ཨ་རི་གཉིད་ལས་སད་དེ་རྒྱ་ནག་དམར་ཤོག་ཚོགས་པ་ཅི་འདྲའི་སྡང་སེམས་ཆེ་བ་རྟོགས་ཡོད། 

ཨ་རིའི་ཕྱི་སྲིད་དྲུང་ཆེ་མཱ་ཁི-ཕོམ་ཕོའོ་(Mike Pompeo) ཡིས་ཨ་རིས་ད་ལྟ་གཞི་ནས་རྒྱ་ནག་དམར་ཤོག་ཚོགས་པས་ཨ་རི་དང་ནུབ་ཕྱོགས་ཀྱི་རིན་ཐང་ལྟ་ཚུལ་ལ་ཅི་འདྲའི་སྡང་སེམས་དྲག་པོ་འཆང་གི་ཡོད་པ་རྟོགས་ཡོད་སྟབས། དེ་ལ་ཕྱོགས་སྣ་ཚོགས་ནས་དངོས་སུ་ཁ་གཏད་གཅོག་རྒྱུ་ཡིན་སྐོར་བརྗོད་འདུག 

དེ་ཡང་ཟླ་འདིའི་ཚེས་༣༡ ཉིན་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཨ་རིའི་ཧ་ཌི་སན་ཉམས་ཞིབ་ཁང་(Hudson Institute) ནས་གྲོང་ཁྱེར་ནིའུ་ཡོག་ཏུ་གོ་སྒྲིག་བྱས་པའི་དགོང་མོའི་གསོལ་ཚིགས་དང་། གཟེངས་རྟགས་འབུལ་བཞེས་ཀྱི་མཛད་སྒོ་ཞིག་གི་ཐོག ཨ་རིའི་ཕྱི་སྲིད་དྲུང་ཆེ་མཱ་ཁི-ཕོམ་ཕོའོ་(Mike Pompeo) ཡིས་ཨ་རྒྱའི་འབྲེལ་བ་དང་དཀའ་རྙོག་གི་ཐད་ལ་གཏམ་བཤད་ཟབ་རྒྱས་ཤིག་སྤེལ་པའི་ནང་། ཨ་རིས་རྒྱ་ནག་རང་དབང་དང་མང་གཙོ་ལྡན་པའི་རྒྱལ་ཁབ་ཅིག་ཏུ་འགྱུར་བའི་རེ་བའི་བཅངས་ནས་རྒྱ་ནག་འཕེལ་རྒྱས་འགྲོ་བར་རོགས་རམ་བྱས་ཀྱང་། རྒྱ་ནག་གིས་ཨ་རིའི་ལྷག་བསམ་དེར་གོ་བ་ལྡོག་ཕྱོགས་ནས་བླངས་ཏེ་ཁེ་བཟང་འབའ་ཞིག་བླངས་པས། ད་ལྟ་ཨ་རིས་དངོས་སུ་རྒྱ་ནག་དམར་ཤོག་ཚོགས་པས་ཨ་རི་དང་ནུབ་ཕྱོགས་ཀྱི་རིིན་ཐང་ལྟ་ཚུལ་ལ་སྡང་སེམས་དྲག་པོ་འཆང་བཞིན་པའི་དངོས་ཡོད་གནས་ཚུལ་དེར་ཁ་གཏད་གཅོག་རྒྱུ་ཡིན་སྐོར་བརྗོད་ཡོད་འདུག 

