ཧྥ་རན་སིའི་གྲོས་ཚོགས་འཐུས་མིའི་སྐུ་ཚབ་རྣམས་ཐའེ་ཝན་ལ་ཕེབས་གཏན་འཁེལ་འདུག 

རྒྱ་ནག་དང་འཛམ་གླིང་གི་འགལ་བ་ཇེ་ཆེ་དང་། ཐའེ་ཝན་ལ་རྒྱབ་སྐྱོར་ཤུགས་ཆེ་རུ་འགྲོ་བཞིན་པའི་སྐབས་འདིར། ཧྥ་རན་སིའི་གྲོས་ཚོགས་འཐུས་མིའི་སྐུ་ཚབ་རྣམས་རྒྱ་ནག་གི་གནོན་ཤུགས་དང་ངོ་རྒོལ་བྱས་མིན་ལ་མ་ལྟོས་པར་ཟླ་རྗེས་མའི་འགོ་སྟོད་དུ་ཐའེ་ཝན་ལ་གཟིགས་སྐོར་དུ་ཕེབས་གཏན་འཁེལ་ཡོད་འདུག 

བརྒྱུད་ལམ་ཁག་ནས་སྤེལ་བའི་གནས་ཚུལ་ལྟར་ན། ཧྥ་རན་སིའི་གྲོས་ཚོགས་འཐུས་མི་འགའ་ཕྱི་ཟླ་༡༠ པའི་ཚེས་༤ ནས་ཚེས་༡༡ བར་ཐའེ་ཝན་ལ་གཟིགས་སྐོར་དུ་ཕེབས་གཏན་འཁེལ་ཡོད་འདུག་ཅིང་། ཐེངས་འདིའི་གཟིགས་སྐོར་གྱི་འགོ་ཁྲིད་མཁན་དེ་ཐའེ་ཝན་མཛའ་འབྲེལ་ཚོགས་པའི་(Taiwan Friendship Group) ཚོགས་གཙོ་ཨ་ལན-རི་ཆར་ཌི་(Alain Richard) ཆགས་ཡོད་འདུག 

ད་ལོའི་ཕྱི་ཟླ་༣ པའི་ནང་ཐའེ་ཐན་མཛའ་འབྲེལ་ཚོགས་པས་ཐའེ་ཝན་ལ་གཟིགས་སྐོར་དུ་འགྲོ་བའི་འཆར་གཞི་དེ་ཐོག་མར་ཕྱིར་བསྒྲགས་བྱེད་སྐབས། ཧྥ་རན་སིར་ཡོད་པའི་རྒྱ་ནག་གི་གཞུང་ཚབ་ཁང་ནས་“རྒྱ་ནག་གིས་གཟིགས་སྐོར་དེ་ལ་ངོ་རྒོལ་ཤུགས་ཆེན་བྱེད་ཀྱི་ཡོད་”ཅེས་བཤད་དེ་གཟིགས་དེའི་སྐོར་རྩིས་མེད་གཏོང་དགོས་པའི་དགོས་འདུན་བཏོན་པར་བརྟེན། ཧྥ་རན་སིའི་ཆབ་སྲིད་མི་སྣ་དང་། ཤེས་ཡོན་པ་ཚོའི་ཁྲོད་དུ་རྒྱ་ནག་གི་བྱེད་སྟངས་དེར་གླེང་སློང་དང་མི་འདོད་པ་ཤུགས་ཆེན་བྱུང་ཡོད། 

སྐབས་དེར་ཧྥ་རན་སིའི་འབྲེལ་ཡོད་གྲོས་ཚོགས་འཐུས་མི་ཚོས་གཟིགས་སྐོར་གྱི་འཆར་གཞི་ལ་འགྱུར་བ་གཏོང་རྒྱུ་མིན་ཚུལ་བཤད་པ་མ་ཟད། ཧྥ་རན་སིའི་ཕྱི་སྲིད་ལས་ཁུངས་ནས་ཀྱང་“ཧྥ་རན་སིའི་གྲོས་ཚོགས་འཐུས་མི་རྣམས་ལ་གཟིགས་སྐོར་གང་དུ་འགྲོ་བ་དང་། འབྲེལ་བ་སུ་ལ་འཛིན་མིན་གྱི་ཐག་གཅོད་བྱེད་པའི་རང་དབང་ཡོད་”ཅེས་བཤད་དེ་གྲོས་ཚོགས་འཐུས་མི་ཚོར་རྒྱབ་སྐྱོར་བྱས་ཡོད། 

དེ་མིན་ད་དུང་། སྐབས་དེར་ཐའེ་ཝན་མཛའ་འབྲེལ་ཚོགས་པའི་ཚོགས་གཙོ་ཨ་ལན-རི་ཆར་ཌི་ཡིས་“ང་ཚོ་གཉིས་ཀྱི་བར་དུ་འགྲོ་བ་མིའི་རིན་ཐང་དང་། མི་གཞི། ཤེས་ཡོན། འཕྲུལ་རྩལ་ལ་སོགས་པའི་ཐོག་ལ་མུ་མཐུད་མཉམ་ལས་བྱེད་པའི་ཐུན་མོང་གི་ཁེ་ཕན་ཡོད་”པས། རྒྱ་ནག་དམར་ཤོག་ཚོགས་པའི་གནོན་ཤུགས་ཡོད་མེད་ལ་མ་ལྟོས་པར་མུ་མཐུད་རྒྱལ་ཁབ་གཉིས་ཀྱི་མཛའ་འབྲེལ་གོང་མཐོར་གཏོང་བའི་ཐོག་ལ་ཤུགས་ནུས་འདོན་རྒྱུ་ཡིན་བསྒྲགས། ། 

གསར་འགོད་པ་དཀོན་མཆོག་རབ་བརྟན།