ཨ་རིའི་གཞུང་འབྲེལ་མི་སྣ་གཅིག་ཀྱང་པེ་ཅིང་ཨོ་ལིམ་ཕིག་རྩེད་འགྲན་ལ་མཉམ་ཞུགས་མི་བྱེད་རྒྱུའི་ཐག་གཅོད། 

ཨ་རིས་དངོས་སུ་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་(diplomatic boycott of Beijing Olympics) བྱེད་རྒྱུ་ཡིན་པའི་གསལ་བསྒྲགས་སྤེལ་རྗེས། མང་གཙོའི་སྟོབས་ཆེན་རྒྱལ་ཁབ་གཞན་རྣམས་ཀྱང་ཨ་རིའི་རྗེས་སུ་འབྲང་བའི་གོ་སྐབས་ཆེན་པོ་ཡོད་འདུག

ཟླ་འདིའི་ཨ་རིའི་ཚེས་༦ ཉིན་ཨ་རིའི་བྷ་ཌན་སྲིད་གཞུང་གིས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་ངོ་རྒོལ་བྱེད་པའི་ཆེད་དུ་ཨ་རིའི་གཞུང་འབྲེལ་མི་སྣ་གཅིག་ཀྱང་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོར་གཏོང་རྒྱུ་མིན་པའི་གསལ་བསྒྲགས་སྤེལ་འདུག་ཅིང་། དེ་ལ་བརྟེན་ནས་འཛམ་གླིང་གི་སྟོབས་ཆེན་རྒྱལ་ཁབ་ཨང་དང་པོ་དང་གཉིས་པར་བརྩི་བ་གཉིས་ཀྱི་བར་དུ་འགལ་ཟླ་མུ་མཐུད་ཤུགས་ཆེ་རུ་འགྱུར་ཡོད་འདུག 

ཨ་རིའི་གཞུང་འབྲེལ་གསལ་བསྒྲགས་དེའི་ནང་། ཕོ་བྲང་དཀར་པོའི་གསར་འགོད་དྲུང་ཆེ་ཇན-སཱ་ཁི་(Jen Psaki) ཡིས་“རྒྱ་ནག་གཞུང་གིས་ཤིང་ཅང་དུ་གདུག་རྩུབ་དྲག་པོ་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་སྐབས་སུ་ཨ་རིའི་གཞུང་འབྲེལ་མི་སྣ་ཚོས་རྩེད་འགྲན་འདི་དག་དུས་རྒྱུན་ལྟར་བརྩི་ཐབས་བྲལ་ཡོད་”ཅེས་བརྗོད་པའི་ཁར། “སྲིད་འཛིན་བྷ་ཌན་གྱིས་སྲིད་འཛིན་ཞི་ཅིན་ཕིང་ལ་གསུངས་པ་ལྟར་ན། འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱེད་རྒྱུ་དེ་ཨ་རིའི་རྫས་རྒྱུན་ནང་དུ་ཡོད་ཅིང་། ང་ཚོར་འགྲོ་བ་མིའི་ཐོབ་ཐང་སྲུང་སྐྱོབ་དང་ཁྱབ་སྤེལ་གཏོང་བའི་འོས་འགན་ཡོད་”ཅེས་བསྣན་ཡོད་འདུག  

ཨ་རིས་གཞུང་འབྲེལ་ཐོག་ནས་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་བཀག་སྡོམ་བྱེད་ཅེས་པའི་གོ་དོན་ནི། གཞུང་འབྲེལ་མི་སྣ་གཅིག་ཀྱང་གཞུང་འབྲེལ་ཐོག་ནས་པེ་ཅིང་ཨོ་ལིམ་ཕིག་རྩེད་འགྲན་ཆེན་མོའི་འགོ་འཛུགས་དང་མཇུག་བསྡུའི་མཛད་སྒོར་མངགས་གཏོང་མི་བྱེད་པ་དེ་ཡིན་འདུག་ཅིང་། དེ་ནི་གཙོ་བོ་རྒྱ་ནག་དང་འཛམ་གླིང་ལ་ཆབ་སྲིད་ཀྱི་བརྡ་ལན་སྤྲོད་ཆེད་ཙམ་ཡིན་འདུག་པས། ཨ་རིའི་རྩེད་འགྲན་པ་རྣམས་མུ་མཐུད་རྩེད་འགྲན་ཆེན་མོའི་ནང་དུ་མཉམ་ཞུགས་བྱེད་ཆོག་གི་ཡོད་འདུག 

༢༠༢༢ ལོའི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་དེ་ལོ་རྗེས་མའི་ཕྱི་ཟླ་༢ པའི་འགོ་སྟོད་དུ་རྒྱ་ནག་གི་རྒྱལ་ས་པེ་ཅིང་དུ་འཚོགས་གཏན་འཁེལ་ཡོད་ཅིང་། དེ་ནི་༢༠༠༨ ལོའི་དབྱར་ཁའི་ཨོ་ལིམ་ཕིག་རྩེད་འགྲན་ཆེན་མོའི་རྗེས་སུ་རྒྱ་ནག་ཏུ་འཚོགས་གཏན་འཁེལ་བའི་རྒྱལ་སྤྱིའི་རྩེད་མོའི་འགྲན་སྡུར་ཆེ་ཤོས་དེ་ཆགས་ཀྱི་ཡོད་འདུག

ཡིན་ན་ཡང་། ད་ལྟའི་ཆར་རྒྱ་ནག་དང་མང་གཙོའི་འཛམ་གླིང་གཉིས་ཀྱི་བར་དུ་འགལ་བ་ཇེ་དྲག་དང་ཇེ་མང་དུ་འགྱུར་བཞིན་ཡོད་པའི་ཐོག འཛམ་གླིང་གི་སྟོབས་ཆེན་རྒྱལ་ཁབ་ཨང་དང་པོ་ཨ་རིས་དངོས་སུ་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་བྱེད་རྒྱུ་ཡིན་པའི་གསལ་བསྒྲགས་སྤེལ་ཟིན་པས། དབྱིན་ཇི་དང་། ཨོ་སི་ཁྲུ་ལི་ཡ། ཁེ་ན་ཌ། ཉི་ཧོང་ལ་སོགས་པའི་མང་གཙོའི་རྒྱལ་ཁབ་རྣམས་ཀྱང་ཨ་རིའི་རྗེས་སུ་འབྲང་བའི་གོ་སྐབས་ཆེན་པོ་ཡོད་འདུག ། 

གསར་འགོད་པ་དཀོན་མཆོག་རབ་བརྟན།