ཨ་རིའི་གསང་ལས་ཀྱིས་ཆུ་སྒང་དམག་མིར་དམག་སྦྱོང་སྤྲོད་སར་བགྲོ་གླེང་ཚོགས་ཆེན་ཞིག་འཚོགས་འདུག
ཟླ་འདིའི་ཚེས་༧ ཉིན་གྱི་དགོང་མོར་ཨི་གྷལ་རྫོང་གི་ལོ་རྒྱུས་གཅེས་འཛིན་ཚོགས་པ་དང་(Vail Symposium) ་ཞེས་པའི་གཞུང་འབྲེལ་མ་ཡིན་པའི་ཚོགས་པ་གཉིས་ཀྱི་གོ་སྒྲིག་འོག ཨ་རིའི་གསང་བའི་ལས་ཁུངས་ཀྱིས་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླང་དམག་ལ་གསང་བའི་དམག་སྦྱོང་སྤྲོད་ཡུལ་ཁོ་ལོ་རེ་ཌོའི་(Colorado) ་ནང་གི་ (Camp Hale) ཡི་ཉེ་འགྲམ་དུ་(Vail) ་གྲོང་སྡེ་ཞེས་པར་གསང་བའི་དམག་སྦྱོང་སོགས་དང་འབྲེལ་བའི་འབྲེལ་བའི་བགྲོ་གླེང་ཞིག་སྐོང་ཚོགས་གནང་ཡོད་འདུག
ཐེངས་འདིའི་བགྲོ་གླེང་ལྷན་ཚོགས་ཐོག་ཉམས་ཞིབ་པ་དང་ཁོ་ལོ་རེ་ཌོའི་ (Colorado) གཙུག་ལག་སློབ་གྲྭ་ཆེན་མོའི་སློབ་དཔོན་(Carole McGranahan) ་དང་། བོད་པའི་གློག་བརྙན་བཟོ་བསྐྲུན་པ་དང་འཁྲབ་ཁྲིད་མཁན་བསྟན་འཛིན་བསོད་ནམས་དང་ཁོང་གི་བཟའ་ཟླ་(Ritu Sarin) ། ལྷག་པར་དུ་དེ་སྔ་བོད་དམག་ལ་དམག་སྦྱོང་སྤྲོད་མཁན་གྱི་ལས་བྱེད་ཟུར་པ་སྦུ་རུ་སི་ ཝལ་ཀར་ (Bruce Walker) བཅས་མཉམ་ཞུགས་གནང་སྟེ། ཁོང་རྣམས་ཀྱིས་བགྲོ་གླེང་ཐོག་ཕེབས་མཁན་མི་མང་བརྒྱ་ལྷག་ལ་གསུང་བཤད་གནང་ཡོད་འདུག
ཕྱི་ལོ་༢༠༡༠ ཟླ་༩ ཚེས་༡༠ ཉིན་ཨ་རིའི་གཞུང་གིས་(Camp Hale) ས་གནས་སུ་ཨ་རིའི་གསང་བའི་ལས་ཁུངས་ཀྱིས་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླང་དམག་ལ་དམག་སྦྱོང་སྤྲད་པ་གཞུང་འབྲེལ་གྱིས་ངོས་འཛིན་བྱས་ཡོད་ཀྱང་། སྐབས་དེར་སྦྱོང་བརྡར་སྤྲོད་ཡུལ་གྱི་ས་གནས་ངོས་འཛིན་གསལ་བོ་ཐུབ་མེད་པར་བརྟེན། རྗེས་སུ་ཁོ་ལོ་རེ་ཌོ་གཙུག་ལག་སློབ་ཆེན་གྱི་མི་རྒྱུད་རིག་པའི་སློབ་དཔོན་ཁེ་རོལ་ མེཀ་གྷརཱནྷན་ (Carole McGranahan) གྱིས།ཞིབ་མཇུག་མཐིལ་ཕྱིན་བྱས་ནས་ས་གནས་དེ་ར་སྤྲོད་གསལ་བོ་བྱུང་ཡོད་འདུག
ཨ་རིའི་གསང་བའི་ལས་ཁུངས་ཀྱི་ལས་བྱེད་བཅུ་ཙམ་གྱིས་ཆུ་བཞི་སྒང་དྲུག་གི་དམག་མི་༣༠༠ ཙམ་ལ་ཕྱི་ལོ་༡༩༥༨ ནས་༡༩༦༤ ལོའི་བར་ས་གནས་དེར་དམག་སྦྱོང་སྤྲད་ཡོད་འདུག ཨ་རིའི་གསང་བའི་ལས་བྱེད་ཚོས་ཡུལ་དེར་(The Ranch) ་ཞེས་འབོད་ཀྱི་ཡོན་ནའང་། དང་དམག་ཚོས་དེར་ལྡུམ་རྭ་ཞེས་འབོད་སྲོལ་ཡོད་འདུག
གསར་འགོད་པ། བློ་བཟང་རྒྱ་མཚོ།
