ཧྲང་ཧེ་མཉམ་ལས་ལྷན་ཚོགས་ཀྱི་ལོ་འཁོར་ཚོགས་འདུ་འཚོགས་རྒྱུ་རེད་འདུག

ཟླ་འདིའི་ཚེས་༡༢ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཧྲང་ཧེ་མཉམ་ལས་ལྷན་ཚོགས་ཀྱི་ལོ་འཁོར་ཚོགས་འདུ་ཐེངས་༢༢ པ་དེ་ཟླ་འདིའི་ཚེས་༡༥ ནས་ཉིན་གཉིས་ཀྱི་རིང་འཚོགས་རྒྱུ་དང་། སྐབས་དེའི་ཚོགས་འདུའི་ཐོག་ཏུ་ཨུ་རུ་སུའི་སྲིད་འཛིན་དང་རྒྱ་དཀར་ནག་གཉིས་ཀྱི་སྲིད་འཛིན་སོགས་ཚོགས་འདུ་ལ་མཉམ་ཞུགས་བྱེད་རྒྱུའི་གནས་ཚུལ་ཐོན་འདུག

ཧྲང་ཧེ་མཉམ་ལས་ལྷན་ཚོགས་དེ་ནི་ཟླ་འདིའི་ཚེས་༡༥ ནས་ཉིན་གཉིས་ཀྱི་རིང་ཨུ་ཛུ་བྷེ་ཁི་སི་ཐན་དུ་འཚོགས་རྒྱུ་དང་། ལྷན་ཚོགས་དེའི་ཚོགས་མི་རྒྱལ་ཁབ་རྒྱ་གར་ཕུད་པའི་ཚོགས་མི་རྒྱལ་ཁབ་མང་ཆེ་བ་ནི་མི་གཅིག་དབང་སྒྱུར་རིང་ལུགས་ཀྱི་རྒྱལ་ཁབ་ཡིན་འདུག  ཨུ་ཛུ་བྷེ་ཁི་སི་ཐན་ནི་ཨ་རི་གཙོས་པའི་ནུབ་ཕྱོགས་རྒྱལ་ཁབ་དག་དང་བློ་ཐག་ཉེ་བོ་ཡོད་ན་ཡང་། ཐེངས་འདིའི་ལྷན་ཚོགས་ནི་ཨུ་ཛུ་བྷེ་ཁི་སི་ཐན་དུ་འཚོགས་རྒྱུ་རེད་འདུག

བྷེ་ལ་རུ་སི་ཡིས་དེ་སྔ་ལྷན་ཚོགས་དེའི་ཚོགས་མི་བྱེད་རྒྱུའི་སྙན་ཞུ་ཕུལ་ཡོད་པ་དང་ད་ལྟའི་ཆར་ལྷན་ཚོགས་ཀྱི་ཚོགས་མི་རྒྱལ་ཁབ་ཁག་གིས་གནས་དོན་དེའི་ཐོག་ཏུ་གྲོས་བསྡུར་བྱས་དང་བྱེད་མུས་ཡིན་པ་དང་། ཐེངས་འདིའི་ཚོགས་ཐོག་ཏུ་ཨེ་རན་གྱིས་ཀྱང་ལྷན་ཚོགས་དེའི་ཚོགས་མི་རྒྱལ་ཁབ་བྱེད་རྒྱུའི་སྙན་ཞུ་འབུལ་རྒྱུ་ཡིན་པའི་གནས་ཚུལ་ཐོན་འདུག

ཉེ་ཆར་ཨ་རབ་ཀྱི་གསར་ཤོག་ཅིག་གི་ཐོག་ཏུ་རྩོམ་ཡིག་ཅིག་སྤེལ་ཡོད་པའི་ནང་དུ། སི་རི་ཡ་དང་ཨི་སི་རེལ། ཝེ་ཋེ་ནམ་དང་བྷེང་ལ་དྷེ་ཤེ་བཅས་རྒྱལ་ཁབ་ཁག་གཅིག་ཧྲང་ཧེ་མཉམ་ལས་ལྷན་ཚོགས་དེའི་ཚོགས་མི་བྱེད་འདོད་ཡོད་རབས་ཀྱི་གནས་ཚུལ་ཐོན་བརྗོད་འདུག

ཧྲང་ཧེ་མཉམ་ལས་ལྷན་ཚོགས་ཀྱིས་འཛམ་གླིང་ཁྱོན་ཡོངས་ཀྱི་མི་འབོར་གྱི་བརྒྱ་ཆ་༤༠% དང་དཔལ་འབྱོར་གྱི་ཐོན་སྐྱེད་ཕྱོགས་བསྡོམས(GDP) བརྒྱ་ཆ་༣༠% ཟིན་ཡོད་པ་དང་། ཨེ་ཤི་ཡ་དང་ཡུ་རོབ་ཀྱི་ས་ཁྱོན་བརྒྱ་ཆ་༦༠% ཟིན་ཡོད་འདུག་པས། འཛམ་གླིང་ཐོག་གི་ལྷན་ཚོགས་ཆེ་ཤོས་ཀྱི་གྲས་ཤིག་ཆགས་ཡོད་པའི་དབང་གིས་རྒྱལ་ཁབ་མང་པོ་ལྷན་ཚོགས་དེའི་ནང་དུ་འཛུལ་ཞུགས་བྱེད་འདོད་ཡོད་རབས་ཀྱི་གནས་ཚུལ་ཐོན་འདུག

ཧྲང་ཧེ་མཉམ་ལས་ལྷན་ཚོགས་ཀྱི་ཚོགས་མི་རྒྱལ་ཁབ་ཁག་ནི་རྒྱ་གར་དང་ཨུ་རུ་སུ། རྒྱ་ནག་དང་པ་ཀི་སི་ཐན། ཁ་ཛག་སི་ཐན་དང་ཁིར་གྷེ་སི་ཐན། ཐ་ཅི་ཁི་སི་ཐན་དང་ཨུ་ཛུ་བྷེ་ཁི་སི་ཐན་བཅས་རྒྱལ་ཁབ་ཁྱོན་བསྡོམས་བརྒྱད་ཡོད་པ་དང་། ཨེ་རན་དང་ཨབ་གྷ་ནི་སི་ཐན་སོགས་ཟུར་ཉན་རྒྱལ་ཁབ་བཞི་དང་དེ་བཞིན་རྒྱལ་ཁབ་ཁག་གཅིག་མཉམ་ཞུགས་བྱེད་རྒྱུ་ཡིན་རབས་བརྗོད་འདུག

རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཐེངས་འདིའི་ཚོགས་འདུ་ལ་རྒྱ་གར་གྱི་སྲིད་བློན་དང་རྒྱ་ནག་གི་སྲིད་འཛིན། ཨུ་རུ་སུའི་སྲིད་འཛིན་དང་པ་ཀི་སི་ཐན་གྱི་སྲིད་བློན་ཨེ་རན་གྱི་སྲིད་འཛིན་བཅས་མཉམ་ཞུགས་བྱེད་རྒྱུ་རེད་འདུག

ཐེངས་འདིའི་ཚོགས་འདུའི་གྲོས་འཆར་གལ་ཆེ་ཤོས་ཤིག་ནི་ཧྲང་ཧེ་མཉམ་ལས་ལྷན་ཚོགས་ཀྱི་ཚོགས་མི་རྒྱལ་ཁབ་མང་དུ་གཏོང་རྒྱུ་དེ་ཡིན་པའི་གནས་ཚུལ་ཐོན་འདུག།

གསར་འགོད་པ།  བློ་བཟང་རྒྱ་མཚོ།