ཧྥེ་ལི་པེན་ནང་ཁ་ཆེ་དྲག་སྤྱོད་པར་འཐབ་རྒོལ་བྱེད་བཞིན་པ།

ལྷོ་ཤར་ཨེ་ཤི་ཡའི་རྒྱལ་ཁབ་ཧྥེ་ལི་པེན་གྱི་ལྷོ་ཕྱོགས་སུ་ཡོད་པའི་མ་ར་ཝི་གྲོང་ཁྱེར་ནང་དུ། ཁ་ཆེ་འཇིགས་སྐུལ་རིང་ལུགས་པ་ཨེ་སི་སི་དང་གཞུང་གི་དམག་མི་བར་གྱི་དམག་འཁྲུག་འགོ་བཙུགས་ནས་བདུན་ཕྲག་བཞི་ཕྱིན་ཡོད་པ་དང་། མི་སེར་བརྒྱ་ཕྲག་ཁ་ཤས་གྲོང་ཁྱེར་དེའི་ནང་ཉེན་ཚབས་ཀྱི་གནས་སྟངས་འོག་ལྷུང་ཡོད་འདུག

ཟླ་འདིའི་ཚེས་༡༣ ཉིན་གྱི་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཧྥེ་ལི་པེན་གྱི་དམག་མིས་ཁ་ཆེ་དྲག་སྤྱོད་པ་ཨེ་སི་སིའི་ངོས་འཛིན་ཡོད་པའི་དྲག་སྤྱོད་ཚོགས་པ་དང་འཐབ་རྒོལ་བྱས་ནས། གྲོང་ཁྱེར་མ་ར་ཝིའི་ནང་དུ་དྲག་སྤྱོད་པའི་བཙན་བཟུང་གི་ས་ཆ་ཚུར་ལེན་ཐབས་བྱེད་བཞིན་ཡོད་པ་དང་། མི་སེར་བརྒྱ་ཁྲག་ཁ་ཤས་བདུན་ཕྲག་བཞིའི་རིང་དེར་འཁར་ནས་ཡོད་པ་རེད། བརྒྱུད་ལམ་ཁག་ཅིག་ཏུ་མི་སེར་རྣམས་མུག་ཤི་མི་ཐེབས་ཆེད། ཟས་གོས་དགོས་པའི་གནས་སྟངས་ཆགས་ཡོད་པས། མང་པོ་ཞིག་གིས་མེ་མདའ་དང་གནམ་ཐོག་གི་དྲག་རྒོལ་ལས་ཚེ་སྲོག་ཤོར་སྲིད་པའི་ཉེན་ཁར་མ་འཛེམས་པར། གྲོང་ཁྱེར་དེ་ལས་འབྲོ་ཐབས་བྱེད་བཞིན་ཡོད་འདུག དེ་ཞིན་ཡི་ཤུ་ཆོས་ལུགས་རྗེས་འབྲངས་པ་མང་པོ་ཞིག་གིས། དྲག་སྤྱོད་པའི་བཙན་བཟུང་གི་ས་ཆ་ལས་ཐར་ཆེད། ཁ་ཆེ་བ་ཚོའི་སར་ནས་ཁ་ཆེའི་གདོང་ཁེབས་གཡར་ནས་འབྲོ་ཡི་ཡོད་འདུག

དེ་ཡང་ཟླ་༥ པའི་ཚེས་༢༣ ཉིན་ཧྤེ་ལི་པེན་གྱི་གྲོང་ཁྱེར་མ་ར་ཝི་རུ། ཁ་ཆེ་དྲག་སྤྱོད་པ་ཨེ་སི་སིས་ངོས་འཛིན་ཡོད་པའི་དྲག་སྤྱོད་ཚོགས་པ་ཞིག་གིས་བཙན་བཟུང་བྱས་པ་དང་། སྐབས་དེར་ཡེ་ཤུ་ཆོས་ལུགས་པ་མང་པོ་དམར་གསོད་དང་བཙན་བཟུང་བྱས་ཡོད་འདུག
ད་ལྟའི་ཆར་གཞུང་གི་དམག་དང་དྲག་སྤྱོད་པའི་བར་འཐབ་རྒོལ་བྱས་ནས་བདུན་ཕྲགབཞི་ཕྱིན་ཡོད་པ་དང་། གཞུང་འབྲེལ་གྱི་གྲངས་ཐོ་ལ་གཞིགས་ན། ཟླ་༦ པའི་ཚེས་༡༣ བར་མི་སེར་༢༦ དང་དམག་མི་༥༨། དྲག་སྤྱོད་པ་༢༠༢ ཡི་ཚེ་སྲོག་ཤོར་ཡོད་འདུག ཁ་ཆེ་དྲག་སྤྱོད་པའི་བཙན་བཟུང་ལ་བརྟེན་ནས། གྲོང་ཁྱེར་དེའི་མི་མང་འབུམ་༢ ཡོད་པ་ལས་མང་ཆེ་བ་བྲོས་བྱོལ་དུ་འགྲོ་དགོས་པའི་དཀའ་ངལ་འཕྲད་ཡོད་པ་དང་།ད་ལྟའི་ཆར་མི་མང་༣༠༠ ནས་༦༠༠ བར་ས་གནས་དེར་འཁར་ཡོད་སྐོར་གཞུང་གིས་བརྗོད་འདུག །
གསར་འགོད་པ་སྐལ་བཟང་དོན་གྲུབ།