ཕྱི་སྲིད་དྲུང་ཆེས་ཨ་རིའི་ངོས་ནས་ད་ལྟ་བར་རྒྱ་ནག་འགྱུར་བ་འགྲོ་བའི་རེ་བ་བཟུང་སྟེ་རྒྱ་ནག་གི་ནག་ཉེས་མང་པོ་ཞིག་(གནམ་སྡེ་སྒོ་མོའི་སྡེབ་གསོད་ལྟ་བུ)ལ་སྣང་མེད་དང་བཟོད་བསྲན་བྱས་ཀྱང་། “ང་ཚོས་ད་ལྟ་གཞི་ནས་རྒྱ་ནག་དམར་ཤོག་ཚོགས་པས་ཨ་རི་དང་ཨ་རིའི་རིན་ཐང་ལྟ་ཚུལ་ལ་ཅི་འདྲའི་སྡང་སེམས་དྲག་པོ་འཆང་གི་ཡོད་པ་རྟོགས་སོང་”ཞེས་བཤད་ཡོད་འདུག 

གཞན་ཡང་ཁོང་གིས་རྒྱ་ནག་གིས་ཧོང་ཀོང་ལ་དྲག་གནོན་བྱེད་ཐབས་དང་། ཤིན་ཅང་དུ་ཡུ་གུར་བ་རྣམས་བཙོན་འཇུག་བཀག་ཉར། ད་རུང་འཛམ་གླིང་ཧྲིལ་པོ་དབང་དུ་བསྡུ་བའི་འབད་བརྩོན་བྱེད་བཞིན་པར་སྐྱོན་བརྗོད་བྱས་ཏེ། དམར་ཤོག་གི་འགོ་ཁྲིད་ཚོ་ནི་དངོས་ཐོག་བདེན་འཚོལ་བྱེད་མཁན་ཡིན་པར་བརྗོན་མཁན་རྣམས་ནོར་བ་ཡིན་སྐོར་བཤད་འདུག 

དེའི་ཐད་ལ་ཁོང་གིས་“རྒྱ་ནག་དམར་ཤོག་ཚོགས་པས་རྒྱ་ནག་མི་མང་དང་། འཛམ་གླིང་ཁྱོན་ལ་སྲིད་གཞུང་གི་སྒྲོམ་གཞི་ཡོངས་སུ་མི་འདྲ་བ་ཞིག་སྟོན་གྱི་ཡོད། སྒྲོམ་གཞི་དེའི་མི་མང་ཚང་མས་དམར་ཤོག་མཐོ་རིམ་མི་སྣ་ཚོའི་བཀའ་ལྟར་བསམ་བློ་གཏོང་བ་དང་སྤྱོད་པ་འཁུར་དགོས་”ཞེས་བཤད་མ་ཟད། “དེ་ནི་ངས་འདོད་པའི་མ་འོངས་པ་ཞིག་མིན་ལ། དེ་བཞིན་རང་དབང་ལ་དགའ་བའི་རྒྱ་ནག་མི་མང་གིས་འདོད་པའི་མ་འོངས་པ་ཞིག་ཀྱང་མ་རེད་”ཅེས་བཤད་འདུག 

ད་ལྟ་ཨ་རྒྱ་གཉིས་ཀྱིས་ཚོང་གི་གྲོས་མཐུན་ཞིག་འཇོག་པའི་འབད་བརྩོན་བྱེད་པའི་སྐབས་མོད། འོན་ཀྱང་ཁོང་གིས་འདི་ལྟར་དངོས་སུ་རྒྱ་ནག་ལ་ཁ་གཏད་གཅོག་རྒྱུ་ཡིན་སྐོར་བཤད་འདུག་ལ། དེ་བཞིན་བདུན་ཕྲག་གོང་མར་ཨ་རིའི་སྲིད་འཛིན་གཞོན་པ་མཱ་ཁི-ཕན་སི་(Mike Pence) ཡིས་ཀྱང་རྒྱ་ནག་ལ་སྐྱོན་བརྗོད་དྲག་པོ་བྱས་ཏེ་རྒྱ་ནག་དངོས་སུ་ཨ་རིའི་ཁ་གཏད་ཡིན་པའི་ཁྱབ་བསྒྲགས་བྱས་ཡོད་འདུག ། 

གསར་འགོད་པ་དཀོན་མཆོག་རབ་བརྟན།