ཨ་དཀོན་རིན་པོ་ཆེའི་བཀྲོངས་རྐྱེན་སྐོར་ཁྲིན་ཏུའུ་རུ་ཁྲིམས་ར་འཚོགས།

ལོ་སྔོན་མའི་ནང་དབྱིན་ཡུལ་དུ་གནས་ཞུགས་བོད་ཀྱི་བླ་ཆེན་ཨ་དཀོན་རིན་པོ་ཆེ་རྒྱ་ནག་གི་གྲོང་ཁྱེར་ཁྲིན་ཏུའུ་རུ་སྐུ་བཀྲོངས་པའི་གྱོད་དོན་སྐོར། རེས་གཟའ་ལྷག་པའི་ཉིན་ཁྲིན་ཏུའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་ཁྲིམས་ར་འཚོགས་ཡོད་པ་དང་། དོགས་གཞིའི་ཉེས་ཅན་པ་ནི་དེ་སྔོན་ཨ་དཀོན་རིན་པོ་ཆེའི་དབྱིན་ཡུལ་གྱི་དགོན་པའི་ནང་ལྷ་རྟེན་བཞེངས་མཁན་གྱི་བོད་མི་ཞིག་ཡིན་འདུག

ནུབ་ཕྱོགས་ཡུ་རོབ་རྒྱལ་ཁབ་ཏུ་བོད་བརྒྱུད་ནང་བསྟན་གྱི་དགོན་པ་ཐོག་མར་གསར་འཛུགས་བྱེད་མཁན་ཨ་དཀོན་རིན་པོ་ཆེ་མཆོག་ནི་དབྱིན་ཡུལ་དུ་བརྩི་བཀུར་ཞུ་ཡུལ་ཞིག་དང་། ལྷག་པར་དུ་ཁོང་གིས་ཕྱག་བཏབ་པའི་བསམ་ཡས་གླིང་ནི་སི་ཀོ་ལན་ཌི(Scotland) ཡི་ནང་གི་ཆོས་ལུགས་ཀྱི་བསྟི་གནས་གལ་ཆེ་ཤོས་ཤིག་ཡིན་པ་མ་ཟད། ཡུ་རོབ་ཏུ་ཡོད་པའི་ནང་པའི་དགོན་པ་དང་རྙིང་ཤོས་ཀྱང་ཡིན་པ་རེད། ལོ་སྔོན་མའི་ཕྱི་ཟླ་༡༠ པའི་ཚེས་༨ ཉིན་ཨ་དཀོན་རིན་པོ་ཆེ་བོད་དུ་རོགས་ཕན་ཆེད་ཕེབས་སྐབས་རྒྱ་ནག་གི་གྲོང་ཁྱེར་ཁྲིན་ཏུའུ་རུ་སྐུ་བཀྲོངས་ཏེ། བོད་ཙམ་མ་ཟད་དབྱིན་ཡུལ་དང་སི་ཀོ་ལན་ཌིའི་ནང་དུའང་ཤིན་ཏུ་ཧང་སང་དགོས་པའི་གནད་དོན་ཞིག་ཏུ་གྱུར་པ་རེད།

ཁ་སང་ཕྱི་ཚེས་༢༨ ཉིན་དབྱིན་ཡུལ་གྱི་<<ལྟ་སྲུང་གསར་ཤོག་>> དང་<<ཉིན་རེའི་བརྡ་འཕྲིན་གསར་ཤོག་>> ནང་ཨ་དཀོན་རིན་པོ་ཆེའི་བཀྲོངས་རྐྱེན་གྱི་ཁྲིམས་རའི་སྐོར་གྱི་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་༢༨ རེས་གཟའ་ལྷག་པའི་ཉིན་ཁྲིན་ཏུའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་དུ་ཁྲིམས་བཤེར་འགོ་འཛུགས་བྱས་ཡོད་པ་དང་། དོགས་གཞིའི་ཉེས་ཅན་མི་སྣ་གཉིས་ཡོད་པའི་ནང་གི་གཅིག་ནི་ལོ་ལྔའི་སྔོན་དབྱིན་ཡུལ་དུ་སོང་སྟེ། ཨ་དཀོན་རིན་པོ་ཆེའི་དབྱིན་ཡུལ་དང་སི་ཀོ་ཐི་ལན་ཌིའི་དགོན་པའི་ནང་ལྷ་སྐུ་བཞེངས་མཁན་གྱི་བོད་མི་ཞིག་ཡིན་པ་རེད།

