ཧྲང་ཧེ་རུ་ཏོག་ནད་ཕོག་ནས་འདས་གྲོངས་སོང་བ་གཞུང་གིས་གསང་བ་བྱས་འདུག

འདས་པའི་ཟླ་ངོ་གཅིག་ལྷག་གི་རིང་རྒྱ་ནག་གི་གྲོང་ཁྱེར་ཆེ་ཤོས་ཧྲང་ཧེ་རུ་ཏོག་དབྱིབས་ནད་དུག་གསུམ་པ་(Omicron) ཁྱབ་གདལ་ཇེ་ཆེར་སོང་བའི་རྐྱེན་གྱིས་མི་འབོར་ས་ཡ་༢༥ ལྷག་ཡོད་པའི་རྒྱ་ནག་གི་གྲོང་ཁྱེར་ཆེ་ཤོས་དེ་སྒོ་རྒྱ་བསྡམས་རྒྱུའི་གསལ་བསྒྲགས་བྱས་པའི་རྗེས། གྲོང་ཁྱེར་དེར་གནས་སྡོད་ཡུལ་མི་རྣམས་ལ་ཉིན་རེའི་འཚོ་བའི་ཟ་བཅའ་འདང་ངེས་མེད་པའི་དཀའ་ངལ་འཕར་མ་ཞིག་འཕྲད་བཞིན་ཡོད་འདུག

ཟླ་འདིའི་ཚེས་༡༨ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་བའི་ནང་། ཧྲང་ཧེ་གྲོང་ཁྱེར་དུ་ཏོག་དབྱིབས་ནད་དུག་གསུམ་པའི་(Omicron) རྐྱེན་གྱིས་ཡུལ་མི་༣ འདས་གྲོངས་སུ་ཕྱིན་ཡོད་པ་དང་། འདས་གྲོངས་སུ་ཕྱིན་པའི་ཡུལ་མི་དེ་དག་ལ་ཏོག་དབྱིབས་སྔོན་འགོག་སྨན་ཁབ་བརྒྱབ་མེད་པ་མ་ཟད། དུས་རྒྱུན་ལུས་ལ་ན་ཚ་ཡོད་མཁན་གྱི་ལོ་ན་འགྲེས་པའི་རྒན་ཁོག་རང་ལོ་༨༩ ནས་༩༡ བར་ཡིན་པ་རྒྱ་ནག་གཞུང་འབྲེལ་ལས་བྱེད་པས་བརྗོད་ཡོད་འདུག

དེ་བཞིན་བྷི་བྷི་སིའི་ཧྲང་ཧེ་ས་གནས་འབྲེལ་མཐུད་པ་རོ་བྷེན་(Robin Brant) གྱིས་བརྗོད་དོན་ལ། ད་ལྟ་རྒྱ་ནག་གི་གྲོང་ཁྱེར་ཧྲང་ཧེ་ནང་དུ་ཏོག་ནད་ཕོག་པའི་ནད་པ་ཉིན་རེ་བཞིན་ཇེ་མང་དུ་འགྲོ་བཞིན་ཡོད་པ་མ་ཟད། ཧྲང་ཧེ་གྲོང་ཁྱེར་གྱི་སྨན་ཁང་གཅིག་གི་ནང་དུ་ལོ་ན་འགྲེས་པའི་རྒན་ཁོག་མང་པོ་ཞིག་འདས་གྲོངས་སུ་ཕྱིན་ཡོད་ནའང་། རྒྱ་ནག་གི་གཞུང་འབྲེལ་ལས་བྱེད་པས་འདས་གྲོངས་སུ་སོང་བའི་རྒན་ཁོག་དེ་དག་ཏོག་དབྱིབས་ནད་དུག་རྐྱེན་གྱིས་འདས་གྲོངས་སུ་ཕྱིན་མེད་ལུགས་དང་། ཁོང་ཚོ་ནི་དུས་རྒྱུན་ནད་མནར་དབང་གིས་འདས་གྲོངས་སུ་ཕྱིན་པའི་འགྲེལ་བརྗོད་བྱེད་བཞིན་ཡོད་ལ།  ལོ་ན་འགྲེས་པའི་རྒན་ཁོག་མང་པོ་ཞིག་ལ་ཏོག་དབྱིབས་ནད་དུག་གི་བརྟག་དཔྱད་བརྒྱུད་ནས་ནད་དུག་ཕོག་པའི་རྒན་ཁོག་མང་པོ་ཞིག་དུས་ཐོག་སྨན་བཅོས་མ་བྱུང་བར་ལ་བརྟེན། འདས་གྲོངས་སུ་འགྲོ་བཞིན་ཡོད་ཀྱང་། དེ་ལ་རྒྱ་ནག་གིས་ངོས་ལེན་བྱས་མེད། དེ་རིང་འདས་གྲོངས་སུ་སོང་བའི་ལོ་ན་འགྲེས་པོ་དེ་དག་ཀྱང་གོང་གི་རྒྱུ་རྐྱེན་དེ་ལ་བརྟེན་ནས་འདས་གྲོངས་སུ་ཕྱིན་པ་ཁ་གསལ་རེད་ཅེས་གསུངས་འདུག

