ཧྥ་རན་སིའི་ལས་འགུལ་གྱི་ཤུགས་རྐྱེན།
ཆེད་བརྗོད།
ཉེ་ཆར་ཧྥ་རན་སིར་བོད་མི་ན་གཞོན་རྒྱ་མིའི་ཟ་ཁང་གི་ལས་གཉེར་བ་ཞིག། སྦྱིན་བདག་དང་རྒྱ་མི་ལས་ཀ་བ་ཁག་ཅིག་གིས་རུབ་ནས་བསད་པའི་གནས་ཚུལ་ཐོན་པ་དང། བོད་མི་ན་གཞོན་བརྒྱ་སྐོར་ཞིག་མ་བསྐུལ་དང་བླངས་ཀྱིས་ས་གནས་དེར་བསྐྱོད་ནས་ཞི་བའི་ངོ་རྒོལ་སྐད་འབོད་དང། ཟ་ཁང་དེའི་ཅ་དངོས་སོགས་ལ་གཏོར་བཅོམ་ཡང་བྱས་ཡོད་པ་རེད། དེའི་རྗེས་སུ་ཧྥ་རན་སི་གཙོ་བོར་གྱུར་པའི་བོད་མི་ཧ་ཅང་ཕོན་ཆེ་འདུ་འཛོམས་ཀྱིས་འདས་པོ་དེ་ལ་གདུང་སེམས་མཉམ་བསྐྱེད་དང། བོད་དང་བོད་མིར་དྲང་བདེན་དགོས་པའི་ཞི་བའི་ལས་འགུལ་རྒྱ་ཆེན་པོ་ཞིག་སྤེལ་སོང། གནད་དོན་དེའི་ཐོག་མི་རེ་ཟུང་གིས་འཚེ་མེད་ཞི་བ་དང་། ༧གོང་ས་མཆོག་གི་བཀའ་སློབ་ལམ་སྟོན་དང་འགལ་ཡོད་ཚུལ་སོགས་དུས་རྒྱུན་གྱི་ལབ་གླེང་དེ་དག་བསྐྱར་བརྗོད་བྱས་སོང། རྩ་བས་ཧྥ་རན་སིའི་ཞི་རྒོལ་ལས་འགུལ་དེས་བོད་དོན་འཐབ་རྩོད་དང་བོད་པ་སྤྱི་ལ་ཕན་ཐོགས་ཆེན་པོ་བྱུང་ཡོད་པས་“བྱ་བརྒྱའི་ཁ་ཉིན་ལ་འཁོར་ཡང་འུག་ཆུང་གིས་ཁ་སྲིབ་ལ་འཁོར་”བ་ཙམ་ལ་ཧ་ལས་དགོས་དོན་གང་ཡང་མེད། འོན་ཀྱང་གནད་དོན་རེ་ཟུང་ཐོག་ལྟ་ཚུལ་དང་གླེང་སློང་མ་བྱས་ན། དུས་རྒྱུན་འཁྱོག་བཤད་བྱེད་མཁན་དག་ལ་བདེན་ཁ་སྦྱིན་པ་ལྟ་བུར་ཡང་འགྱུར་སྲིད་པས། བོད་པའི་སྤྱི་ཚོགས་དེ་ཡང་བཟང་ངན་ཡག་སྡུག་གང་ཡང་མེད་པར་བོང་བུའི་ཨ་མཆོག་ནང་གསེར་དང་བྱེ་མ་གང་བླུགས་ཀྱང་ཁྱད་པར་མེད་པའི་གནས་སྟངས་དང་གཅིག་མཚུངས་སུ་འགྱུར་རྒྱུའི་ཉེན་ཁ་ཡོད། རྩ་བས་བོད་མི་ན་གཞོན་ཞིག་གསོད་སའི་ས་གནས་སུ་དང་བླངས་ཀྱིས་བསྐྱོད་མཁན་རྣམས་ཀྱིས་ས་གནས་ས་ཐོག་ཏུ། བྱང་ཆུབ་སེམས་མཆོག་ཙམ་བསྐྱོར་ནས་ཕྱིར་ལོག་བྱས་ཡོད་ན། དེའི་རྗེས་སུ་སྤེལ་བའི་ལས་འགུལ་དེར་མི་མང་ཕོན་ཆེ་དེ་ལྟ་བུ་འཛོམས་མི་སྲིད་ལ། ལས་འགུལ་དེ་ལྟ་བུ་ཞིག་ཕལ་ཆེར་སྤེལ་ཡང་ཡོད་ཀྱི་མ་རེད། གསར་འགྱུར་བརྒྱུད་ལམ་ཁག་ཏུ་ཁྱབ་བསྒྲགས་ཀྱང་དེ་ལྟ་བུ་ཞིག་ཡོང་སྲིད་པ་རེད། ང་ཚོས་མར་མེའི་ཁྲོམ་སྐོར་སྐབས་བྱང་ཆུབ་སེམས་མཆོག་བསྐྱོར་ནས་རྒྱ་གཞུང་གི་དཔོན་རིགས་རྣམས་ལ་བྱང་ཆུབ་ཀྱི་སེམས་སྐྱེ་རྒྱུ་ཕར་ཞོག སྨོན་ལམ་རྩ་ཆེན་པོ་དེ་ཡང་ད་ལྟའི་ཆར་ཆབ་སྲིད་ཀྱི་འབོད་ཚིག་ཙམ་ལས་རིན་ཐང་མེད་པ་ཞིག་ཏུ་གྱུར་ཟིན། མང་གཙོའི་སྤྱི་ཚོགས་ནང་མི་མང་གིས་ངོ་རྒོལ་ལས་འགུལ་སྐབས་ཅ་དངོས་གཏོར་བཅོམ་གྱི་གནས་ཚུལ་མང་པོ་ཡོད་པ་མ་ཟད། སྐབས་རེ་མི་གསོད་ཁྲག་སྦྱོར་གྱི་གནས་ཚུལ་ཡང་ཡོང་གི་ཡོད། དུས་ཡུན་རིང་པོའི་སྐད་ཆ་བཤད་མི་དགོས་པར་དཔེར་ན་ལོ་སྔོན་མའི་ནང་ཨ་རིའི་ནང་མི་རིགས་ནག་པོ་ཞིག་རྐྱེན་ལམ་དུ་ཕྱིན་སྐབས་ཀྱི་ངོ་རྒོལ་དང། རྒྱ་གར་དུ་ཞིང་པའི་ངོ་རྒོལ་གྱི་ལས་འགུལ་སོགས་ལ་བལྟས་ན་མི་མང་པོའི་ཚེ་སྲོག་ཤོར་ཡོད་པ་ཚང་མས་ཤེས་གསལ་ཡིན་ཡང། ཞི་རྒོལ་དེ་དག་འཇིགས་སྐུལ་རིང་ལུགས་པ་དང་འཚེ་མེད་ཞི་བའི་ལྟ་གྲུབ་དང་འགལ་བའི་གླེང་ཕྱོགས་གང་ཡང་བྱུང་མེད། འདི་ནི་དེང་དུས་མང་གཙོའི་ཆབ་སྲིད་ཀྱི་ལམ་ལུགས་ནང་འབྱུང་བཞིན་པའི་གནས་ཚུལ་ཞིག་ཏུ་ངོས་འཛིན་པ་ལས། ངོ་རྒོལ་གྱི་ལས་འགུལ་སྤེལ་མཁན་དག་ཁྲིམས་འགལ་ཡིན་པའི་ཉེས་འཛུགས་བྱེད་མཁན་མེད། ད་ལན་བོད་མི་གསོད་མཁན་རྒྱ་མིའི་ཟ་ཁང་གི་ཤེལ་སྒོ་བཅགས་པ་དང། ཟ་ཁང་ནང་གི་ཅ་ལག་གཏོར་བཅོམ་བྱས་པ་ནི་དེ་བས་ཀྱང་དྲག་རྒོལ་ཡིན་པའི་ངོས་འཛིན་བྱེད་པའི་གཞི་རྩ་གང་ཡང་མེད།
