ཧྥ་རན་སིར་བོད་མི་སྐྱབས་བཅོལ་ཞུ་མཁན་གྱི་གནས་སྟངས་སྐོར་གྱི་གནས་ཚུལ།

ཡུ་རོབ་རྒྱལ་ཁབ་ཧྥ་རན་སིར་བཙན་བྱོལ་བོད་མི་སྐྱབས་བཅོལ་ཞུ་བར་འགྲོ་མཁན་ལོ་ཤས་སྔོན་ནས་མང་དུ་འགྲོ་བཞིན་པ་དང་བསྟུན། ཐེངས་འདིར་ཧྥ་རན་སིའི་བརྒྱུད་ལམ་ཐོག་ཏུ་སྐྱབས་བཅོལ་ཞུ་མཁན་བོད་མི་རྣམས་ཀྱི་གནས་སྟངས་སྐོར་གྱི་གནས་ཚུལ་བཀོད་འདུག

ཟླ་༥ ཚེས་༢༩ ཉིན་ཧྥ་རན་སིའི་རྒྱལ་སྤྱིའི་རླུང་འཕྲིན་ཁང་གིས་གནས་ཚུལ་སྤེལ་བར་གཞིགས་ན། ཧྥ་རན་སིའི་རྒྱལ་ས་པཱེ་རི་སཱི་ནས་རྒྱང་ཐག་ཀི་ལོ་མི་ཊར་༣༠ ཙམ་གྱི་གནས་སུ་ཀཱོན་ཧྥེ་ལན་སཱེ་རྫོང་གི་སཱི་ནཱི་གཙང་པོའི་འགྲམ་གྱི་ནགས་ཚལ་ནང་དུ། རྒྱལ་ཁབ་དེར་སྐྱབས་བཅོལ་ཞུ་རུ་སླེབས་མཁན་བོད་མི་༢༠༠ ལྷག་གུར་ནང་དུ་གནས་སྡོད་བྱེད་ཀྱི་ཡོད་འདུག་ཀྱང་། ཉེ་ཆར་གཞུང་གི་ལས་བྱེད་ཚོས་སྡོད་གུར་༡༠༠ ལྷག་གི་གནས་སྐབས་སྡོད་སྒར་དེ་བཤིགས་ནས། བོད་མི་རྣམས་ལ་གཞུང་གི་སྡོད་ཁང་དང་། དང་བླངས་པའི་ཁྱིམ་ཚང་ནང་དུ་གནས་སྤོས་བྱས་ཡོད་འདུག འོན་ཀྱང་བོད་མི་༡༢༠ ལ་མ་གཏོགས་སྡོད་གནས་ཀྱི་ཆ་རྐྱེན་བསྐྲུན་ཐུབ་མེད་པས། ལྷག་མ་༨༠ རྣམས་སྡོད་གནས་ཐོབ་ཡོང་བའི་རེ་བ་བཅངས་ནས་ས་གནས་གཞན་དུ་འགྲོ་དགོས་པ་ཆགས་ཡོད་འདུག

དེང་གི་ཆར་བཙན་བྱོལ་བོད་མི་མང་པོ་ཞིག་ཧྥ་རན་སིར་སྐྱབས་བཅོལ་ཞུ་བར་འགྲོ་བཞིན་ཡོད་པས། མ་འོངས་པར་ཡུ་རོབ་ནང་བོད་མི་མང་ཤོས་ཀྱི་རྒྱལ་ཁབ་གཅིག་ཆགས་སྲིད་པ་རེད་འདུག །

གསར་འགོད་པ་སྐལ་བཟང་དོན་གྲུབ།