ཨ་རིའི་གྲོས་ཚོགས་གོང་མའི་ཚོགས་ཆུང་ཞིག་ཐའེ་ཝན་དུ་སླེབས་འདུག 

ཨུ་རུ་སུས་ཡུག་ཀེ་རན་ལ་བཙན་འཛུལ་བྱེད་བཞིན་པ་དང་བསྟུན། རྒྱལ་སྤྱིའི་ནང་རྒྱ་ནག་གིས་ཀྱང་ཐའེ་ཝན་ལ་བཙན་འཛུལ་བྱེད་སྲིད་པའི་ཚོད་དཔག་བྱེད་མཁན་མང་པོ་ཡོད་པའི་སྐབས་དེར། རྒྱ་ནག་གི་ངོ་རྒོལ་དང་སྡིགས་སྐུལ་ལ་མ་ལྟོས་པར། ཨ་རིའི་གྲོས་ཚོགས་གོང་མའི་ཕྱི་སྲིད་ཚོགས་ཆུང་གི་ཚོགས་མི་གྲོས་ཚོགས་འཐུས་མི་ཁག་ཅིག་ཐའེ་ཝན་དུ་གཞུང་འབྲེལ་ལས་དོན་ཆེད་དུ་སླེབས་འདུག 

ཟླ་༤ པའི་ཚེས་༡༤ ཉིན་རྒྱུན་དུ་རྒྱ་ནག་ལ་སྐྱོན་བརྗོད་ཆེན་པོ་བྱེད་མཁན་ཨ་རིའི་གྲོས་ཚོགས་གོང་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་བྷོབ་མཱེ་ནན་ཌེཛ་དང་། དེ་བཞིན་ལིན་ཌ་སཱེ་གྷེརཱ་ཧམ་སོགས་ལས་གྲུབ་པའི་གྲོས་ཚོགས་འཐུས་མི་དྲུག་གི་སྐུ་ཚབ་ཚོགས་ཆུང་ཞིག་ཐའེ་ཝན་དུ་འབྱོར་འདུག་པ་དང་། གྲོས་ཚོགས་འཐུས་མི་ཁོང་རྣམས་པའི་གཞུང་འབྲེལ་ཕྱོགས་སྐྱོད་དེའི་སྔོན་དུ་རྒྱ་ནག་གིས་ཕྱོགས་སྐྱོད་དེར་ངོ་རྒོལ་བྱས་ཏེ་ཡ་ལན་དྲག་པོ་སྤྲོད་རྒྱུ་ཡིན་པའི་སྡིགས་བསྐུལ་བྱས་ནས། ལམ་ཁ་ནོར་བའི་ཐོག་ཏུ་འགྲོ་མི་རུང་སྐོར་དང་། རྒྱ་ནག་གིས་རྒྱལ་ཁབ་ཀྱི་བདག་དབང་དང་མངའ་ཁོངས་སྲུང་སྐྱོབ་བྱེད་ཆེད་དུ་ལས་དོན་ཤུགས་ཆེན་མུ་མཐུད་སྤེལ་རྒྱུ་ཡིན་སྐོར་བརྗོད་འདུག 

རྒྱ་ནག་གི་སྐྱོན་བརྗོད་དང་སྡིགས་བསྐུལ་གྱི་གནོན་ཤུགས་འོག་ཏུ་མ་སོང་བར། ཨ་རིའི་གྲོས་ཚོགས་འཐུས་མི་དེ་དག་ཐའེ་ཝན་དུ་སླེབས་ཡོད་པ་དང་། ཐའེ་ཝན་དུ་ཨ་རིའི་གཞུང་ཚབ་ལས་ཁང་གིས་བརྗོད་དོན་ལ། ཉིན་གཉིས་རིང་གྲོས་ཚོགས་འཐུས་མི་དེ་དག་དང་མཉམ་དུ། ཕྱོགས་གཉིས་བར་གྱི་འབྲེལ་ལམ་དང་། མངའ་ཁུལ་གྱི་བདེ་འཇགས། ཕྱོགས་གཉིས་ཀའི་ཁེ་ཕན་དང་འབྲེལ་བའི་གནད་དོན་གལ་ཆེན་ཁག་སོགས་ཀྱི་ཐོག་ལ་གྲོས་མོལ་བྱེད་རྒྱུ་ཡིན་སྐོར་བརྗོད་འདུག 

ཐའེ་ཝན་ཕྱི་སྲིད་ལས་ཁང་གིས་བརྗོད་དོན་ལ། ཨ་རིའི་གྲོས་ཚོགས་གོང་མའི་འཐུས་མི་དེ་དག་གིས་ཐའེ་ཝན་གྱི་སྲིད་འཛིན་ལྕམ་ཚ་ཡེ་དབྱིང་ཝན་དང་། ཕྱི་སྲིད་བློན་ཆེན་རྗོ་སིབ་ཝུ། དེ་བཞིན་བདེ་སྲུང་གི་མཐོ་རིམ་ལས་བྱེད་ཁག་ཅིག་དང་ཐུག་འཕྲད་བྱེད་རྒྱུ་ཡིན་སྐོར་བརྗོད་འདུག 

