ཨ་རི་སྲིད་འཛིན་བྷ་ཌན་སླར་ཡང་སྲིད་འཛིན་གྱི་འོས་མི་རུ་མཉམ་ཞུགས་བྱེད་ཐུབ་བམ།
ཟླ་འདིའི་ཚེས་༡༢ཉིན་CNNགསར་ཁང་གིས་གནས་ཚུལ་སྤེལ་གསལ་ལྟར་ན། སྤྱི་ལོ་༢༠༢༤ལོ་ཨ་རི་སྲིད་འཛིན་གྱི་འོས་བསྡུ་བསླེབ་ཀྱི་ཡོད་པ་དང་། ད་ལྟའི་སྲིད་འཛིན་བྷ་ཌན་གྱི་ལོ་ཚད་དང་ལས་དོན་བྱེད་ཕྱོགས་ལ་གཞིགས་ན་ཨ་རི་མང་གཙོ་ཚོགས་པའི་མི་མང་དུ་མས་ཁོང་ཉིད་བསྐྱར་དུ་སྲིད་འཛིན་གྱི་འོས་བསྡུའི་ནང་དུ་མཉམ་ཞུགས་བྱེད་རྒྱུ་ལ་འདོད་པ་མེད་རབས་ཀྱི་གནས་ཚུལ་སྤེལ་འདུག
ཨ་རི་སྲིད་འཛིན་བྷ་ཌན་ནི་དགུང་ལོ་༧༩་ཟིན་ཡོད་པ་དང་ཨ་རིའི་ལོ་རྒྱུས་ཀྱི་ཁྲོད་དུ་སྲིད་འཛིན་དགུང་ལོ་བགྲེས་ཤོས་དེ་ཆགས་ཡོད་འདུག གལ་སྲིད་ཁོང་ཉིད་སྤྱི་ལོ་༢༠༢༤ལོ་སྲིད་འཛིན་དུ་འདེམས་ཐོན་བྱུང་བ་ཡིན་ན། ཁོང་ཉིད་དགུང་ལོ་༨༦ བར་སྲིད་འཛིན་གྱི་ཕྱག་ལས་གནང་དགོས་ཀྱི་ཡོད་འདུག
ཉེ་ཆར་ནེའུ་ཡོག་དུས་བབ་ཀྱིས་བསམ་ཤོག་བསྡུ་ལེན་གྱི་སྙན་ཐོ་ཞིག་བཏོན་ཡོད་པ་དང་བསམ་ཤོག་བསྡུ་ལེན་གྱི་སྙན་ཐོ་དེའི་ནང་དུ་ཨ་རི་མང་གཙོ་ཚོགས་པའི་འོས་ཤོག་འཕེན་མཁན་མི་མང་བརྒྱ་ཆ་༦༤%ཡིས་ཐེངས་རྗེས་མའི་སྲིད་འཛིན་གྱི་འོས་བསྡུའི་ཁྲོད་དུ་མང་གཙོ་ཚོགས་པའི་འོས་མི་སྲིད་འཛིན་བྷ་ཌན་ལས་གཞན་ཞིག་དགོས་ཀྱི་ཡོད་པའི་བསམ་ཚུལ་བརྗོད་ཡོད་འདུག་ལ། འོས་ཤོག་འཕེན་མཁན་མང་ཆེ་བས་ད་ལྟའི་སྲིད་འཛིན་ཁོང་ཉིད་ནི་དགུང་ལོ་མཐོོ་དྲགས་པས་སྟོང་ལོ་ཉེར་བཞི་ལོའི་སྲིད་འཛིན་གྱི་འོས་མི་ལ་མི་རུང་བའི་སྐོར་བཤད་ཡོད་ལ། འོས་ཤོག་འཕེན་མཁན་ཉུང་ཤས་ཤིག་གིས་ཁོང་ཉིད་ཀྱི་ད་ལྟའི་ལས་དོན་བྱེད་ཕྱོགས་ཐོག་འདོད་བློ་མ་ཁེངས་པས་ཐེངས་རྗེས་མའི་སྲིད་འཛིན་གྱི་འོས་མི་ལ་འདོད་པ་མེད་རབས་བརྗོད་ཡོད་འདུག
གལ་སྲིད་ད་ལྟའི་སྲིད་འཛིན་བྷ་ཌན་མཆོག་ཐེངས་རྗེས་མའི་སྲིད་འཛིན་འོས་མི་ལས་ཕྱིར་འཐེན་བྱས་པ་ཡིན་ན་ཁོང་གི་ཚབ་ཏུ་དགུང་ལོ་༥༧ ལ་སོན་པའི་ད་ལྟའི་སྲིད་འཛིན་གཞོན་པ་ཀརྨ་ལ་(Kamala Harris)་སོགས་བསླེབས་སྲིད་པའི་གནས་ཚུལ་ཐོན་འདུག
ཨ་རིའི་སྲིད་འཛིན་ཟུར་པ་ཊོམ་གྱིས་དགུང་ལོ་བརྒྱད་ཅུ་དང་དགུ་བཅུ་ལ་སོན་མཁན་གྱི་འགྲེས་པོ་མང་པོ་ཡོད་པ་དང་ཁོང་ཚོ་ནི་ལུས་གཟུགས་བདེ་ཞིང་བློ་རིག་བསལ་བ་བཅས་ཡིན་མོད་ཀྱང་། སྲིད་འཛིན་བྷ་ཌན་ནི་དེ་ལྟར་མིན་རབས་བརྗོད་ཡོད་འདུག་ལ། དེ་བཞིན་ཨ་རི་སྤྱི་མཐུན་ཚོགས་པས་ད་ལྟའི་སྲིད་འཛིན་ལ་དྲན་ཤེས་འཕྱོ་བའི་ན་ཚ་(Dementia)ཡོད་རབས་ཀྱི་སྐྱོན་བརྗོད་བྱེད་ཀྱི་ཡོད་འདུག
ཨ་རིའི་རྩ་ཁྲིམས་ཀྱི་ནང་དུ་དགུང་ལོ་སུམ་ཅུ་སོ་ལྔ་ལ་སོན་མཁན་ཞིག་ཡིན་ན་སྲིད་འཛིན་གྱི་འོས་མི་ལ་ལངས་ཆོག་པ་ལས་དེ་མིན་དགུང་ལོ་མཐོ་ལོད་ཀྱི་ཐོག་ལ་གསལ་བོ་མེད་པ་རེད་འདུག་ལ། ད་ལྟའི་སྲིད་འཛིན་གྱི་དགུང་ལོ་འགྲེས་པོ་དང་ལུས་སེམས་ཀྱི་གནད་དོན་ནི་གླེང་འདོད་མེད་ཀྱང་གླེང་དགོས་པའི་གནས་དོན་ཞིག་ཏུ་གྱུར་ཡོད་པའི་གནས་ཚུལ་ཐོན་འདུག །
གསར་འགོད་པ་བློ་བཟང་རྒྱ་མཚོ།
