན་བྱས་ཡོད་ཅེས་བཀོད་ཡོད་པ་དང་། ཟླ་༡༠ པའི་ཚེས་༡༧ ཉིན་རྒྱ་ནག་དམར་ཤོག་གཞུང་གི་ཕྱི་སྲིད་ལས་ཁུངས་མགྲིན་ཚབ་པས། གནད་དོན་དེའི་ཐོག་གསར་འགོད་པའི་དྲི་བའི་ལན་དུ། ཧོང་ཀོང་གི་གནད་དོན་ནི་རྒྱ་ནག་གི་ནང་སྲིད་གནད་དོན་ཡིན་པས། ཕྱིའི་རྒྱལ་ཁབ་ཁག་གི་གཞུང་ངམ་ཚོགས་པ། སྒེར་པ་སོགས་ཀྱིས་ཐེ་བྱུས་བྱེད་ཆོག་གི་མེད། འབྲེལ་ཡོད་མི་སྣ་དེར་དྲང་བདེན་ལ་གཞིར་བཞག་གིས་སྐད་ཆ་གང་བཤད་དང་ལས་ཀ་གང་བྱེད་ལ་གཟབ་ནན་བྱེད་པའི་རེ་སྐུལ་བྱེད་ཀྱི་ཡོད་པ་དང་། རྒྱ་ནག་གི་ནང་སྲིད་གནད་དོན་དང་ཧོང་ཀོང་གི་གནད་དོན་ལ་ཐེ་བྱུས་བྱེད་རྒྱུ་མཚམས་འཇོག་ཡོང་བའི་རེ་སྐུལ་བྱེད་ཀྱི་ཡོད་ཅེས་ལན་འདེབས་བྱས་འདུག 

གྲོས་ཚོགས་འཐུས་མི་དེས་གསར་འགྱུར་བརྒྱུད་ལམ་ཞིག་གི་བཅར་འདྲིར། ཧོང་ཀོང་མི་མང་གིས་ག་རེ་བྱེད་བཞིན་པ་དེས་ཧོང་ཀོང་ཙམ་མིན་པར། དེ་ལས་བརྒལ་ནས་དེའི་མངའ་ཁུལ་དང་འཛམ་གླིང་གི་ས་ཕྱོགས་གཞན་དུ་ཡང་ཤུགས་རྐྱེན་ཆེན་པོ་ཡོད་སྐོར་བརྗོད་འདུག དེ་བཞིན་ཁོང་ཉེ་ཆར་ཁོང་ཧོང་ཀོང་ལ་ཕྱིན་པ་དང་སྐབས་དེར་ཉེན་རྟོག་པས་མི་མང་ལས་འགུལ་བ་ཚོའི་དྲག་སྤྱོད་བྱས་པའི་གནས་ཚུལ་རྣམས་གོ་དུས་ཧང་སངས་བ་དང་འཇིགས་སྣང་སྐྱེས་ཡོད་ཀྱང་། ཧོང་ཀོང་མི་མང་ལས་འགུལ་བ་ཚོའི་སྙིང་སྟོབས་ལ་ཡིད་སྨོན་སྐྱེས་ཡོད་པས། ཕྱིར་རང་ཡུལ་དུ་འབྱོར་རྗེས་ཧོང་ཀོང་མི་མང་རྣམས་ཕྱི་ལོ་༢༠༢༠ ལོའི་ནོ་བྷེལ་ཞི་བདེའི་གཟེངས་རྟགས་ཀྱི་འོས་གཞིར་མིང་འདོན་བྱས་པ་ཡིན། དེས་ཁོ་ཚོའི་རང་དབང་དང་མང་གཙོའི་འཐབ་རྩོད་ལ་སེམས་ཤུགས་སྐྱེས་པའི་རེ་བ་བྱེད་ཀྱི་ཡོད་སྐོར་བརྗོད་འདུག 

ནོར་ཝེ་རྒྱལ་ཁབ་ཏུ་ཡོད་པའི་ནོ་བྷེལ་ཞི་བདེ་གཟེངས་རྟགས་ཚོགས་ཆུང་ནི་གྲོས་ཚོགས་ཀྱིས་བསྐོ་གཞག་བྱས་པའི་ཚོགས་མི་ལྔ་ལས་གྲུབ་པའི་རང་དབང་ཅན་གྱི་ཚོགས་ཆུང་ཞིག་ཡིན་པ་དང་།  ཕྱི་ལོ་༢༠༡༠ ལོར་ནོ་བྷེལ་ཞི་བདེ་གཟེངས་རྟགས་དེ་སྐབས་དེར་རྒྱ་ནག་གཞུང་གི་བཙོན་དུ་ཡོད་པའི་རྩོམ་པ་པོ་དང་མང་གཙོ་འཐབ་རྩོད་པ་ལེའུ་ཞའོ་པོ་ལ་སྤྲད་པས། རྒྱ་ནག་གཞུང་གིས་ནོར་ཝེ་གཞུང་དང་འབྲེལ་ལམ་བཅད་ནས་ཚོང་འབྲེལ་གྱི་གྲོས་མོལ་ཕྱིར་འཐེན། ནོར་ཝེ་ནས་ནང་འདྲེན་བྱེད་བཞིན་པའི་ཅ་དངོས་ཤིག་བཀག་འགོག་སོགས་བྱས་ཡོད་འདུག ཕྱི་ལོ་༢༠༡༦ ལོར་ནོར་ཝེ་གཞུང་གིས་རྒྱ་ནག་གཅིག་གྱུར་གྱི་སྲིད་བྱུས་ལ་རྒྱབ་སྐྱོར་དང་རྒྱ་ནག་གི་ཁེ་དབང་ལ་གནོད་པའི་ལས་དོན་ལ་རྒྱབ་སྐྱོར་བྱེད་རྒྱུ་མིན་སྐོར་ཁས་ལེན་དང་བསྒྲགས་གཏམ་སྤེལ་ནས། ཕྱོགས་གཉིས་བར་གྱི་འབྲེལ་ལམ་ཡག་ཏུ་ཕྱིན་ཡོད་འདུག་ཀྱང་། མི་མང་པོ་ཞིག་གིས་རྒྱལ་ཁབ་དེའི་འགྲོ་བ་མིའི་ཐོབ་ཐང་ལ་རྒྱབ་སྐྱོར་གྱི་ཚད་གཞི་དམའ་རུ་འགྲོ་རྒྱུ་ཡིན་པའི་སེམས་འཚབ་བྱེད་ཀྱི་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།