ཨ་རིའི་གཞུང་ལ་དྲག་པོའི་གྱེན་ལངས་བརྒྱུད་སྐུལ་བྱེད་མཁན་དེ་སྲིད་འཛིན་ཟུར་པ་ཊོམ་ཡིན་སྐོར་བརྗོད་འདུག 

ལོ་སྔོན་མར་ཨ་རིའི་སྲིད་འཛིན་དང་གྲོས་ཚོགས་འོས་བསྡུ་རྗེས་སུ། སྐབས་དེའི་སྲིད་འཛིན་ཊོམ་གྱི་རྒྱབ་སྐྱོར་བ་མང་པོ་ཞིག་གིས། དབུས་གྲོས་ཚོགས་སུ་བཙན་འཛུལ་བྱས་ཏེ་དྲག་པོའི་གྱེན་ལངས་བྱས་པའི་གནད་དོན་དང་འབྲེལ་ནས། གྲོས་ཚོགས་ཀྱི་ཉན་ཞིབ་དང་པོའི་ཐོག་ཏུ་སྲིད་འཛིན་ཟུར་པ་ཌོ་ནལ་ཊོམ་གྱིས་དྲག་པོའི་གྱེན་ལངས་དེ་བརྒྱུད་སྐུལ་བྱས་ཡོད་སྐོར་བརྗོད་འདུག 

དེ་ཡང་ཟླ་༦ པའི་ཚེས་༡༠ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཨ་རིའི་གྲོས་ཚོགས་འོག་མ་ནང་དུ་ལོ་སྔོན་མའི་ཟླ་༡ པོའི་ཚེས་༦ ཉིན་སྲིད་འཛིན་ཟུར་པ་ཊོམ་གྱི་རྒྱབ་སྐྱོར་བས་དྲག་པོའི་གྱེན་ལངས་བྱས་པའི་གནད་དོན་ཐོག་ཉན་ཞིབ་དང་པོ་དེ་འཚོགས་འདུག་པ་དང་། གོ་སྒྲིག་བྱེད་མཁན་ནི་གནད་དོན་དེའི་ཐོག་རྟོག་ཞིབ་བྱེད་མཁན་གྲོས་ཚོགས་འོག་མའི་ཚོགས་ཆུང་ཞིག་རེད་འདུག 

ཉན་ཞིབ་སྐབས་སུ་ཚོགས་ཆུང་གི་ཚོགས་གཙོ་གཞོན་པ་སྤྱི་མཐུན་ཚོགས་པའི་གྲོས་ཚོགས་འཐུས་མི་ལྕམ་ལཱིཛ་ཆེ་ནཱི་ཡིས། ལོ་སྔོན་མའི་ཟླ་༡ པོའི་ཚེས་༦ ཉིན་ཨ་རིའི་གྲོས་ཚོགས་ཀྱིས་སྲིད་འཛིན་གྱི་འོས་བསྡུ་རྒྱལ་ཁ་དེ་རྗོ་བྷའེ་ཌན་ལ་ཐོབ་པར་ངོས་འཛིན་རྒྱབ་སྐྱོར་བྱེད་པའི་ཚོགས་འདུ་འཚོགས་ཀྱི་ཡོད་པ་དང་བསྟུན། སྐབས་དེའི་ལས་ཁུར་སྲིད་འཛིན་ཌོ་ནལ་ཊོམ་གྱིས་ཉིན་དེར་གྲོས་ཚོགས་ཁང་བརྩེགས་སུ་ངོ་རྒོལ་བྱེད་རྒྱུ་ཡིན་སྐོར་བརྗོད་ནས། རྒྱབ་སྐྱོར་བ་རྣམས་ཡོང་དགོས་པའི་སྐུལ་མ་བྱས་ཡོད་པ་དང་། ཁོང་གིས་དྲག་པོའི་གྱེན་ལངས་དེ་བརྒྱུད་སྐུལ་བྱས་ནས་རྗེས་སུ་སྟངས་འཛིན་བྱས་ཐུབ་མེད་སྐོར་བརྗོད་འདུག 

ཉན་ཞིབ་ཀྱི་སྐབས་སུ་སྲིད་འཛིན་ཟུར་པ་ཊོམ་གྱིས་བསྐོ་གཞག་བྱས་པའི་གཞུང་གི་སྤྱི་ཁྱབ་ཁྲིམས་རྩོད་པ་ཟུར་པ་ཝཱི་ལམ་བྷར་གྱིས། ཊོམ་གྱིས་ལོ་སྔོན་མའི་འོས་བསྡུའི་གྲུབ་དོན་དེ་རྫུན་བཟོ་བྱས་པ་ཡིན་སྐོར་བརྗོད་པ་དེ་ནི་དྲང་བདེན་མིན་སྐོར་བརྗོད་འདུག་པ་དང་། དེ་དང་འབྲེལ་ནས་ཊོམ་གྱི་བུ་མོ་ཨེ་ཝན་ཀ་ཊོམ་ལ་བཅར་འདྲི་བྱས་པའི་བརྙན་ཐུང་ཞིག་བསྟན་འདུག དེའི་ནང་མོས་ཀྱང་སྤྱི་ཁྱབ་ཁྲིམས་རྩོད་པ་ཁོང་གིས་འོས་བསྡུར་གཡོ་ཟོལ་གྱི་གནད་དོན་ལྷག་མེད་པའི་དཔྱད་ཞིབ་དེར་ངོས་ལེན་བྱེད་ཀྱི་ཡོད་སྐོར་བརྗོད་འདུག 