ཟླ་༢ པའི་ནང་ཐེངས་འདིར་ཐའེ་ཝན་དུ་སླེབས་མཁན་གྱི་གྲོས་ཚོགས་གོང་མའི་འཐུས་མི་བྷོབ་མཱེ་ནན་ཌེཛ་དང་གྲོས་ཚོགས་འཐུས་མི་གཞན་ཁག་ཅིག་གིས། གྲོས་ཚོགས་ནང་དུ་ཨ་རིའི་རྒྱལ་ཁ་ཝ་ཤིན་ཀྲོན་དུ་ཡོད་པའི་ཐའེ་ཝན་གྱི་གཞུང་ཚབ་ཁང་དེའི་མིང་དེ། ཐའེ་པེ་མགྲིན་ཚབ་ལས་ཁང་ནས་ཐའེ་ཝན་མགྲིན་ཚབ་ལས་ཁང་ཞེས་འགྱུར་བ་གཏོང་དགོས་པའི་གྲོས་འཆར་བཏོན་ཡོད་པ་རེད་འདུག དེ་ཡང་རྒྱ་ནག་གིས་རྒྱལ་སྤྱིའི་ནང་ཐའེ་ཝན་ཞེས་པའི་མིང་དེ་བེད་སྤྱོད་གཏོང་བར་དགག་བྱ་ཆེན་པོ་བྱེད་ཀྱི་ཡོད་འདུག གནད་དོན་དེ་དང་འབྲེལ་ནས་ཉེ་ཆར་ལཱི་ཐུ་ནི་ཡ་རྒྱལ་ཁབ་ཀྱིས་ཐའེ་ཝན་གྱི་གཞུང་ཚབ་ལས་ཁང་དེའི་མིང་དུ་ཐའེ་ཝན་མགྲིན་ཚབ་ལས་ཁང་ཞེས་པའི་མིང་བེད་སྤྱོད་བཏང་བཅུག་པར་བརྟེན། རྒྱ་ནག་གིས་རྒྱལ་ཁབ་དེ་དང་ཚོང་དམག་རྒྱག་འགོ་བཙུགས་ཡོད་པ་རེད། 

ད་ལྟའི་ཆར་ཐའེ་ཝན་ནང་དུ་སཱེ་ཝི་ཌན་རྒྱལ་ཁབ་ཀྱི་གྲོས་ཚོགས་སྐུ་ཚབ་ཚོགས་ཆུང་ཞིག་ཀྱང་ཕྱོགས་སྐྱོད་བྱེད་བཞིན་ཡོད་འདུག་པ་དང་། དེའི་ཁོངས་ནས་གྲོས་ཚོགས་འཐུས་མི་ཆཱར་ལཱི་ཝི་མེར་གྱིས་ཕྱོགས་སྐྱོད་འདིའི་དགོས་དོན་ནི་གསལ་པོ་རེད། དེ་ནི་ཐའེ་ཝན་གྱི་མཚོ་འགག་ཡོངས་སུ་ཡུ་རོབ་ཀྱིས་ཐའེ་ཝན་ལ་རྒྱབ་སྐྱོར་བྱེད་ཀྱི་ཡོད་པའི་བརྡ་ལན་སྤྲོད་ཆེད་ཡིན་སྐོར་བརྗོད་འདུག 

ཟླ་བ་སྔོན་མར་ཨ་རིའི་ཕྱི་སྲིད་བློན་ཆེན་ཟུར་པ་མཱེག་པཱོམ་པཱེ་ཡིས་ཐའེ་ཝན་དུ་ཕྱོགས་སྐྱོད་སྐབས། ཨ་རིས་ཐའེ་ཝན་དེ་རང་དབང་རང་བཙན་གྱི་རྒྱལ་ཁབ་གཅིག་ལ་ངོས་འཛིན་བྱེད་དགོས་སྐོར་བརྗོད་པས། རྒྱ་ནག་ལ་ཁོང་ཁྲོ་ལངས་ཡོད་པ་རེད། 

ཨ་རིའི་སྲིད་གཞུང་སྐབས་སྔོན་མ་དང་ད་ཡོད་སྲིད་གཞུང་གཉིས་ཀའི་དུས་སུ། ཨ་རི་ནས་ཐའེ་ཝན་ལ་རང་སྲུང་གི་ཆེད་དུ་མཚོན་ཆ་བཙོང་རྒྱུ་ཤུགས་ཆེ་རུ་སོང་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།