ཧྥིན་ལན་ཌའི་བུད་མེད་ཚོས་ཧྥིན་ལན་ཌའི་སྲིད་བློན་ལ་རྒྱབ་སྐྱོར་ཤུགས་ཆེན་བྱས་འདུག
ཟླ་འདིའི་ཚེས་༢༡ ཉིན་(sky news) ཞེས་པའི་གསར་ཁང་གིས་གནས་ཚུལ་སྤེལ་གསལ་ལྟར་ན། ཧྥིན་ལན་ཌི་ཡི་བུད་མེད་བརྒྱ་ཕྲག་མང་པོས་ཧྥིན་ལན་ཌི་སྲིད་བློན་སན་ན་མ་རིན་(Sanna Marin) ལ་རྒྱབ་སྐྱོར་མཚོན་ཆེད་དུ་རང་ཉིད་ཀྱིས་ཞབས་བྲོ་འཁྲབ་པའི་བརྙན་ཐུང་དྲྭ་ཐོག་ཏུ་སྤེལ་བཞིན་ཡོད་པའི་གནས་ཚུལ་ཐོན་འདུག
བདུན་ཕྲག་སྔོན་མའི་ནང་དུ་ཧྥིན་ལན་ཌིའི་སྲིད་བློན་གྱིས་མཚན་ཚོགས་ཁང་ཞིག་གི་ནང་དུ། རང་ཉིད་ཀྱི་གྲོགས་མོ་དང་མི་སྣ་གྲགས་ཅན་ཁག་གཅིག་དང་ལྷན་དུ་ཞབས་བྲོ་འཁྲབ་བཞིན་པའི་བརྙན་ཐུང་གཉིས་ཤིག་སྤྱི་ཚོགས་ཀྱི་དྲྭ་ལམ་ཁག་ཏུ་ཁྱབ་གདལ་མྱུར་པོ་ཕྱིན་ཡོད་པ་དང་། བརྙན་ཐུང་དེ་གཉིས་ལ་བརྟེན་ནས་མི་མང་པོས་ཧྥིན་ལན་ཌིའི་སྲིད་བློན་གྱི་ཐོག་ལ་ལབ་གླེང་དང་སྐྱོན་བརྗོད་སྣ་ཚོགས་བྱས་ཡོད་པ་དང་། ལྷག་པར་དུ་ཕྱོགས་འགལ་ཆབ་སྲིད་ཚོགས་པའི་ཚོགས་མི་ཞིག་གིས་མཚན་ཚོགས་དེའི་སྐབས་སུ་མོ་ཡིས་བཟི་སྨན་སྤྱོད་ཡོད་མེད་ཀྱི་ཐོག་ལ་བརྟག་དཔྱད་བྱེད་དགོས་པ་སོགས་ཀྱི་སྐྱོན་བརྗོད་ཀྱང་བྱས་ཡོད་འདུག
ཧྥིན་ལན་ཌི་སྲིད་བློན་གྱིས་ཁོ་མོས་ཆང་རག་བཏུངས་བ་ལས་ཁྲིམས་འགལ་གྱི་ལས་ཀ་གང་ཡང་བྱས་མེད་རབས་དང་། མི་ཚེ་ནང་དུ་བཟི་སྨན་བེད་སྤྱོད་ཀྱང་བྱེད་མྱོང་མེད་ཅེས་བརྗོད་ཡོད་འདུག་ཀྱང་། ཁྲིམས་ལ་སྲུང་སྐྱོབ་ཀྱི་དོན་དུ་ཁོ་མོས་བཟི་སྨན་སྤྱོད་ཡོད་མེད་ཀྱི་ཐོག་ལ་བརྟག་དཔྱད་བྱས་ཡོད་ཀྱང་ད་ལྟའི་ཆར་བརྟག་དཔྱད་ཀྱི་གྲུབ་འབྲས་ཐོན་མེད་པ་རེད་འདུག
ཧྥིན་ལན་ཌི་སྲིད་བློན་ལ་རྒྱབ་སྐྱོར་མཚོན་ཆེད་དུ་ཧྥིན་ལན་ཌིའི་བུད་མེད་བརྒྱ་ཕྲག་མང་པོས་རང་ཉིད་ཀྱིས་ཞབས་བྲོ་འཁྲབ་པའི་བརྙན་ཐུང་སྤྱི་ཚོགས་ཀྱི་དྲ་ལམ་དུ་སྤེལ་བཞིན་ཡོད་པ་དང་། ལྷག་པར་དུ་ཧྥིན་ལན་ཌི་ཡི་ཁྱིམ་མཚེས་རྒྱལ་ཁབ་ཌན་མ་ཁེ་སོགས་ཀྱི་ནང་དུ་ཡོད་པའི་བུད་མེད་ཚོས་ཀྱང་། ཧྥིན་ལན་ཌི་སྲིད་བློན་ལ་རྒྱབ་སྐྱོར་གྱི་ཚུལ་དུ་ཆང་རག་འཐུང་ཞོར་ཞབས་བྲོ་འཁྲབ་པའི་བརྙན་ཐུང་མང་པོ་དྲྭ་ཐོག་ཏུ་སྤེལ་བཞིན་ཡོད་འདུག
ཧྥིན་ལན་ཌི་སྲིད་བློན་སན་ན་མ་རིན་(Sanna Marin) ནི་ད་ལྟའི་ཆར་དགུང་ལོ་༣༦ ཡིན་པ་དང་། སྤྱི་ལོ་༢༠༡༩ ལོར་ཁོ་མོ་དགུང་ལོ་༣༤ ཡིན་པའི་དུས་སུ་ཧྥིན་ལན་ཌི་སྲིད་བློན་གྱི་གོ་གནས་ཐོབ་ཡོད་པ་དང་། སྐབས་དེ་ཁོ་མོ་ནི་འཛམ་གླིང་ཐོག་གི་སྲིད་བློན་ལོ་ན་གཞོན་ཤོས་སུ་འགྱུར་ཡོད་པའི་གནས་ཚུལ་ཐོན་འདུག།
གསར་འགོད་པ་བློ་བཟང་རྒྱ་མཚོ།