དེ་བཞིན་ཉན་ཞིབ་ཀྱི་སྐབས་སུ་གྲོས་ཚོགས་སུ་དྲག་པོའི་གྱེན་ལངས་བྱེད་མཁན་ཁག་ཅིག་གི་བདེན་དཔང་སྐད་ཆའི་བརྙན་ཐུང་བསྟན་འདུག་པ་དང་། དེ་དག་ནང་དུ་ཊོམ་གྱི་རྒྱབ་སྐྱོར་བ་ཚོས་ཊོམ་གྱིས་ཁོ་ཚོ་ངོ་རྒོལ་བྱེད་དུ་ཡོང་དགོས་པའི་སྐུལ་མ་བྱས་རྐྱེན་སླེབས་པ་ཡིན་སྐོར་བརྗོད་འདུག་པ་དང་། མི་སྣ་གཅིག་གི་གྱེན་ལངས་སྐབས་སུ་ཊོམ་དངོས་སུ་མཉམ་ཞུགས་བྱས་མེད་པས་བློ་ཕམ་ཡོད་སྐོར་བརྗོད་འདུག 

གྱེན་ལངས་སྐབས་སུ་ཡོད་པའི་ཉེན་རྟོག་པ་ཁག་ཅིག་གིས། སྐབས་དེར་ལུས་སེམས་སྲོག་གི་དཀའ་ངལ་དང་ཉེན་ཁ་མྱངས་བའི་སྐོར་ཡང་བདེན་དཔང་སྐད་ཆ་བཤད་ཡོད་པ་རེད་འདུག 

ཚོགས་ཆུང་དེའི་ཚོགས་གཙོ་མང་གཙོ་ཚོགས་པའི་གྲོས་ཚོགས་འཐུས་མི་བྷེ་ནི་ཐོམ་སོན་གྱིས། ཊོམ་གྱིས་དབང་ཆ་རྩིས་སྤྲོད་བཀག་འགོག་ཡོང་ཐབས་བྱས་ཡོད་པ་དང་། དྲག་པོའི་གྱེན་ལངས་པ་དེ་དག་ནི་ཨ་རིའི་རྩ་ཁྲིམས་ཀྱི་དགྲ་བོ་ཡིན་པ། དེ་བཞིན་ཊོམ་ལ་རྒྱབ་སྐྱོར་བྱེད་མཁན་གྲོས་ཚོགས་འཐུས་མི་སོགས་ཀྱིས་རྟོག་ཞིབ་དེ་ནི་ཊོམ་ལ་མི་དགའ་མཁན་ཚོས་སྒེར་གྱི་སྙིང་ནད་འདོན་བྱེད་ཞིག་ཡིན་སྐོར་བརྗོད་བཞིན་ཡོད་ཀྱང་། ཐོག་མར་གནད་དོན་དེའི་ཐོག་རང་དབང་ཅན་གྱི་རྟོག་ཞིབ་གཅིག་ཡོང་ཐབས་བྱས་ཀྱང་། ཊོམ་ལ་རྒྱབ་སྐྱོར་བྱེད་མཁན་གྲོས་ཚོགས་འཐུས་མི་ཚོས་ཐོག་མར་བསམ་འཆར་དེར་རྒྱབ་སྐྱོར་བྱས་ཀྱང་རྗེས་སུ་དགག་བྱ་བྱས་ཡོད་པས། གྲོས་ཚོགས་ཚོགས་ཆུང་ཞིག་བཟོ་དགོས་བྱུང་ཡོད་སྐོར་བསྒྲགས་འདུག 

གྲོས་ཚོགས་འོག་མ་ནང་དུ་སྲིད་འཛིན་ཟུར་པ་ཊོམ་ལ་ཉེས་འཛུགས་ཐེངས་གཉིས་བྱས་ཡོད་པ་དང་། ཐེངས་དང་པོ་དེར་ཊོམ་གྱིས་དབང་ཆ་ལོག་སྤྱོད་དང་། གྲོས་ཚོགས་ཀྱི་ལས་དོན་ལ་འགོག་རྐྱེན་བཟོས་པའི་ཉེས་འཛུགས་བྱས་ཡོད་པ་དང་། ཉེས་འཛུགས་གཉིས་པ་ནི་ཊོམ་གྱིས་འོས་བསྡུའི་གྲུབ་འབྲས་འགྱུར་ལྡོག་གཏོང་ཆེད་དུ། ཨ་རིའི་གཞུང་ལ་དྲག་པོའི་གྱེན་ལངས་བརྒྱུད་སྐུལ་བྱས་ཡོད་པའི་ཉེས་འཛུགས་བཅས་རེད་འདུག །

གསར་འགོད་པ་སྐལ་བཟང་དོན་གྲུབ།