དེ་སྔོན་ཕྱི་ཟླ་ ༣ པའི་ནང་དུ་རྒྱ་ནག་གི་དཔལ་འབྱོར་ཚོང་ར་ཆེ་ཤོས་དང་མི་འབོར་མང་ཤོས་ཀྱི་གྲོང་ཁྱེར་ཧྲང་ཧེ་ལ་ཏོག་དབྱིབས་ནད་དུག་གསུམ་པ་(Omicron)ཕོག་པའི་ནད་པ་ཉིན་རེ་བཞིན་ཁྱབ་གདལ་སོང་བའི་རྐྱེན་གྱིས་གྲོང་ཁྱེར་ཡོངས་སྒོ་རྒྱ་བསྡམས་ཡོད་པ་དང་། སྐབས་དེར་ནད་དུག་གི་རྐྱེན་གྱིས་ནད་པ་འདས་གྲོངས་སུ་སོང་བ་གཅིག་ཀྱང་བྱུང་མེད་ལུགས་རྒྱ་ནག་གཞུང་འབྲེལ་ལས་བྱེད་པས་བརྗོད་ཡོད་ཀྱང་། བར་ལམ་རྒྱལ་སྤྱིའི་སྤྱི་ཚོགས་དྲ་རྒྱའི་ཐོག་རྒྱ་ནག་གྲོང་ཁྱེར་ཧྲང་ཧེ་རུ་གནས་སྡོད་བྱེད་པའི་མི་མང་གིས་སྲིད་གཞུང་གི་བྱ་སྤྱོད་ལ་ངོ་རྒོལ་བྱེད་བཞིན་པའི་དྲ་བརྙན་མང་དག་ཅིག་སྤྱི་ཚོགས་དྲ་ལམ་ཐོག་ཐོན་ཡོད་པ་མ་ཟད། དྲ་བརྙན་དེ་དག་གི་ནང་དུ་ཧྲང་ཧེ་ཐོག་བརྩེགས་ཁང་ཆེན་མང་པོ་ཞིག་གི་ནང་ནས་མི་མང་གིས་ངུ་སྐད་བསྒྲགས་ནས། ང་ཚོར་ཟ་ཆས་དགོས། ང་ཚོ་ལྟོགས་ཤི་ཐེབས་ས་རེད། ང་ཚོ་ཕྱི་ལ་ཐོན་དགོས་སོགས་བརྗོད་པའི་འབོད་ཚིག་བསྒྲགས་བཞིན་ཡོད་པ་མཐོང་རྒྱུ་འདུག་ལ། བརྙན་ཁ་ཤས་ཀྱི་ནང་དུ་རྒྱ་ནག་གི་གོ་སྒྲིག་བྱེད་པའི་འགོག་དབྱེ་ཟུར་འཇོག་ཁང་དུ་ནད་པ་མང་པོ་མཉམ་དུ་སྡོད་དགོས་ཡོད་པ་མ་ཟད། ཛ་དྲག་ཅན་གྱི་ནད་པ་ལ་ལྟ་རྟོགས་བྱེད་མཁན་གྱི་སྨན་པ་དང་སྨན་ཞབས་གང་ཡང་མཐོང་རྒྱུ་མེད་འདུག ཐ་ན་ནད་པར་དགོས་མཁོ་ཆེ་བའི་ཉལ་ཁྲི་དང་། གསང་སྤྱོད། ཟ་ཆས་སོགས་ཀྱི་མཐུན་རྐྱེན་གང་ཡང་མེད་པའི་དྲ་བརྙན་མང་དག་ཅིག་སྤྱི་ཚོགས་དྲ་ལམ་ཐོག་ཁྱབ་བཞིན་འདུག

དེ་ཡང་ཕྱི་ལོ་༢༠༡༩ ལོར་རྒྱ་ནག་ནས་ཁྱབ་གདལ་བྱུང་བའི་ཏོག་དབྱིབས་ནད་དུག་དེ་འཛམ་གླིང་ཡུལ་གྲུ་གང་སར་ཁྱབ་ནས་མི་ས་ཡ་མང་པོའི་ཚེ་སྲོག་ཤོར་ཡོད་ནའང་། དེང་སྐབས་འཛམ་གླིང་ཡུལ་གྲུ་ཁག་ཏུ་ཏོག་དབྱིབས་ནད་དུག་བཀག་སྡོམ་ལྷོད་ཡངས་སུ་གཏོང་བཞིན་ཡོད་ཀྱང་། རྒྱ་ནག་ལ་དེ་ལས་ལྡོག་དེ་ཏོག་དབྱིབས་ནད་དུག་ཕོག་པའི་ནད་པ་ཇེ་མང་དུ་འགྲོ་བཞིན་ཡོད་པ་རེད། གྲོང་ཁྱེར་ཧྲང་ཧེ་ལ་མཚོན་ན་ད་ལྟ་རྒྱ་ནག་ནང་དུ་ཏོག་ནད་ཁྱབ་གདལ་ཆེ་ཤོས་ཤིག་ཏུ་འགྱུར་ཡོད་འདུག་ལ། རྒྱ་ནག་གི་སྲིད་འཛིན་ཞི་ཅིང་ཕིན་གྱིས་རྒྱ་ནག་ནང་དུ་ཏོག་དབྱིབས་ནད་པ་གཅིག་ཀྱང་མེད་པ་བཟོ་རྒྱུའི་སྲིད་ཇུས་ལག་ལྟར་བྱ་རྒྱུ་ཡིན་ལུགས་བསྒྲགས་པའི་རྗེས། ཏོག་ནད་ཕོག་པའི་ནད་པ་ཉིན་རེ་བཞིན་རྒྱ་ནག་ནང་དུ་ཇེ་མང་དུ་འགྲོ་བཞིན་ཡོད་པའི་སྲིད་ཇུས་ལམ་ལྷོངས་ཡོང་རྒྱུ་ཤིན་ཏུ་ནས་དཀའ་ཚེགས་ཅན་ཞིག་ཏུ་འགྱུར་བཞིན་ཡོད་འདུག

གསར་འགོད་པ་བསྟན་འཛིན་ཆོས་གྲགས།