ཁྲིམས་རའི་ཚོགས་ཐོག་ཏུ་དོགས་གཞིའི་ཉེས་ཅན་མི་སྣ་གཉིས་ཀྱིས་ཨ་དཀོན་རིན་པོ་ཆེ་སྐུ་བཀྲོངས་པའི་ཉེས་འཛུགས་ཁས་ལེན་བྱས་ཡོད་ཀྱང་། ཨ་དཀོན་རིན་པོ་ཆེས་ཁོང་གཉིས་ལ་ད་དུང་རྒྱ་སྒོར་ཁྲི་༢༧༠ (དབྱིན་སྒོར་༢༦༥༠༠༠) ཙམ་གྱི་ལྷ་སྐུ་བཞེངས་པའི་གླ་རིན་གྱི་བུ་ལོན་སྤྲད་མེད་སྐོར་བརྗོད་ཡོད་པ་དང་། ཁྲིམས་རའི་བརྒྱུད་རིམ་ཆ་ཚང་ལ་ཟུར་ཉན་བྱེད་མཁན་གྱི་བསམ་ཡས་གླིང་དགོན་པའི་སྐུ་ཚབ་ཀྱིས་ཡིག་ཆའི་བདེན་དཔང་མཁོ་སྤྲོད་བྱས་པའི་ནང་། རྟེན་བཞེངས་དོགས་གཞིའི་ཉེས་ཅན་མི་སྣས་སྐབས་དེར་“གླ་མེད་དང་བླངས་ཞབས་ཞུ་”ལ་འདོད་པ་ཡོད་པའི་མཚན་རྟགས་བཀོད་ཡོད་པ་རེད། རྟེན་བཞེངས་མཁན་དེས་དབྱིན་ཡུལ་དུ་ལོ་ལྔའི་རིང་ལས་ཀ་བྱེད་པའི་སྐབས་སྡོད་གནས་དང་ཁ་ལག་ཆ་ཚང་བསམ་ཡས་གླིང་གིས་གོ་སྒྲིག་བྱས་ཡོད་པ་དང་། དེ་སྔོན་བསམ་ཡས་གླིང་དུ་ཁོང་དུ་མཉམ་དུ་བསྡད་མྱོང་མཁན་གྱི་གྲྭ་པ་ཚོས་ཁོང་གིས་ལས་ཀ་དེ་ལྟར་བྱས་པ་ནི་ཡིད་ཆེས་བྱས་མི་ཐུབ་པ་ཞིག་ཏུ་གྱུར་ཡོད་འདུག

དེ་བཞིན་དབྱིན་ཡུལ་གྱི་<<ལྟ་སྲུང་གསར་ཤོག་>> སྟེང་ཁྲིན་ཏུའུ་རུ་ཆེད་དུ་སླེབས་པའི་བྷེལ་རྗམ་(Belgium) ནང་བསྟན་མཐུན་ཚོགས་ཀྱི་ཚོགས་གཙོ་དང་བྷར་ཟིལ་(Brussels) གྲོང་ཁྱེར་གྱི་སྤྱི་ཁྱབ་གཞོན་པ་ཀར་ལོ་ལུའུ་ཁེ་སི་ (Carlo Luyckx) ཡི་སྐད་ཆ་ལུང་འདྲེན་བྱས་པ་ལྟར་ན། ཨ་དཀོན་རིན་པོ་ཆེའི་གཅེན་པོ་བླ་མ་ཡེ་ཤེས་དང་༧དཔལ་རྒྱལ་དབང་ཀརྨ་པ་རིན་པོ་ཆེ་མཆོག་རྣམ་གཉིས་ཀྱིས་ཉེས་ཅན་པར་སྲོག་ཁྲིམས་མི་གཅོད་པའི་རེ་བ་ཞུས་ཡོད་འདུག་པ་དང་། ཨ་དཀོན་རིན་པོ་ཆེའི་སྒེར་གྱི་སྐུ་འཁོར་ཞིག་གིས་བརྗོད་པ་ལྟར་ན། ཁོང་ཚོ་ནི་བྱམས་སྙིང་རྗེ་དང་བཟོད་བསྲན་སོགས་ལ་ཡིད་ཆེས་བྱེད་མཁན་ཞིག་ཡིན་པའི་ངོས་ནས། མི་གཅིག་གྲོངས་པར་བརྟེན་ནས་མི་གཞན་ཞིག་གི་ཚེ་སྲོག་འཕྲོག་པ་ནི་མ་རུང་བ་རེད་ཅེས་དང་། ལྷ་རྟེན་བཞེངས་མཁན་དེས་དབྱིན་ཡུལ་དུ་ལས་ཀ་བྱེད་པའི་སྐབས་དངུལ་དགོས་པའི་སྐད་ཆ་རྩར་ནས་བཤད་མྱོང་མེད་པ་མ་ཟད། དབྱིན་ཡུལ་ནས་ཁ་བྲལ་སྐབས་ཀྱང་ཕུན་ཚུན་དབར་མི་མཐུན་པ་གཅིག་ཀྱང་མེད་སྐོར་བརྗོད་འདུག

