ཧྥིན་ལན་ཌ་དང་སཱེ་ཝི་ཌན་གཉིས་བྱང་ཆིངས་སྒྲིག་འཛུགས་ནང་འཛུལ་རྒྱུར་ཨ་རིས་རྒྱབ་སྐྱོར་བྱས་འདུག

ཨུ་རུ་སུའི་དགག་བྱ་དང་སྡིགས་སྐུལ་ལ་སྣང་མེད་བཏང་ནས། ཧྥིན་ལན་ཌ་དང་སཱེ་ཝི་ཌན་གཉིས་ཨ་རིས་འགོ་ཁྲིད་པའི་བྱང་ཆིངས་སྒྲིག་འཛུགས་ཀྱི་ཚོགས་མིར་ཞུགས་རྒྱུ་ཐག་གཅོད་བྱས་པ་ལྟར། ཨ་རིས་རྒྱལ་ཁབ་དེ་གཉིས་ཚོགས་མི་བྱེད་རྒྱུར་རྒྱབ་སྐྱོར་ཆ་ཚང་ཡོད་སྐོར་བརྗོད་འདུག 

ཟླ་༥ པའི་ཚེས་༢༠ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཚེས་༡༩ ཉིན་ཨ་རིའི་རྒྱལ་ས་ཝ་ཤིན་ཀྲོན་དུ་ཨ་རིའི་སྲིད་འཛིན་རྗོ་བྷའེ་ཌན་གྱིས། ཧྥིན་ལན་ཌའི་སྲིད་འཛིན་དང་། སཱེ་ཝི་ཌན་གྱི་སྲིད་བློན་གཉིས་དང་ཐུག་འཕྲད་བྱས་རྗེས། རྒྱལ་ཁབ་དེ་གཉིས་བྱང་ཆིངས་སྒྲིག་འཛུགས་ཀྱི་ཚོགས་མིར་ཞུགས་པའི་ཆ་རྐྱེན་ཆ་ཚང་ལྡན་ཡོད་པས། ཨ་རིས་རྒྱལ་ཁབ་དེ་གཉིས་ལ་རྒྱབ་སྐྱོར་ཆ་ཚང་ཞུ་ཡི་ཡོད་པདང་། ཡུ་རོབ་ཁུལ་དུ་བྱང་ཆིངས་སྒྲིག་འཛུགས་ཀྱི་ཚོགས་མི་གསར་པ་གཉིས་ཡོད་པ་དེས། མཐུན་ཕྱོགས་ཀྱི་བདེ་འཇགས་ལ་གོང་འཕེལ་དང་མཉམ་ལས་ཀྱང་གཏིང་ཟབ་ཏུ་འགྲོ་རྒྱུ་ཡིན་སྐོར་བརྗོད་འདུག 

དེ་སྔོན་ཡིན་ན་ཧྥིན་ལན་ཌ་དང་། སཱེ་ཝི་ཌན་རྒྱལ་ཁབ་གཉིས་ནི་དམག་དོན་ཐད་བར་མའི་རྒྱལ་ཁབ་གཅིག་ཏུ་བསྡད་ཡོད་ཀྱང་། ཉེ་ཆར་ཨུ་རུ་སུས་ཡུག་ཀེ་རན་ལ་བཙན་འཛུལ་བྱས་པའི་རྗེས་སུ། རྒྱལ་ཁབ་དེ་གཉིས་ཀྱིས་རྒྱལ་ཁབ་ཀྱི་བདེ་སྲུང་ཆེད་དུ་ཡིན་སྐོར་བརྗོད་ནས། ཨུ་རུ་སུས་དགག་བྱ་དང་སྡིགས་སྐུལ་ཐེངས་མང་བྱས་ཀྱང་། བྱང་ཆིངས་སྒྲིག་འཛུགས་ཀྱི་ཚོགས་མིར་ཞུགས་རྒྱུའི་ཐག་གཅོད་བྱས་ཏེ། ཚེས་༡༨ ཉིན་ཚོགས་མིར་ཞུགས་རྒྱུའི་སྙན་ཞུ་དངོས་སུ་སྤྲད་ཡོད་པ་རེད་འདུག 

