ཧྥ་རན་སིའི་སྲིད་འཛིན་ལས་ཐོག་ལ་བསྐྱར་དུ་འོས་བསྡུའི་རྒྱལ་ཁ་ཐོབ།

ཟླ་འདིའི་ཚེས་༢༥ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཚེས་༢༤ ཉིན་ཧྥ་རན་སིའི་སྲིད་འཛིན་གྱི་འོས་བསྡུ་མཐའ་མ་དེ་བྱས་ཡོད་པ་དང་། ཐེངས་འདིའི་འོས་བསྡུའི་ནང་ཧྥ་རན་སིའི་ལས་ཐོག་སྲིད་འཛིན་མེག་རོན་(Macron) ལ་འོས་གྲངས་བརྒྱ་ཆ་༥༨.༥༥% དང་ཁ་གཏད་ཚོགས་པའི་སྲིད་འཛིན་འོས་མི་ལེ་པན་(Le Pen) ལ་འོས་གྲངས་བརྒྱ་ཆ་༤༡.༤༥% ཐོབ་ཡོད་པ་རེད། 

ཐེངས་འདིའི་སྲིད་འཛིན་འོས་བསྡུའི་ཁྲོད་དུ་སྲིད་འཛིན་ལས་ཐོག་ལ་རྒྱལ་ཁ་ཐོབ་པ་དེ་ནི་ཧྥ་རན་སིའི་འདས་པའི་མི་ལོ་ཉི་ཤུའི་རིང་ལ་ལས་ཐོག་སྲིད་འཛིན་ཞིག་ལ་བསྐྱར་དུ་སྲིད་འཛིན་གྱི་རྒྱལ་ཁ་ཐོབ་པ་ནི་ཐེངས་དང་པོ་དེ་ཡིན་པ་རེད།

ཐེངས་འདིའི་ཧྥ་རན་སིའི་སྲིད་འཛིན་གྱི་འོས་བསྡུའི་ཁྲོད་དུ་མི་མང་སུམ་ཆ་གཅིག་ལས་མང་བ་མཉམ་ཞུགས་བྱས་མེད་པར་བརྟེན། ཕྱི་ལོ་༡༩༦༩ ནས་བཟུང་ད་ལྟའི་བར་འོས་བསྡུའི་ནང་མཉམ་ཞུགས་བྱེད་མཁན་གྱི་མི་གྲངས་ཉུང་ཤོས་སུ་ཆགས་འདུག

ཁ་གཏད་ཚོགས་པའི་སྲིད་འཛིན་འོས་མི་ལི་པན་གྱིས་ཡུ་རོབ་ལ་ངོ་རྒོལ་བྱེད་པའི་སྲིད་བྱུས་རབ་དང་རིམ་གཏིང་གི་ཡོད་པར་བརྟེན། ཡུ་རོབ་ཀྱི་དབུ་ཁྲིད་མང་པོས་དེ་ལ་ཞེད་སྣང་བྱེད་ཀྱི་ཡོད་པ་དང་། ཐེངས་འདིའི་ཧྥ་རན་སིའི་སྲིད་འཛིན་གྱི་འོས་བསྡུའི་རྒྱལ་ཁ་ནི་ད་ལྟའི་སྲིད་འཛིན་ལས་ཐོག་མེག་རོན་ལ་ཐོབ་ཡོད་པའི་སྟབས་ཀྱིས་ཡུ་རོབ་ཀྱི་དབུ་ཁྲིད་མང་པོས་དགའ་སྤྲོ་དང་བཅས་ཁོང་ལ་འཚམས་འདྲི་ཞུ་བཞིན་པའི་གནས་ཚུལ་འདུག

འཇར་མེན་ནིའི་སྲིད་འཛིན་ནི་ཁོང་ལ་འཚམས་འདྲི་ཞུ་མཁན་དང་པོ་དེ་ཆགས་འདུག་ལ། ཨ་རི་སྲིད་འཛིན་བྷ་ཌན་གྱིས་ཀྱང་ཡུག་རེན་ལ་རྒྱབ་སྐྱོར་བྱེད་པའི་གནད་དོན་ཚུད་པའི་མཉམ་ལས་བྱེད་རྒྱུ་ལ་རེ་སྒུག་བྱེད་ཀྱི་ཡོད་པར་གསུངས་གནང་འདུག དེ་བཞིན་ཡུག་རེན་གྱི་སྲིད་འཛིན་དང་དབྱིན་ཇིའི་སྲུད་བློན་སོགས་ཀྱིས་ཀྱང་ཁོང་ལ་འཚམས་འདྲི་ཞུས་འདུག

གཞན་ཡང་རྒྱལ་སྤྱིའི་རྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། སྲིད་འཛིན་འོས་མི་ལེ་པན་ནི་ཕྱི་ལོ་༢༠༡༢ དང་ ༢༠༡༧ གཉིས་ཀ་ལ་སྲིད་འཛིན་གྱི་འོས་བསྡུ་ཆེན་མོའི་ནང་མཉམ་ཞུགས་བྱས་ཡོད་ཀྱང་། མོ་ལ་ཕམ་ཁ་བྱུང་བ་དང་། ཐེངས་འདིའི་སྲིད་འཛིན་གྱི་འོས་བསྡུ་ལ་ཕལ་ཁ་བྱུང་བ་དེ་ནི་ཕམ་ཁ་ཐེངས་གསུམ་པ་དེ་ཆགས་ཡོད་འདུག་ཀྱང་། ཕྱི་ལོ་ ༢༠༡༧ དང་བསྡུར་ན་ཐེངས་འདིའི་འོས་གྲངས་ལ་ཁྱད་པར་ཆེན་མོ་མེད་པ་རེད།

ཧྥ་རན་སིའི་སྲིད་འཛིན་ལས་ཐོག་པས་འདས་པའི་ལོ་ལྔའི་སྲིད་འཛིན་གྱི་དུས་ཡུན་རིང་ཧྥ་རན་སིའི་ཡུལ་དུ་ལས་མེད་ཀྱི་གྲངས་ཀ་བརྒྱ་ཆ་༧% ཆགས་ཡོད་པ་དང་། དཔལ་འབྱོར་ཡར་རྒྱས་ཕྱིན་པ་མ་ཟད། འཇིགས་སྐུལ་པའི་དྲག་སྤྱོད་ཇེ་ཉུང་དུ་བཏང་ཡོད་པ་བཅས་ཀྱི་བྱས་རྗེས་ཆེན་མོ་ཡོད་མཁན་ཞིག་ཡིན་པ་རེད། སྲིད་འཛིན་ཁོང་ནི་ཡུ་རོབ་མཐུན་ཚོགས་དང་བྱང་ཆིངས་རྩ་འཛུགས་བཅས་ལ་དོ་སྣང་དང་མོས་པ་ཆེན་མོ་ཡོད་མཁན་ཞིག་ཡིན་འདུག་པས། ད་ཐེངས་ཁོང་ཉིད་ལ་ཧྥ་རན་སིའི་སྲིད་འཛིན་གྱི་རྒྱལ་ཁ་ཐོབ་པ་དེ་ཁོང་ཉིད་ཙམ་མིན་པར་ཡུ་རོབ་མཐུན་ཚོགས་དང་བྱང་ཆིངས་རྩ་འཛུགས་སོགས་ཀྱི་རྒྱལ་ཁ་ཞིག་ཡིན་པའི་གནས་ཚུལ་ཐོན་འདུག །

གསར་འགོད་པ་བློ་བཟང་རྒྱ་མཚོ།