ཨ་དཀོན་རིན་པོ་ཆེ་མཆོག་ནི་བོད་ཀྱི་དགོན་སྡེ་དང་སློབ་གྲྭ། སྨན་ཁང་། རྒན་གསོ་ཁང་། དྭ་ཕྲུག་སློབ་གྲྭ་བཅས་ལ་རོགས་ཕན་རྒྱ་ཆེར་གནང་མཁན་གྱི་སྤྱི་ཚོགས་ཞབས་ཞུ་བ་ཆེན་མོ་ཞིག་ཡིན་པ་མ་ཟད། རིན་པོ་ཆེས་ལོ་མང་རིང་དབྱིན་ཡུལ་གཙོས་པའི་འཛམ་གླིང་ས་ཕྱོགས་གང་སར་བོད་ཀྱི་རིག་གནས་ཁྱབ་སྤེལ་བྱས་ཡོད་པ་དང་། ཁོང་གིས་ལོ་རེའི་ལོ་ཕྱེད་ཙམ་ལ་ཕྱི་རྒྱལ་ནས་མ་དངུལ་འདུ་འགོད་བྱས་ཏེ། དེ་མིན་དུས་ཚོད་ནང་སྐུ་ངལ་ལ་མ་འཛེམས་པར་སྐུ་དངོས་བོད་ཀྱི་ས་ཕྱོགས་གང་སར་ཕེབས་ཏེ་བོད་མི་ཉམས་ཐག་རྣམས་ལ་རོགས་རམ་བྱས་ཤིང་། སློབ་གྲྭ་བརྒྱ་གྲངས་ཤིག་གསར་འཛུགས་དང་དྭ་ཕྲུག་ཁྲི་ལྷག་བརྒལ་བར་རོགས་སྐྱོར་བྱས་ཡོད་པ་རེད། ཕྱི་ལོ་༢༠༡༣ ཟླ་༡༠ ཚེས་༨ ཉིན་ཨ་དཀོན་རིན་པོ་ཆེ་ཁྲིན་ཏུའུ་རུ་སྐུ་གཤེགས་པའི་གནས་ཚུལ་ཕྱིར་གྱར་བ་ནས་བཟུང་། བོད་ནང་གི་ས་ཕྱོགས་གང་སར་ཡོད་པའི་དགོན་སྡེ་ཁག་དང་། ཁོང་གིས་རོགས་སྐྱོར་བྱེད་སའི་སློབ་གྲྭ་ཁག དེ་བཞིན་ཚོགས་སྡེ་དང་ལས་ཁུངས་སོགས་མང་པོ་ཞིག་གི་ནང་དུ་གདུང་སེམས་མཉམ་བསྐྱེད་དང་མྱ་ངན་གུས་འདུད་ཀྱི་མཆོད་འབུལ་སྨོན་ལམ་རྒྱ་ཆེར་བྱས་ཡོད་པ་རེད།།