དེ་ཡང་བྱང་ཆིང་སྒྲིག་འཛུགས་ཀྱི་ཚོགས་མི་རྒྱལ་ཁབ་༣༠ ཡི་བར་དུ་ཚོགས་མི་གཅིག་ལ་རྒྱལ་ཁབ་གཞན་གྱིས་དྲག་རྒོལ་བྱས་ཚེ། ཚོགས་མི་ཚང་མར་དྲག་རྒོལ་བྱས་པ་གཅིག་མཚུངས་ཡིན་པར་ངོས་འཛིན་བྱེད་དགོས་པའི་གྲོས་མཐུན་ཡོད་འདུག་པས། སྒྲིག་འཛུགས་འདིའི་ནང་འཛུལ་ཚེ་རྒྱལ་ཁབ་ཀྱི་བདེ་སྲུང་ལ་ཁེ་ཕན་ཡོད་པར་ངོས་འཛིན་བྱེད་མཁན་མང་པོ་ཡོད་འདུག་ཀྱང་། ཨུ་རུ་སུས་སྒྲིག་འཛུགས་དེའི་ཤུགས་རྐྱེན་རང་ཉིད་ཀྱི་ས་མཚམས་སུ་སླེབས་བཞིན་པ་དེ་ནི། ཨུ་རུ་སུའི་བདེ་སྲུང་ལ་ཉེན་ཚབས་ཡོད་སྐོར་བརྗོད་ནས། ཁྱིམ་མཚེས་རྒྱལ་ཁབ་ཁག་དང་རྒྱལ་ཁབ་གཞན་སྒྲིག་འཛུགས་དེར་འཛུལ་བར་དགག་བྱ་ཆེན་པོ་བྱེད་ཀྱི་ཡོད་པ་རེད། ཡུག་ཀེ་རན་གྱིས་ཀྱང་སྒྲིག་འཛུགས་དེར་འཛུལ་ཐབས་བྱས་ཡོད་པས། ཨུ་རུ་སུས་དགག་བྱ་ཆེན་པོ་བྱས་འདུག 

ཨ་རིའི་སྲིད་འཛིན་བྷའེ་ཌན་གྱིས་ཧྥིན་ལན་ཌ་དང་སཱེ་ཝི་ཌན་གཉིས་བྱང་ཆིངས་སྒྲིག་འཛུགས་ལ་ཞུགས་པར། གྲོས་ཚོགས་གོང་མས་རྒྱབ་སྐྱོར་གང་མགྱོགས་ཐོབ་ཆེད་དུ་སྙན་ཐོ་འབུལ་ལམ་ཞུ་རྒྱུ་ཡིན་སྐོར་བརྗོད་འདུག བྱང་ཆིངས་སྒྲིག་འཛུགས་ཀྱི་ཁྲིམས་མཐུན་ཐོག་ནས་ལས་དོན་སྤེལ་གྱི་ཡོད་པས། ཨ་རིའི་གྲོས་ཚོགས་གོང་མ་ནས་ཚོགས་མི་གསར་པ་ཞིག་ལ་གསུམ་ཆ་གཉིས་ཀྱི་རྒྱབ་སྐྱོར་ཐོབ་དགོས་ཀྱི་ཡོད་འདུག ཐེངས་འདིར་ཨ་རིའི་སྲིད་དོན་ཚོགས་པ་གཉིས་ཀས་ལས་དོན་དེར་རྒྱབ་སྐྱོར་ཆེན་པོ་བྱེད་རྒྱུ་ཡིན་པ་ངེས་གཏན་ཡིན་ཡང་། ཚོགས་མི་གསར་པར་བྱང་ཆིངས་སྒྲིག་འཛུགས་ཀྱི་ཚོགས་མི་རྒྱལ་ཁབ་༣༠ ཚང་མས་སྤྱི་མོས་རྒྱབ་སྐྱོར་བྱེད་དགོས་ཀྱི་ཡོད་པ་དང་། ཉེ་བའི་ཆར་ཏུར་ཀི་རྒྱལ་ཁབ་ནས་ཚོགས་མིར་སྙན་ཞུ་རྒྱག་མཁན་རྒྱལ་ཁབ་གསར་པ་དེ་གཉིས་ལ་རྒྱབ་སྐྱོར་བྱེད་རྒྱུ་མིན་སྐོར་བརྗོད་ཡོད་པས། དངོས་སུ་འོས་ཤོག་འཕེན་སྐབས་གང་འདྲ་ཡོང་མིན་ཚོད་དཔག་བྱེད་དཀའ་བ་རེད་འདུག 

འོན་ཀྱང་ཚེས་༡༨ ཉིན་ཨ་རིའི་ཕྱི་སྲིད་དྲུང་ཆེས་ཏུར་ཀིའི་ཕྱི་སྲིད་བློན་ཆེན་དང་ཐུག་འཕྲད་ཀྱིས་གྲོས་མོལ་བྱས་ཡོད་འདུག་པ་དང་། ཉིན་དེར་ཨ་རིའི་སྲིད་འཛིན་བྷའེ་ཌན་ལ་གསར་འགོད་པ་ཞིག་གིས་ཏུར་ཀིའི་དགག་བྱ་དང་འབྲེལ་ནས་དྲི་བ་དྲིས་སྐབས། ཁོང་གིས་ལས་དོན་དེ་འགྲིག་འགྲོ་རྒྱུ་ཡིན་སྐོར་བརྗོད་འདུག །

གསར་འགོད་པ་སྐལ་བཟང་དོན་གྲུབ།